Den un carta dirigi na presidente di Parlamento, Sr. Marlon Sneek (AVP), lider di fraccion MEP, Evelyn Wever-Croes, a solicita pa dirigi pregunta na prome minister Mike Eman (AVP), relaciona cu nombramento di Sr. Gerald Rasmijn den aparato publico di Pais Aruba.

Wever-Croes a pidi pa haya un contesta dentro di dos siman.

“Cu gran preocupacion y inkietud, mi a tuma nota di nombramento di Sr. Gerald Rasmijn dentro organisacion publico di Pais Aruba,” Wever-Croes ta bisa den su carta. “E hecho cu precisamente un persona cu den pasado – y awo atrobe – den un manera grave y cu tono sexista a burla y humilia miembronan femenino di e Gabinete anterior den publico, y awo ta asigna den un posicion di confiansa den area di comunicacion di gobierno, no solo ta lanta duda tocante integridad y cuido debido, pero tambe ta afecta e propio fundeshi di respet y igualdad den nos sociedad.”

Wever-Croes a continua bisando cu como un ex-minister femenino, e ta hay’e cuestionable cu e gobierno actual (Gabinete AVP-FUTURO) ta scoge pa nombra un persona cu un historia asina den un posicion di confiansa.

“Hunto cu stakeholdernan local y internacional, nos a traha intensivamente den añanan recien pa reforsa e posicion di hende muhe den nos sociedad y pa promove un cultura di respet y trato igual. E decision aki y e nombramento nobo, sinembargo, ta mina dolorosamente e stapnan cu nos a tuma y ta perhudica e desaroyo di hende muhe,” segun Wever-Croes.

Segun e parlamentario, e mensahe cu e nombramento ta manda ta “extremadamente dañino: e ta duna e impresion cu ta perfectamente aceptable pa di manera abierto ridiculisa esnan cu ta tribi di ta critico, specialmente den un manera sexista y irespetuoso.”

“E nombramento aki no ta solamente afecta e integridad personal di e muhenan involucra, sino tambe e credibilidad di nos institucionnan publico y e balornan fundamental di nos sociedad.”

Pa e motibonan aki, Wever-Croes ta haya sumamente importante pa pidi prome minister Eman, “como e oficial responsable pa gobernacion di e pais,” algun pregunta cla y critico. “Esaki no ta djis tocante un nombramento individual, sino tocante e credibilidad di nos institucionnan publico y e proteccion di tur ciudadano – specialmente hende muhe – contra intimidacion y falta di respet.”

El a haci e preguntanan den interes di bon gobernacion y pa protege integridad di posicionnan di servicio publico dentro di Pais Aruba, segun e carta.

E preguntanan ta lo siguiente:
Por specifica exactamente kico e perfil laboral ta pa cual a nombra Sr. Rasmijn directa- of indirectamente?
Ki rekisito specifico pa e trabao a ser aplica?

Pakico a dicidi pa no publica e vacatura pa e posicion aki, pa asina otro individuo interesa por a aplica di un manera transparente?
Kico ta e salario y pakete total di compensacion (incluyendo cualkier posible bonus of toeslag) cu Sr. Rasmijn ta ricibi di fondo publico?

Bo tabata na altura di e hecho cu Sr. Rasmijn, den pasado recien y hasta algun dia atras, a traves di e pagina di Facebook “Pa Tin Pret,” publicamente a ridiculisa y insulta ministernan femenino di e gabinete anterior, Gabinete Wever-Croes, di un manera ofensivo y sexista, incluyendo e distribucion di imagen pornografico manipula?

Si bo no tabata na altura di esaki, bo ta dispuesto pa haci mas investigacion riba su background?

Con bo ta interpreta e mensahe cu esaki ta manda na tur muhe di Aruba, specialmente esnan cu ta diariamente victima di sexismo, calumnia y intimidacion digital?

Bo ta considera e nombramento aki, mirando e historia aki, apropia pa un persona cu mester fungi den un posicion publico ehemplar?
Bo ta dispuesto pa reconsidera of hasta revoca e nombramento aki awo cu e ta mustra di ta un violacion serio di confiansa publico?