Lider di MEP, Evelyn Wever-Croes: “Tempo di minister Gerlien Croes ta cabando”

Wever-Croes ayera den un transmision en bibo riba rednan social a lansa un critica cu Parlamento “no ta funciona.”
“Nos ta pidi reunion, nos no ta hay’e. Nos ta manda carta, nos no ta haya contesta,” Wever-Croes a bisa. “E gobierno, bo ta weita ministernan ta dandaria tur rond di Aruba, pero den Cas di Pueblo nan no ta bin pa duna cuenta.”

E transmision di Wever-Croes tabata den marco di e conflicto andando entre Parlamento y Gobierno tocante e biahe di minister Gerlien Croes den un jet priva na november di aña pasa. Segun Wever-Croes, minister Gerlien Croes tabatin autorisacion formal di Conseho di Minister pa un biahe cu tabata programa pa dia 20 di november. El a informa Parlamento y tabatin su documento regla, siguiendo e procedemento cu ley ta exigi. Pero e controversia a surgi ora cu e mandatario a dicidi sali un dia prome—dia 19 di november—cu a coincidi cu e yegada di e seleccion di futbol di Corsou despues di nan clasificacion pa mundial.

Parlamentario Wever-Croes ta afirma cu esaki no tabata cubri pa ningun decision nobo di Conseho di Minister, y cu e forma den cual e vuelo a tuma luga por representa un violacion di codigo di conducta pa minister, cu ta prohibi ministernan di ricibi regalo di gran balor economico. Esaki pasobra a bira conoci cu minister Gerlien Croes a haci e biahe abordo di un jet priva.

E minister ta insisti cu el a paga pa e biahe – pues no tabata un regalo. Sinembargo, te awo e minister no a presenta Parlamento un prueba contundente di esaki, y asina e controversia y polemica ta continua.

“Mas desfuncional cu nunca”

Segun Wever-Croes a bisa den su transmision ayera, e problema di loke e ta considera falta di transparencia di gobierno ta afecta Parlamento, pasobra ta stroba nan di haci nan trabao.

“Di siman pasa diaranson, mi a insisti cerca presidente di Parlamento, Marlon Sneek (AVP) pa nos como lidernan di fraccion y presidente reuni den Parlamento pa asina nos tuma un posicion, un standpunt, kico nos ta bay haci,” Wever-Croes a bisa. “Pasobra cu e minister ta falta respet na Parlamento ta bisa di dje algo, pero cu nos di Parlamento a permiti nan falta nos respet, e ta bisa algo di nos tambe.”

Wever-Croes a bisa cu el a pidi pa e reunion cu caracter di urgencia, den 24 ora, pero no a tende nada. El a manda 4 recordatorio for di diaranson, pero ta te diamars e reunion a keda convoca. “Ayera e ora mi tabatin e oportunidad hunto cu presidente di Parlamento y e lidernan di fraccion , y mi a splica nan cu… mi no ta papiando di partijpolitiek, mi no ta papiando di MEP vs. AVP. Mi ta papiando di Aruba, mi ta papiando di e instituto mas halto den nos Constitucion, cu ta Parlamento, cu tin cu controla gobierno, cu ta cumpliendo 40 aña di existencia y e ta mas desfuncional cu nunca.” Esaki ta algo cu segun Wever-Croes no por tolera.

“Mi a bisa nan, ‘ami ta tuma mi trabao na serio. Pueblo a eligi mi. Mi ta wordo paga pa pueblo pa haci e trabao. Y pues mi kier wordo permiti haci e trabao,’” Wever-Croes a continua. El a agrega cu “en general nos tur di Parlamento ta di opinion cu loke gobierno ta haciendo no ta bon. Cu gobierno no ta bin Parlamento, no ta bon. Cu gobierno no ta contesta pregunta, no ta bon.”

“Mi tin cu bisa cu hasta e lidernan di fraccion di AVP y di FUTURO ta di acuerdo cu esaki, claro PPA tambe.”

Segun Wever-Croes, den e reunion presidente di Parlamento “a compromete su mes cu nos, cu e ta bay tuma pasonan hopi fuerte contra gobierno, y mustra gobierno riba ley, y riba ley – den ley ta para cu ora cu bo yama gobierno pa bin duna cuenta, e tin cu bin den 30 dia.” Wever-Croes a resalta cu nan tin “30 opcion” riba cual di ta presenta na Parlamento. “Abo scoge bon dia, pero bo tin cu bin si. Keda sin bin no ta un opcion mas,” el a enfatisa.

