Sra. Delia Josefina Ortiz den nomber di su famia a traha un carta habri caminda nan kier informa henter nos comunidad cu nan lo dicidi di laga tur cos den man di husticia divino. Y tambe den man di loke ainda autoridadnan local lo por haci pa trece claridad riba e caso di morto di su yiu stima Mia Bencosme Ortiz. E carta habri ta bisa como lo siguiente:
Ainda famia Bencosme Ortiz tin duda y nan lo continua cu e dudanan aki, ya cu e escena unda nos yiu muhe a wordo haya morto no ta cla. Pero Mia cu ta esun cu sa kico berdaderamente a sosode… no t’ey mas. E echo aki ta uno duro y doloroso pa nos durante henter un siman. Nos ta sinti nos mes cansa, no solamente nos famia aki na Aruba, pero nos famia na Republica Dominicana tambe.
P’esey nos a dicidi cu nos ta bay crema e curpa di nos ser stima, Mia. Nos ta bay confia den e evaluacion forence cu a wordo haci na Aruba. Si ta existi algun culpabel, y si berdaderamente e caso di Mia no ta un suicidio, Dios ta bay yuda nos pa aclaria. Pero nos famia no por keda sigui cu e situacion doloroso aki, sin cu ni sikiera nos por a dispone di e curpa di Mia. Sin cu ainda no nos por haci un acto di entiero.
Pa tal motibo nos a tuma e decision aki pa e dolor y e costo cu e situacion aki a ocasiona pa nos. E echo cu nos a tene e curpa di Mia na Aruba y awor nos lo transporta su restonan mortal pa Santo Domingo, nos a dicidi di crema su curpa y bay cu su shinishi na e Republica Dominicana. Y si berdaderamente lo bin un caso, nos lo continua esaki den futuro. Pero actualmente nos ta considera cu mas dolor ta produci mas dolor so.
Si Mia no a comete suicidio Dios lo bay yuda nos pa descubri e berdad. Nos tin nos dudanan, pero nos no tin nada cu lo por aclaria nos dudanan, mas cu e Fe cu nos ta mantene den Dios. Nos kier bisa cu si den henter e proceso aki ta resulta cu nos ser keri Mia a comete suicidio, nos ta pidi pordon na Dios pe.
Nos ta pidi tur hende nan comprension cu nos. Esaki ta un echo realmente doloroso. Pa tal motibo nos a dicidi di no haci niun acto di condolencia y tampoco niun acto di entiero na Aruba, pa e echo con tur cos a sosode rond di e caso di nos Mia stima. Nos ta expresa nos palabra di danki na tur hende cu a sostene nos den nos dolor y den nos lucha pa un investigacion mas profundo lo por a tuma luga. Specialmente nos ta gradici prensa di Aruba en general cu semper a sostene nos pa tur e situacion cu nos a pasa aden, y pa tur cos cu nos a yega di expresa.
Si no ta asina cu Mia a comete suicidio, Dios lo bay yuda nos pa haya e porta pa descubri e berdad. Nos ta gradici e tempo cu nos a yega di biba cu Mia. Nan tabata 20 aña di locual e ultimo dos aña, el a dicidi di biba su so cu su partner. Nos a respeta su bida personal. Pero prome cu esey nos tabatin e placer di por a comparti y stima Mia. Nos como famia ta totalmente kibra, y nos ta pidi disculpa na Mia su amigonan pasobra nos no tin forsa pa comparti cu niun hende nos dolor debi na e situacion cu nos ta pasando aden.
