Durante un conferencia di prensa recien lider di fraccion PPA parlamentario Otmar Oduber a trece dilanti su preocupacion pa situacion cu diferente centro di bario ta pasa den dje na e momentonan aki, specificamente relaciona cu falta di fondo.

E parlamentario a remarca cu como lider di fraccion PPA e no ta compronde con gobierno, mirando cu tin fondonan y ta papia di surplus, por mira con e centronan di bario cu ta activo rond Aruba ta lucha pa por haya fondo, ta traha nan mes pa drecha e lugarnan sin duna nan nada di fondo.

“E grupo di hendenan aki, papiando di cinco pa seis centro di bario na Aruba sigur cu ta hopi activo, cu tin mucha, hende grandi, adulto mayor henter dia bezig, cu tin diferente team di deporte, manteniendo hoben for di riba caya, pero ta haya cero atencion for di gobierno,” Oduber a remarca.

El a splica cu den e caso aki ora cu mira con e centronan di bario ta ser atendi ta trece algun pregunta. El a indica cu via CEDE Aruba ta purba yuda e centronan di bario un poco y alabes a menciona cu lo ta bon tambe pa puntra e minister kico e maneho ta y con e beleid ta cu CEDE Aruba ta yuda e centronan di bario.

“Si bo mira con e centronan di bario ta sufri, yora, sclama pa haya atencion y haya ayudo ami no ta compronde con un coalicion cu a caba di sinta por bisa no ora bo bin cu mocion pasobra bo ta oposicion, pero bo ta perhudicando e bario, e pueblo, e hubentud,” el a enfatisa.

Parlamentario Oduber a subraya cu e centronan di bario ta lucha continuamente pa keda mantene e centro di bario activo, pero gobierno no t’ey y no ta duna nan atencion. El a indica cu tin e mentalidad cu ta bin cu mehoracion, pero no ta haci esaki na tur centro di bario, cual el a señala no ta husto pasobra tur centro di bario mester atencion y tur tin e mesun derecho pa mesun oportunidad.

Oduber a trece dilanti tambe e punto cu gobierno ta haci diferente nombramento di titulonan cu antes no tabata conoci, pero e directivanan di e centronan di bario tin cu traha por nada, ademas cu ta traha cu un cantidad di boluntario y mucha cu ta bay na e centro di bario. “Algo ta robes y nos no ta para un rato keto na esnan cu di berdad ta dunando nan alma y cuerpo na comunidad di Aruba,” el a agrega.

E parlamentario a splica cu fraccion PPA a manda un carta pa ministernan tocante e anuncio cu a ser realisa cu awor ta bay tin vacatura y cu ta bay nombra hende conforme nan solicitatie. Oduber a remarca cu fraccion PPA kier pa gobierno habri esaki pa pueblo, y nan kier wak cuanto hende a aplica pa vacatura, unda nan a publica e vacaturanan pasobra nan no a mira nan ainda y niun hende no sa unda mester solicita, pero segun e parlamentario Cocolishi “ta bolter over cu cantidad” di hende cu ta ser nombra den funcionnan cu no tabata existi y cu salarionan exhorbitante.

“Pero esunnan cu ta traha den centro di bario cu ta atende cu mucha y ta traha den solo, no ta haya ni un placa y mester bay busca na Cede Aruba pa wak si por haya un proyecto subsidia, etc… Ta ken no por wak con centro di bario ta traha, ta ken no por wak e esfuersonan cu ta ser haci eyfo y bo tin fondonan. Pero ta pone 70 miyon den un fondo di inversion pero cu niun hende sa kico e inversion ta bay ta pasobra asina bon parlamento ta funciona,” el a remarca.

El a splica cu a pidi un comision ser lanta pa evalua parlamento su trabou den cuarenta aña pasobra parlamento, segun e lider di fraccion PPA, “ta un poppenkast” cu t’ey pa sostene gobierno y ya… “Pero di otro banda pober centronan di bario no tin placa, pero si ta pone 70 miyon un banda pa bay haci politica cune,” el a agrega.

Parlamentario Oduber a enfatisa cu centronan di bario ta sufriendo y niun hende ta pone atencion y fraccion PPA kier pone atencion un biaha mas na dje. Alabes e kier manda un mensahe na gobierno y a indica cu mescos cu nan a adopta varios maneho di e fraccion, por haci mescos pa e centronan di bario.

El a referi na e maneho di bodycam cual el a indica cu si no ta pasobra fraccion PPA a pone presion pa esaki, awe no tin bodycam por ehempel na polisnan. “Nos a keda insisti hunto cu sociedad, comunidad y nos a logra,” el a señala.

Na mesun momento el a splica cu aunke nan ta sostene e e introduccion di bodycam, el a indica cu e ta un otro ehempel di otro maneho ad hoc di gobierno. El a cuestiona e maneho specifico pa loke ta trata e bodycams, y kico ta e derecho di un ciudadano ora un agente cu bodycam drenta su cas. Ademas, el a indica, cu nan no sa cuanto bodycam a ser introduci, no sa kico e regla ta, tampoco kico e derecho di ciudadano ta.