(CuraçaoChronicle) – Den un conferencia di prensa fuerte diamars, Quincy Girigorie, e lider di e partido den oposicion PAR, a bisa cu e conflicto andando entre e minister di Finanzas Javier Silvania y hefe di Ontvanger, Alfonso de Jesus Trona, ta hopi mas profundo cu un choke personal.

Segun Girigorie, e situacion “ta golpia e curason di Corsou su integridad democratico” y ta exigi accion inmediato di ambos Ministerio Publico (OM) y Parlamento.

Girigorie a habri su declaracion pa medio di clarifica cu PAR su posicion no ta tocante exigi Silvania su renuncia pa insulta un ambtenaar. “Tur hende sa cu e minister tin un historia di verbalmente abusa profesionalnan,” el a bisa. “Sinembargo e biaha aki ta diferente – e problema ta tocante e integridad di nos democracia.”

E lider di oposicion a señala cu pa prome biaha, un oficial di gobierno a publicamente declara cu si OM papia cu e minister di Finanzas, “e minister aki no lo keda den su cargo.” Girigorie a describi esaki como un momento inespera den Corsou su historia politico. “Esaki ta nifica cu e oficial financiero mas halto den e pais ta bisando cu e tin evidencia di actonan criminal di un minister den funcion,” el a bia. “Esaki ta algo grave cu ta bay mas leu cu un simple insulto.”

Girigorie a presenta loke e ta yama un patron di intimidacion y humiliacion di minister Silvania, nombrando varios incidente den pasado. Esaki ta inclui e resignacion di dos oficial di polis asigna na su seguridad den 2022 despues di bisa cu nan no lo tolera su comportamento, ademas di su insulto publico di ex Prome Minister Maria Liberia-Peters, y choke cu oficialnan di rango halto den e ministerio di Finanzas.

Tambe el a menciona e renuncia di varios director y specialista di Curaçao Medical Center, ken, segun e, a bay a causa di e minister su comportamento. “Esaki a bira su modus operandi – humilia y terorisa profesionalnan cu ta nenga haci su kier,” Girigorie a bisa. “E sector publico no ta imparcial mas. Hende tin miedo di su persona.”

Girigorie a exigi pa Ministerio Publico (OM) inmediatamente convoca ontvanger Trona pa duna un testimonio tocante su declaracionnan publico. “E ontvanger no tin mester di permiso pa reporta actonan criminal di cual e ta al tanto,” el a bisa. “Si OM no a yam’e caba pa testigua, eora algo ta seriamente malo den e pais aki.”

Girigorie a critica OM pa a keda den silencio tocante varios caso di corupcion, incluyendo CPr, ENNIA y exencion di impuesto cu Algemene Rekenkamer a trece dilanti. “No solamente mester haci husticia, mester wak esaki haci tambe,” el bisa. “Si OM no tuma accion, nos democracia lo collapse for di paden.”

Tambe e lider di Par a dirigi su mes n e declaracion di e partido MFK, cual a publica un declaracion unda a pidi publico dune tempo pa maneha e topico internamente. Girigorie a yama e posicion aki “anti-democratico y peligroso.”

“E directiva di MFK no ta Ministerio Publico ni tampoco Parlamento,” el a bisa. “E no tin autoridad pa investiga acusacionnan criminal contra un minister. Esaki mester ser trata publicamente y transparentemente, no tras di porta cera.”

El a adverti cu permiti e partido controla e storia por converti esaki den otro “deramento silencioso di e berdad.”