(AP) – Filipinas y Lituania a firma un acuerdo pa crea un aliansa di seguridad, resultado di nan alarma mutuo tocante loke nan ta percibi como agresion creciente cu ta menasa nan region di parti di paisnan manera China.
E MoU firma dialuna na Manila pa Secretario di Defensa Filipino Gilberto Teodoro Jr. y su colega di Lituania Dovile Sakaliene, lo fomenta cooperacion di defensa particularmente den seguridad cibernetico, industria di defensa, produccion di municion, atende menasa y seguridad maritimo segun e Departamento di Defensa Nacional na Manila a comenta.
Sakaliene a describi Lituania su alarma tocante un “axis autoritario” surgiendo di Rusia, China, Korea di Norte y Iran, cual el a menciona tambe den un forum di defensa internacional na Singapur luna pasa. E aliansa aki mester keda confronta pa un respuesta di paisnan pro-democracia, segun el a expresa.
“Loke nos ta mira awo ta estadonan autoritario cu ta cooperando di manera hopi eficiente,” Sakaliene a bisa na un conferencia di prensa cu Teodoro. “Un di e pio resultadonan ta e cooperacion pa Ucrania.”
“Nan accion hunto ta menasando e mundo liber, y ta menasando e democracia den e mundo aki y nos no tin e luho di permiti esaki keda destrui,” el a agrega.
Oficialnan Chines no a duna comentario tocante e remarcanan aki.
Sakaliene a cita China su accionnan contra Taiwan y e piscadonan Filipino den e area disputa South China Sea, cual Beijing a bisa ta pertenece na dje den su totalidad. Filipinas, Vietnam, Malaysia, Taiwan y Brunei tambe ta involucra den pelea teritorial sinembargo confrontacion entre Warda Costa Chines y Filiipino y forsanan naval particularmente a aumenta den añanan recien.
China a usa varios maniobra peligroso contra barconan di gobierno Filipino y barconan di pesca Filipino, acusando nan di drenta e teritorio cu nan ta bisa ta di Beijing for di temponan anciano. El a rechasa y sigui desafia un decision arbitrario di 2016 basa riba 1982 U.N Convention on the Law of the Sea, unda a invalida China su declaracionnan historico.
Filipinas a adopta un strategia di bergonsa China pa medio di documenta Beijing su accionnan den e awanan bao disputa, un ruta clave pa mercado global, pa genera sosten internacional.
“Nos ta mira e materialnan hororoso aki, videonan di con nan ta tratando piscadonan Filipino, con nan ta tratando hende cu simplemente ta trahando den nan propio awa, nan propio teritorio,” Sakaliene a bisa. “Si nan traha hunto pa menasa nos, e ora nos mester traha hunto pa defende nos mes.”
Teodoro a cita e necesidad di “resisti cualkier intento unilateral pa crea of cambia ley maritimo y e orden internacional pa beneficia e podernan nobo cu kier domina mundo riba lomba di nacionnan mas chikito.”
E acuerdo cu Lituana ta parti di Presidente Filipino Ferdinand Marcos su esfuerso pa crea un arco di aliansanan di seguridad na Asia cu paisnan occidental, ademas di Manila su acuerdo di aliansa cu Washington, pa impulsa e pais su defensa teritorial de bista di accion Chino na South China Sea.
