Minister di Finanzas, Asunto Economico y Sector Primario, mr. Geoffrey Wever (Futuro) ta anuncia cu dia 1 di januari 2026, e regulacion pa actividadnan di servicio nobo permiti den zona liber a drenta oficialmente na vigor. Cu esaki, Aruba ta tuma un paso strategico y bon calcula den fortalecemento di su modelo economico y su credibilidad internacional.

E regulacion nobo ta introduci un lista positivo di actividadnan di servicio cu por wordo eherce den zona liber, conforme cu e cambio di ley introduci na 2020 pa cumpli cu e standardnan internacional di e Organisacion for Economic Co-operation and Development (OECD). E lista positivo aki ta un instrumento di maneho economico moderno cu ta sigura claridad, transparencia y cumplimento estricto cu normanan internacional.

E seleccion di e actividadnan permiti a wordo haci cu gran cautela. E enfoke ta pa evita cualkier impacto negativo riba e ingreso di impuesto existente di Aruba cu ta cay bou di e tarifa normal di impuesto riba ganashi. Pa e motibo aki, e regulacion ta permiti solamente actividadnan cu no ta wordo ehecuta fisicamente na Aruba of cu ta wordo ehecuta na un grado masha limita, mientras cu nan ta beneficia di e tarifa reduci di impuesto riba ganashi di 2% den zona liber.

Cu introduccion di e lista positivo, Aruba ta posiciona su zona liber como un instrumento competitivo, confiabel y cu ta cumpli cu e standardnan internacional, cu ta atrae inversionistanan serio y empresanan innovativo, incluyendo start-ups, cu ta busca un teritorio legal stabiel, transparente y atractivo. E medida aki ta reforsa e clima di inversion y ta crea espacio pa crecemento economico duradero.

Na mes momento, e regulacion ta contribui directamente na diversificacion di e economia Arubano, ampliando e variedad di actividadnan economico y creando oportunidadnan nobo pa profesionalnan local. Esaki ta resulta den creacion di cuponan di trabou di nivel halto, fortalecemento di conocemento local y un aumento structural di entrada di impuesto, tanto for di empresanan nobo como for di e forsa laboral cu ta wordo activa.

Segun Minister Wever, e introduccion di e lista positivo ta mustra cu Aruba por combina disciplina fiscal, cumplimento internacional y ambicion economico den un solo cuadro di maneho coherente.

“Nos ta construi un economia cu ta resiliente, diversifica y prepara pa futuro, sin compromete e integridad di nos sistema fiscal,” Minister Wever a indica.

Cu e regulacion aki, Aruba ta confirma su compromiso cu bon gobernacion, cooperacion internacional y un desaroyo economico cu ta basa riba responsabilidad, vision y planificacion strategico integral.