Dos luna pasa fraccion di MAS a pidi Minister President pa un reunion pa bin Parlamento di Aruba pa splica e problema cu ya ta andando cual ta e posicion di e werksternan di school. Un problema cu por cierto te dia di awe ainda no ta resolvi. E cartera mientras tanto a bay den man di un minister nobo.
Pero loke ta hopi peculiar den e caso aki ta cu fraccion di MAS a invita e Minister President paso segun e corespondencia cu nan tin, e ta esun cu a tuma cierto decisionnan y a comunica esaki tambe na e werksternan den un forma caminda e comunicacion a bay por medio di e schoolbestuur.
Lider di fraccion di MAS Parlamentario Marisol Lopez Tromp tin un cantidad di carta den cual por mira claramente con e Minister President ta mete den e cartera di enseñansa. Prome Minister a manda un carta pa parlamentario Lopez Tromp den cual e ta bisa cu e lo no bin Parlamento maske cu nan invit’e paso segun e Landsverordening Instelling Ministeries (LIM) cada cartera ta un responsabilidad ministerial individual di cada minister. Cual ta berdad pero debi na e echo cu Prome Minister a keda mete cada bes den decisionnan di enseñansa por medio di cartanan, dunando instruccionnan, tumando decisionnan y invitando e hendenan pa reuni cune y no cu minister di onderwijs, e lider di fraccion di MAS a pensa cu claro nan lo invita su persona pa bin Parlamento paso e ta esun cu a tuma cierto decisionnan. Di mes e por bin cu e minister di enseñansa paso ta su cartera pero debi cu minister Wever Croes ta esun cu ta tuma decisionnan, e fraccion a invit’e.
Segun Parlamentario Lopez Tromp, Prome Minister ta haya bon pa awo core pa no bin Parlamento pero na varios ocasion e sa compaña ministernan y duna splicacion den Parlamento. Pa e motibo aki Parlamentario Lopez Tromp no ta compronde kico ta e problema pa no bin Parlamento un biaha mas. Parlamentario Lopez Tromp a sigui na duna diferente ehempel di decisionnan cu Prome Minister a tuma cu ta regarda e ministerio di enseñansa.
Dia 16 di juni 2020 ta Prome Minister mes a firma carta den cual e ta duna informacion y decisionnan na entre otro schoolbestuurnan pa loke ta cambionan den enseñanza cu no ta su cartera y e ta pone tambe cu e ta haci esaki namens e minister di onderwijs. Den un otro carta fecha 18 di juni 2020 Prome Minister ta coresponde cu cabesantenan di school y e ta informa nan cu lo no tuma lugar un splitsing den e school manera e Minister di Onderwijs, cu ta esun autorisa, lo a dicidi. Kemen Prome Minister ta cambia decision su mes siendo cu e no ta e Minister di Onderwijs. Esaki ta algo cu e lo mester a resolve den conseho di minister y sali cu un solo voz pafo paso esaki ta loke el a tilda semper: cu mester ta un solo voz y cu no por sali gesplit cu dos opinion pafo di conseho di minister. Y hustamente esaki nos a wak ta tuma lugar.
Parlamentario Lopez Tromp a sigui mustra un di tres carta, fecha 25 di juni 2020, den cual Prome Minister ta coresponde cu un team di un school, dus cu diferente maestro di cual e ta papia cu e diferente dama y cabayeronan di e school, splicando nan kico e ta bay haci y puntrando nan si nan kier reuni cune y no cu e minister di onderwijs. Tambe tin un carta di 09 di maart 2021 caminda cu Prome Minister ta bisa e diferente docentenan, sindicatonan, cabesantenan cu lo no tin un fusion entre e diferente schoolnan y ta informa nan cu cada school lo keda existi riba nan mes. Alabes e mandatario ta bisa nan cu si e por haci algo pa nan, e kier keda den contacto cu nan pa cu esaki y no ta referi niun momento na e Minister di Onderwijs. Den un otro carta fecha 23 juni 2021, cual ta trata e impasse di pago di e werksternan, Prome Minister ta duna un opdracht mientras cu e no ta Minister di Onderwijs y e ta bisa e fundacion pa no kita e werksternan for di trabao, cual riba su mes ta algo bon paso kier mantene e pan di e trahadornan y aki e mandatario ta hasta invita e hendenan pa un reunion cune y no cu e Minister di Onderwijs.
Segun Lopez Tromp, esaki ta un ehempel bibo di con Prome Minister mes ta desvia totalmente y actua contra e ley di e LIM cual ta e ley cu ta responsabilisa cada minister individualmente pa nan cartera. Banda di esaki ainda tin un carta mas di 30 di augustus 2021 den cual e prome mandatario ta comunica directamente cu zweminstructeurs, cual atrobe no a cay bao di e carteranan di Prome Minister pero di e Minister di Onderwijs. Den e carta aki atrobe Prome Minister ta splica e hendenan kico e kier haci y ta invita nan pa reuni cune y no cu e Minister di Onderwijs. Y atrobe cu su firma abao.
Esaki ta algun ehempel cu Parlamentario Lopez Tromp a trece dilanti y pa e motibo aki mes Lopez Tromp a keda asombra cu Prome Minister a mand’e un carta y haci un publicacion caminda Prome Minister kier duna un curso y splica kico ta encera e LIM y kico ta encera pa bo tin un responsabilidad ministerial cual e mes como Minister President ta viola y ta mete constantemente den cartera di otro minister cu mester carga su propio responsabilidad, sea cu e tuma decision bon of malo. En bes di resolve cosnan den conseho di minister, manera e Prome Minister mes ta blo trece dilanti, den un solo voz pafo, awo e prome mandatario mes ta sali pafo cu dos diferente voz y ta leg esaki vast tambe den diferente carta pa esnan den educacion.
Parlamentario Lopez Tromp a finalisa bisando cu e ta kere ta Prome Minister mes mester di un curso y e ta kere cu pa e motibo aki mes e Prome Minister a viola e mesun ley di LIM. Pa e motibo aki a pidi Prome Minister e LIM actual y tambe e actual reparticion di carteranan. Tin un gobierno nobo y pueblo no kier simplemente sa ken a bira minister, pero pueblo kier sa kico ta tur e departamentonan, fundacionnan y organisacionnan cu ta resorta bao di cada cartera. Fraccion di MAS a papia cu varios instancia y fundacion y nan tur ta bisa cu nan no sa ainda drechi bao di cual minister nan ta resorta. Nan a scucha algo den prensa y nan ta asumi bao di cual minister nan lo cay pero nan no a haya esaki oficialmente.
E LIM mester bin Parlamento ainda y fraccion di MAS a pidi den un carta cu nan kier pa Prome Minister duna por escrito bao di cual cartera cada instancia ta cay. Ta wak ministernan ta bishita links en rechts ya cu nan si lo sa politicamente palabra kico lo bay cay bao di nan paso tin varios cu no por ni firma ainda paso pa ley ainda e departamento no ta cay oficialmente bao di nan. Pero Parlamento no ta haya e informacion aki. Den cuadro di integridad y transparencia Parlamentario Lopez Tromp ta kere esaki ta necesario pa Parlamento por sigui haci su trabao.
