E siman aki durante su discurso den parlamento, lider di fraccion MEP, parlamentario Evelyn Wever-Croes a denuncia cu el a ricibi un menasa di morto, cual el a indica ta vincula na minister di Futuro, Gerlien Croes, indicando cu autoridadnan ya ta na altura di esaki.

Den un post riba rednan social, Wever-Croes a bisa cu “minister Gerlien Croes ta manda su hendenan menasa mi cu morto pa asina mi stop di cuestion’e. Autoridadnan lo atende cu e caso, pero loke si nan lo no logra ta silencia oposicion.”

Papiando den sala di Parlamento, Wever-Croes a bisa cu “desde cu e biahe di minister Gerlien Croes a bira un topico di henter comunidad, ta hopi cos a pasa akinan na Aruba.”

El a agrega cu “un tal meneer Williams”, kende el a indica ta “hopi cerca na minister Gerlien Croes”, a menas’e cu morto “pasobra mi ta cuestiona e minister.”

Wever-Croes a reflexiona tocante e trabao di parlamentario y e seriedad di e menasa. “Na e momento cu un parlamentario ta wordo menasa cu morto pasobra e ta haci su trabao, e ta algo di henter e parlamento ‘ki.”
El a continua bisando cu dia 26 di november ultimo, conmemorando 39 aña di fayecimento di Betico Croes den santana na Santa Cruz, “riba un post el a skirbi ‘bay wak si tin luga pa bo den e santana ey’. Par di dia despues, el a skirbi ‘pone un arma na bo cabes y tira, asina tur hende ta contento cu bo no por habri bo boca mas.’ El a usa otro palabra, pero mi no ta bay ripiti esey,” Wever-Croes a bisa. “Y ultimo el a skirbi cu e ta spera cu mi por lanta stijf hopi lihe. Esey ta su deseo di fin di aña.”

Teniendo cuenta cu menasa di morto ta algo hopi serio y criminal, Wever-Croes a indica cu “claro” el a entrega un keho formal cerca autoridadnan.

“Pero mi ta bisa esaki: si e hendenan ‘ki ta kere, si e minister ‘ki ta kere cu e ta manda hende pa bin menasa mi cu morto pa mi stop di cuestion’e, señor presidente, ta mas mi ta bay cuestion’e. Pasobra ora bo ta manda hende haci e cosnan ‘ki señor presidente, [ta pasobra] bo tin co’i sconde. Y tur e comportacion di e minister ta indica riba e direccion aki,” Wever-Croes a indica.

“Husticia tin cu cana su rumbo, nan tin cu encarga nan mes di esaki. Pero mi kier a bisa bo tambe, señor presidente, y na minister Gerlien Croes, djis papia berdad. Bo a paga, si of no? Cuanto bo a paga, y principalmente, na ken bo a paga? Pasobra esey ta locual cu e parlamento aki, y pueblo di Aruba, kier sa y tin derecho di sa.”

Na final, partido MEP a introduci un mocion den cual a duna minister Gerlien Croes 36 ora pa contesta e preguntanan di e fraccion.

Minister Gerlien Croes y e avion priva
E polemica aki ta basa riba un biahe cu e minister en cuestion lo a haci den un avion priva pa bay Corsou dia 19 di november ultimo. E biahe aki tin atencion di oposicion pa algun tempo caba, sin cu e minister ta clarifica e hechonan.

Segun Wever-Croes, minister Gerlien Croes tabatin autorisacion formal di Conseho di Minister pa un biahe cu tabata programa pa dia 20 di november. El a informa Parlamento y tabatin su documento regla, siguiendo e procedemento cu ley ta exigi. Pero e controversia a surgi ora cu e mandatario a dicidi sali un dia prome—dia 19 di november—cu a coincidi cu e yegada di e seleccion di futbol di Corsou despues di nan clasificacion pa mundial.

Parlamentario Wever-Croes ta afirma cu esaki no tabata cubri pa ningun decision nobo di Conseho di Minister, y cu e forma den cual e vuelo a tuma lugar por representa un violacion di codigo di conducta pa minister. E codigo aki ta prohibi ministernan di ricibi regalonan di gran balor economico.

Siman pasa, Wever-Croes a insisti riba importancia di transparencia. Un minister, el a indica, “no por bula den un jet priva, hay’e di regalo cabey boto pa bay cune, pasobra e ta un regalo di un balor demasiado grandi.”

Segun e parlamentario, un jet priva, cu por trankilamente costa entre cuatro y cinco mil dollar, no por keda sin un splicacion ni sin prueba di pago. Pa e motibo aki e ta insisti cu pueblo mester haya un prueba real cu e minister efectivamente a cubri e gasto cu su propio placa.

Wever-Croes a manda pregunta den Parlamento pa minister Gerlien Croes y prome minister Mike Eman, pero no a ricibi respuesta directo na e preguntanan.

Di su banda minister Gerlien Croes a publica un serie di declaracion riba su pagina di Facebook, refutando tur acusacion y a indica cu tur e trabao di oposicion den su contra ta trata simplemente di un campaña politico. Segun e mandatario, oposicion ta usa e caso pa distrae pueblo for di investigacionnan cu segun e ta tuma luga riba maneho di placa di gobierno den tempo cu MEP tabata den poder.

El a bisa cu e liderazgo di MEP mester ta preocupa pa investigacionnan continuo riba supuesto abuso y irregularidadnan financiero durante su añanan den gobierno y cu supuestamente tin caso cu un bufete a gana nuebe miyon florin den un periodo di seis aña. Croes a publica como prueba un di e documento di e varios keho cu segun e MEP y su lider mester worry cune.

Den un publicacion anterior, 25 di november, minister Croes a indica cu el a presenta su verslag pa e biahe en cuestion. Segun e, el a biaha sin pidi daggeldvergoeding ni representatiekosten, cu normalmente ta suma rond 2.500 florin, pasobra hotel tabata all-inclusive. Alabes el a puntra si ministernan durante gobierno di MEP tabata entrega nan gasto no usa of nan verslag manera cu ta spera di dje awor.