Lo habri Stadion Guillermo Prospero Trinidad pa weganan di futbol pero lo cera back despues pa no stroba acreditacion di e atletiekbaan

Recientemente minister di Deporte Gerlien Croes a duna un actualisacion relaciona cu e proyecto di renobacion andando na Stadion Guillermo Prospero Trinidad. Despues di algun siman cu a tuma pa haci un inventarisacion, a logra sali na cla kico ta e situacion actual y tambe a anuncia cu lo habri e stadion pa algun wega di futbol.

E mandatario a splica cu despues cu gobierno a haci su entrada no tabatin informacion di kico tabata e desaroyonan specifico cu detayes di e proyecto y inversion cu tabata ser haci na Stadion Guillermo Prospero Trinidad.

El a indica cu na cierto momento como minister e mester a tuma e decision pa tuma e rienda back di e facilidad y a haci peticion pa entrega di tur e yabinan di e edificio. Alabes a haci cierto cambionan y a apunta e momento ey un projectleider.

El a sigui splica cu te unda tabata ser bisa na su persona, pa dos aña y mey e proyecto no tabatin un projectleider. Esnan cu e tabata ser referi na dje tabata laba man y tabata indica cu nan sa a informacion di e proyecto pero no tabata projectleider.

Aworaki cu gobierno a tuma e facilidad back den nan man a apunta un projectleider oficialmente. El a indica cu e persona aki ta un ingeniero profesional y a bay haci su inventarisacion di e proyecto.

Minister Croes a remarca cu un di e retonan grandi cu tabatin cu e proyecto aki tabata cu tabatin hopi contratista y cada un a haci un trabou los. E no tabata un proyecto cu a ser carga door di un solo compania cu awor por bisa facilmente e compania ta entrega tur loke el a haci y esey ta cla.

“Parti di construccion a ser entrega door di un compania, luznan a ser haci door di otro dos compania, e turf a ser haci door di un compania, e baan a ser haci door di un otro compania y fuera di esey tabatin contratista chikito haciendo varios trabou. E tabata un inventarisacion basta grandi cu mester ser haci y nos ta kere nos ta casi cla pa locual ta inventarisa tur e trabounan,” e mandatario enfatisa.

El a agrega cu na caminda cu e inventarisacion a identifica cu e parti di futbol ta hopi mas desaroya, cu e parti di atletismo.

El a splica cu pa loke ta e construccion di e edificio, na e momento aki esaki ta practicamente cla, pero falta algun cos, por ehempel tin bañonan cu no a ser renoba den e proyecto, y e gym no a ser renoba. Segun e mandatario esey ta cosnan cu por ser haci ainda y no tin e urgencia pa keda cla awor.

El a menciona tambe cu pa loke ta e tribuna band’i panort, a verf e tribuna, pero e parti di ingenieria mes locual ta beton di e tribuna, no ta den estado y mester drecha esaki, pues no lo por haci uso di e tribuna aki pasobra e no a ser renoba completamente y e ta hopi riesgoso pa hende haci uso di dje.

Minister Croes a sigui splica cu pa loke ta e aspecto deportivo, e parti di construccion nan lo bay atende cune poco poco. El a indica cu e turf di futbol ser instala, y a haya contacto cu e compania cu a haci e instalacion y nan a logra papia cu nan tocante kico ta e mantencion cu mester haci pasobra ta importante na momento tin un proyecto pa ta na altura con lo mester mantene esaki.

El a agrega cu e luznan di e veld tambe ta practicamente cla, solamente tin algun trabou chikito cu mester ser haci eventualmente, pero pa cu futbol e luznan por ser usa.

Pero pa loke ta trata e parti di atletismo, e mandatario a remarca cu esey si falta ainda varios trabou. El a splica cu e atletiekbaan a ser instala, pero e posicionnan di start tin ahustenan cu mester ser haci, tambe tin algun material cu no t’ey, y e santo cu atletismo tin mester wak na cual pais por pidi esaki.

“Tin varios cos cu no ta cla y nos tin cu purba toch tene cuenta cu a haci inversion como pais, den e caso aki Lotto pa Deporte a haci varios inversion. E proyecto aki nan a calcula un suma cu aworaki ta hopi mas cu dobel di e suma aki, por lo menos cuater pa cinco miyon extra cu practicamente tin indicacion cu Lotto a carga. E ta un proyecto hopi costoso y mester garantisa tambe cu e acreditacionnan ta debido di e trabou cu ta ser haci,” minister Croes a subraya

Relaciona cu e parti di futbol, e el a splica cu tin un acreditacion caba. El a indica cu si a cumpli cu cierto otro rekisito, por ehempel camber di referee y baño, por a haci e acreditacion mas amplio, pero e veld mes ta acredita pa ser usa.

Di otro banda e parti di atletismo ainda no ta asina leu. E mandatario a enfatisa cu nan no kier daña proceso di un posibel acreditacion di e atletiekbaan. Pa e motibo ey a nan tuma contacto cu e compania cu a entrega e atletiekbaan, nan a combersa cu nan, y nan a informa cu haci uso di e baan manera cu e ta aworaki ta haci e posibilidad di esaki ser acredita hopi chikito.

El a informa cu alabes tin un otro desaroyo pa cu futbol. Segun el a splica tabatin compromiso cu a ser haci basta siman atras pa weganan internacional tuma luga na Aruba den e Stadion Guillermo Prospero Trinidad.

Esey, minister Croes a splica, tabata prome cu full e proceso cu no tabatin e overdracht debido. El a splica cu esey ta nifica cu si Aruba no cumpli cu e palabracionnan aki e no ta laga Aruba den bon standing cu Fifa.

Den e contexto nan a cuminsa considera kico por haci y nan a tene combersacion hopi largo cu AVB y e clubnan cu tambe tabata presente, y a ser indica cu si laga e dos weganan internacional tuma luga, no ta husto tampoco cu e final local mes no ta tuma luga akiden.

“Cu hopi consideracion, pasobra nos sa cu tin weganan cu ta tumando luga na e momentonan aki, cu un excepcion ta laga e wega di dia 7, dia 10 y ultimo dos wega di playoff y e final dia 21 di juni tuma luga, pero tambe den palabracion cu atletismo pa no stroba e trabounan cu mester tuma luga den stadion, nos lo cera stadion back dia 22 di juni,” minister Croes a informa.

El a indica cu durante proximo 10 dia trabou pa atletismo ta bay ser intensifica pa wak con mas lihe por keda cla cu locual mester keda cla cune y e ora ey ta laga e weganan entre 7 y 21 di juni tuma luga, y despues lo cera stadion back y ta sigui cu e trabou “pasobra atletismo tambe tin e derecho pa bin back aki den mas lihe posibel,” el a bisa.

E mandatario a splica cu ta un situacion un poco fastioso cu e desaroyo di e atletiekbaan y e turf di futbol no a bay mesun lihe, y hunto, locual ta nifica cu mester tuma cierto decision y den consideracion pa garantisa eventualmente cu e atletiekbaan tambe por ser acredita pa atletismo.

“Mester haci e sacrificio aki pa un par di siman mas y ta spera cu mas pronto posibel atletismo por cuminsa tambe haci uso di e facilidad manera debe ser. E ta un escogencia cu nos tin cu haci. Di otro banda bo kier cumpli cu tur hende, pero nos tin cu wak tambe riba termino largo kico ta mas miho pa nos haci y kico ta mas conveniente pa locual ta garantisa e facilidad aki a largo termino pa Aruba y pa deporte na Aruba,” e mandatario a enfatisa.