“Minister Gerlien Croes tin 30 dia so mas pa core”

Den un sentido mas amplio, Wever-Croes a indica cu di tur pregunta cu Parlamentario ta manda pa gobierno, “mas di 50 porciento ta keda sin wordo contesta,” el a recorda cu den programa di gobernacion di AVP-FUTURO ta para cu ta bay contesta tur pregunta den e periodo cu e parlamentario pidi, pero cu tur carta cu MEP a manda, den cual tabata pidi contesta den dos siman, niun a haya contesta den dos siman. “Masha poco contesta nos a haya despues di hopi luna,” el a lamenta, enfatisando cu den programa di campaña di Partido FUTURO a priminti cu lo contesta tur pregunta den dos siman, “kiermen e ta nan compromiso cu pueblo, nan compromiso cu Parlamento. Pero nan no ta cumpli cune.”

Segun Wever-Croes, presidente di Parlamento, Sr. Sneek ta bay manda un carta pa gobierno den cual ta duna nan tres siman pa contesta tur pregunta.

“Esaki kiermen cu minister Gerlien Croes tin 30 dia so mas pa core,” Wever-Croes a adverti. “30 dia so mas pa keda sconde. 30 dia so mas prome cu e berdad sali na cla. Y e tin 21 dia so mas pa contesta tur nos preguntanan por escrito. Kiermen e tempo di minister Gerlien Croes ta cabando.”

Wever-Croes a reconoce cu den comunidad por tin cierto cansancio tocante e tema di e biahe di e minister riba jet priva, bisando cu “mi tambe ta prefera pa nos caba cu e topico pa caba, y bay pa otro topiconan.” Sinembargo, e ta considera cu “e topico ta asina importante, pasobra e ta refleha e sentido di transparencia, di integridad, e sentido di compromiso cu e minister aki no tin, ni cu Parlamento ni cu pueblo di Aruba.”

“Si e minister a paga… e ta den problema hopi serio”

Wever-Croes a bolbe duna un splicacion di e sucesonan cu a conduci na e impasse entre e minister y e Parlamentario. “E minister a subi un private jet bay Corsou pa un biahe di trabao. Nos a puntr’e ken a paga, pasobra no por ta asina cu bo ta usa placa di pueblo pa esaki. El a bisa placa di pueblo no a wordo usa, el a paga su mes. Nos di cune ta bon, mustra nos e prueba. E no kier mustra nos e prueba, dus nos a bay investiga.”

Wever-Croes a continua bisando cu “a resulta cu e avion akinan pa ley di Aruba – pasobra cu e avion a bula for di Aruba – no mag di cobra. Kiermen mi no sa kico minister Gerlien Croes a paga, ni na ken el a paga, ni ki dia el a paga, pasobra cu e avion aki no mag di cobra.” El a bisa cu minister di Transporte, Wendrick Cicilia (AVP) mes a confirma e informacion aki.

Wever-Croes a bisa cu bayendo mas leu, a haya sa cu e avion en cuestion ta registra na un compania Mericano, loke ta nifica cu ley di Merca ta aplicable. Fraccion di MEP a paga pa un opinion legal di expertonan di Merca, cu ta bisa cu “si e minister a paga di berdad manera cu e ta bisa, anto e ta den problema hopi serio,” Wever-Croes a bisa. “Pasobra e ley Mericano ta pone cu e no tabatin mag di paga niun cen, ni pa comparti gasto.” Esaki ta nifica cu “si e minister ta keda insisti cu el a paga, anto el a viola ley Mericano y e ta den problema hopi serio e ora cu autoridad Mericano.”

Papiando di su opinion, Wever-Croes a bisa cu e ta kere “cu e minister ta gañando nos tur.” Esaki pasobra e no ta presenta prueba, y un persona cu no tin nada di sconde lo djis presenta e prueba. El a resalta cu otro siman ta cumpli cuatro luna cu Parlamento ta haciendo pregunta riba e topico sin por haya un contesta. “Ami ta yegando na e conclusion cu e minister ki a gaña nos y e no a paga un cen. Kiermen el a hay’e regalo.” Y aki ta bay back na e Codigo di Conducta di Minister. Wever-Croes a splica cu e ley aki ta pone un limite riba e suma (of balor) di un regalo cu ta permiti pa un minister ricibi, y cu si haya un regalo, mester registra esaki. El a nota cu minister Gerlien Croes no a registra di a ricibi e regalo, y ademas e ta un suma mas halto di loke e Codigo di Conducta ta permiti.

Esaki ta pone e minister den un situacion cu cualkier resolucion ta resulta den problema. Si e no a paga, el a viola ley pasobra el a ricibi e regalo. Pero si el a paga, el a viola ley Mericano.

Finalisando, Wever-Croes a enfatisa: “Trabao di Parlamentario ta un trabao hopi serio… y den e caso specifico aki, e simple hecho cu e minister aki a gaña, e no kier duna transparencia, e ta mustra hopi di e mentalidad di full e gobierno ki.”