Lo inicia otro parti di Campaña “Let’s Rise Together, Let’s Thrive Together”

Diasabra 29 di November na Scol di Arte 9 or di mainta, Sunrise City Coconut Collective ta inicia un otro parti di nan Campaña “Let’s Rise Together, Let’s Thrive Together”.

E campaña pa concientisa nos comunidad, ta pa empodera residentenan di San Nicolas, y ta wordo organisa rond di tres pilar principal: Auto-Suficiencia, Desaroyo Comunitario, y Educacion Financiero.

Door di pone conocemento, hermentnan y recursonan na disposicion di e comunidad, e campaña ta desea di stimula orguyo, participacion y empoderamento, promove sostenibilidad y auto-suficiencia den nos bario.

Cu e workshop jama “Re-Rise: Recycle and Upcycle Workshop”, SC3 ta lansa e segundo y tercer pilar di e campaña, cu ta Auto-Suficiencia y Desaroyo Comunitario.

SC3 ta desea pa nos comunidad cuminsa of sigui e combersacion den nos famianan y hogarnan rond di e tema di sostenibilidad.

Nos tur a ripara un aumento drastico den e cantidad y manera cu nos ta deshasi di sushi. Maske cu gobiernonan por bini cu diferente proyecto, ta importante pa nos como comunidad educa nos mes y cuminsa hasi uzo di e oportunidadnan cu tin pa recycla (entre otro).

E continuacion di e workshop aki lo ta e prome edicion di “San Nicolas Clean up day” cu lo ta dia 6 di December caminda nos ta sugeri pa famianan, bisiñanan, negoshinan y organizacionan bini hunto pa hasi limpi rond di nan casnan of lugarnan di trabow. Si cada grupo hasi esaki den nan area nos lo sigui hasi un impacto den nos districto stima.

Re-Rise: Recycle & Upcycle Workshop lo tin presentashon di diferente oradornan y facilitadornan pa e break-out sessions, entre otro:

Dae Hereira (Zero Waste Aruba)

Maureen Blijden (Fashion Upcycling)

Anand Sueman (Upcycle pallet: baki pa mata, entre otro)

Beach Plastic Party (Recycle Plastic)

Rhyan Frigerio (Compost cu cuminda)

Alexis Kartodikromo (Aruflamingo Art)

E workshop aki ta pa henter famia y por registra pa participa na un mainta informativo, educacional y creativo via e link aki: https://forms.gle/P3on2PS7Fj1Ltkc86

Nos comunidad ta invita pa tuma parti na e varios actividadnan cu nos lo sigui lansa, incluyendo workshopnan cu tema di sostenibilidad, maneho di finansa, mehoramento di bario y pa finalisa e aña nos lo tene un San Nicolas Clean Up Day dia 6 di December. Pa mas informacion, bishita nos red social @SC3Aruba of manda un email na sc3.Aruba@gmail.com.