Den un rueda di prensa siman pasa, ministro encarga cu finanzas publico a reacciona fuerte riba e comentario cu e colegio di supervision CAft a duna riba e presupuesto aproba pa 2022. Manera por a anticipa, opinion di e mandatario riba esaki no tabata di elogio, al contrario.

Pero kico exactamente ta loke CAft a trece dilanti? Pa mayor claridad den esaki, nos ta trece for di e carta di CAft na gobierno, textualmente e puntonan cu CAft mes a pone bao di otro:

“CAft ta di opinion cu tanto e presupuesto como e presupuesto multi-anual ta cumpli di forma insuficiente cu e normanan di articulo 14 di ‘LAft’ (ley Arubano di supervision financiero; red.) y e protocol y ta conseha Aruba pa adapta e presupuesto.

Por lo tanto CAft ta duna bo, a base di articulo 11, inciso 2 y inciso 3 di LAft, e siguiente recomendacionnan:

1. Adapta e gastonan presupuesta pa bienes y servicios cu por lo menos AWG 39 miyon menos, asina cu e gastonan di bienes y servicios lo ta na nivel di e periodo pre-corona.

2. Obliga Serlimar resolve e obstaculonan encuanto imposicion y cobranza y laga e obligacion cay di compensa e deficitnan di Serlimar. E aporte financiero adicional di AWG 3 miyon mester ser saca di presupuesto.

3. Mantene e recorte di 12,6 porciento riba e condicionnan laboral te ora Conseho di Gobierno di Reino (RMR) lo a dicidi riba esaki y kita e stelpostnan den gasto di personal y di subsidio di respectivamente AWG 11 miyon y AWG 8 miyon.

4. Limita e gastonan di personal na 2022 te maximo AWG 417 miyon pa asina cumpli cu e norma pa gasto di personal di e protocol.

5. Compensa e anterior reduccion di loonbelasting di AWG 15 miyon, cu un aumento di impuesto o reduccion di gasto, ambos structural.

6. Mehora e compliance di tal manera cu e adaptacion disminuyente di entrada di belasting cu AWG 20 miyon, compara cu e proyecto di ley di Presupuesto, ta keda elimina.

7. Indica na ki momento lo introduci medida den cuido (di salud), splica den e presupuesto cual perdida di economizacion lo ta anticipa pa AZV pa e aña aki y cual medidanan compensatorio lo ser tuma dentro di e budget di cuido.

8. Evita e institucion di un fondo presupuestario separa pa, entre otro, e compensacion di e ‘eigen bijdrage’ di casonan mas conmovedor.

9. Fundamenta cu argumento e inversion di AWG 16 miyon pa RWZI y incorpora e costonan di renobacion di Beatrixschool (AWG 4 miyon) como onversion riba kapitaaldienst.

10. Adapta e presupuesto multi-anual di tal manera cu esaki desde 2023 lo mustra saldonan di financiamento positivo en conformidad cu LAft y e protocol, y ta duna contenido na e obligacion legal pa compensa deficit manera ta stipula den articulo 17 inciso 3 di LAft.

11. Incorpora, den linea cu e crecemento economico anticipa, den e presupuesto multi-anual e recuperacion completo di e entradanan di belasting y provee esaki di un splicacion.

12. Sustenta cu ilustracion e beneficionan extra anual di AWG 160 miyon di e introduccion di BTW na 2023. Indica tambe di ki manera compensacion lo tuma lugar.

13. Incorpora e suma restante di maximo AWG 78 miyon na subsidio di salario cu mester cobra back desde 2023 den e presupuesto multi-anual.

CAft den su reaccion extenso tambe ta bisa pakico a yega na e serie di recomendacion aki:

“CAft ta constata cu cierto di e recomendacionnan ariba menciona ta ser haci desde 2019 caba y no ta cumpli cu nan, o no suficientemente. Tambe no ta duna contenido, o no suficientemente na decisionnan di RMR. A traves di no sigui e recomendacion y decisionnan, e Pais ta laga posibilidad pa mehoracion di finanzas publico sin usa. CAft ta urgi cumplimento cu su consehonan y ta pidi pa, a base di articulo 11 inciso 4 di LAft, pa dentro di 14 dia, pues pa mas tarda dia 24 di mei proximo, indica te unda y di cual manera lo tene cuenta cu e recomendacionnan inclui den e conseho aki. CAft seguidamente, a base di bo reaccion, determina si un continuacion di e procedimento, manera describi den articulo 11 y articulo 12 di LAft, ta ser considera necesario.”

E articulonan 11 y 12 di LAft na cual CAft ta referi, ta encera e proceso cu ta sigui despues di cu CAft a duna su conseho na gobierno di Aruba, pa adapta cierto aspecto di e presupuesto aproba. Si e reaccion di gobierno, den cual mester splica con y te unda lo cumpli cu e recomendacionnan di CAft, no ta satisface e organismo aki, e promer paso ta pa informa conseho di ministro, a traves di e ministro di finanzas, y Staten.

Siete dia despues di a manda e documento di CAft, si ainda segun CAft tin ainda un presupuesto aproba, o un ley di cambio di presupuesto, cu no ta cumpli segun CAft cu e normanan di articulo 14, CAft ta informa RMR di e situacion. E notificacion aki por bay acompaña pa un conseho, motiva, pa duna un ‘aanwijzing’ (instruccion) na gobierno di Aruba.

Pa comentario di Bon Dia Aruba, nos ta referi na e Editorial di awe.