Cu Corsou ni a laga su prome prome minister (como pais autonomo) scapa sentencia, esey ta un siñal importante cu nan a manda den Reino, segun lider di MEP Evelyn Wever- Croes. Bon Dia 24 a puntra su opinion riba e sentencia di ex prome minister Gerrit Schotte, condena awe na 3 aña den prizon pa corupcion, labamento di placa y falsificacion.
Sr. Schotte ta afilia na e partido Arubano den oposicion. Na comienso como miembro di MAN, e partido ruman di MEP. Despues como lider di MFK, cu sra. Croes ta cualifica como un ‘amigo politico’. ” MEP tin lasonan cu MAN na Corsou y Partido Demokrátiko Boneriano (PDB), como nos ta partidonan social democrata. Nos no ta afilia na MFK, pero ta considera nan amigo politico” E lider ta splica cu e lasonan politico ta riba nivel di comparti conocemento y duna sosten. Por ehempel durante eleccion na Boneiro sra. Croes a bay duna un simposio pe candidatonan femenino riba e lista di PDB. Y pronto e partidonan lo topa na e prome congreso di partidonan social democrata di e islanan ABC.
“Pero e lasonan no ta asina estrecho cu mi ta na haltura di tur cos cu ta andando den e partidonan. Sr. Schotte berdad a presenta ora di mi campaña electoral na 2013 y tambe na esun di Dangui (Oduber). Mi impresion di dje ta cu e ta un homber cu ta traha duro pa logra su metanan. Cu un drive hopi halto. Con e ta yega na su metanan, mi no sa, pero esaki mi no a spera niun momento.”
E lider di MEP ta bisa cu den su contacto cu sr. Schotte nunca el a haya un indicacion tampoco cu sr. Schotte tabata envolvi den cos manera a trece dilanti den corte. “Riba e pregunta si mi lo distancia mi mes di su persona, mi no por contesta esey ainda. Prome mi ta bay lesa e veredicto completo y warda con e caso ta sigui, pasobra nan tin 2 siman pa apela. Despues mi lo forma mi opinion.”
Sinembargo sra. Croes ta bisa cu e ta contento cu e veredicto. “El a duna mi e confiansa bek den husticia den nos Reino, den nos democracia. Cu no ta buchi juan so cu husticia ta persigui pero tambe personanan riba posicion halto. Aki na Aruba cosnan similar ta pasando. Mi no ta bisa cu mester persigui nan, pero si mester cuminsa investiga nan. Tin hopi cos pero Ministerio Publico no kier investiga nan. Spera cu e biento di curashi na Corsou lo yega Aruba pronto. Of manda e fiscal (di e caso di Schotte) pa Aruba.”
Por lesa e entrevista completo den Bon Dia Aruba.
