Recientemente Parlamento di Aruba a trata y aproba Cuenta Anual 2019 di Pais Aruba, cu a ser presenta na Parlamento na 2024. Aunke e cuenta anual ta mustra un mehoracion notabel bruto di explotacion y stabilisacion di debe nacional, e investigacion di Algemene Rekenkamer Aruba, publica na januari 2025, ta pinta otro panorama: atraso administrativo serio, sobrepaso ilegal di presupuesto y deficiencia estructural den sistema financiero ta pone na riesgo e meta pa logra un cuenta anual totalmente controlabel pa 2026.

Gobierno di Aruba a confronta retrasonan recurente den presentacion di su cuentanan anual, un proceso esencial pa garantisa transparencia y responsabilisacion fiscal. E retrasonan aki hopi biaha ta mara na obstaculonan administrativo, reportahe financiero incompleto di varios departamento, y e tarea compleho di consolida gastonan di sector publico. Como resultado, e entrega di cuentanan audita na instancianan di supervision ta ser posponi, afectando evaluacion na tempo di e posicion financiero di e pais.

Segun e datonan presenta den e Cuenta Anual, 2019 a resulta den un mehoracion fuerte den saldo bruto di explotacion. Cifranan ta indica cu e saldo bruto di explotacion 2019 a yega na Afl. -1.365,5 miyon, compara cu Afl. -1.582 miyon den 2018, un mehoracion substancial den desempeño financiero di e Pais, cual tabata posibel door di e crecemento di economia cu mas o menos 3.7%, mas halto cu e prome expectativa, aumentando ingreso y stabilisando un parti di gasto.

Ingresonan tabata mas fuerte, mientras cu gastonan —specialmente gasto di personal y material— a keda mas bou di esnan presupuesta. Un factor importante den e mehoracion tabata e reduccion di perdida riba cuentanan dudoso (Afl. 6.2 miyon) y un control den gasto externo cu no a crece manera aña anterior. Pero algun presion a keda presente, particular den gasto di salud y pago di compensacionnan legal, cu tabata un parti grandi di gasto permanente di e gobierno.

E documento ta mustra cu den fin di 2019, e debe nacional a alcansa Afl. 4.318 miyon, un nivel un tiki mas abou cu 2018, door di un combinacion di refinanciamento y demanda financiero controla. Data ta indica cu tin varios bonus gubernamental cu ta vence entre 2021 y 2034, cu tasa di interes cu ta varia entre 5% y 6.25%. Esaki ta afirma un carga di interes considerable pa futuro, a pesar cu e debe mes ta stabilisa.

E documento ta mustra cu gasto total di interes pa 2019 tabata Afl. 223.4 miyon, un cifra cu a keda absorbe un gran parti di ingreso di gobierno. Realidadnan manera adicion di prestamonan nobo (Afl. 29 miyon) y vencemento di interes bieu (Afl. 20.2 miyon) a sigui crea volatilidad den gasto total. Aunke stabiel, e carga di interes a limita capacidad di gobierno pa inverti den infrastructura y desaroyo sostenible.

Segun e cuenta anual, Aruba tabata obliga na meta presupuestario firma den un protocol cu Hulanda (2019–2021). E meta tabata pa logra ekilibrio fiscal, combati gasto no-rentabel y logra surplus den 2018–2021. Aunke Aruba a logra un parti di esaki, ARA a conclui cu cumplimento no tabata completo.

Medidanan manera control mas estricto den gasto ministerial, gestiona debe cu proveedornan y limitacion den aumento di nomina tabata implementa, pero no tabata suficiente pa elimina deficit structural.

E investigacion di ARA a amplia e marco financiero cu a ser presenta den e Cuenta Anual 2019. ARA, den cumplimento cu su rol constitucional, a investiga si e presupuesto 2019 tabata ehecuta segun ley y reglanan financiero-administrativo. Su conclusionnan tabata severo.

ARA ta indica cu Cuenta Anual 2019 a perde gran parti di su relevancia, pues a ser entrega cuatro aña despues. Parlamento no tabata dispone di informacion actualisa pa tuma decisionnan vital. Esaki a compromete transparencia y control democratico.

ARA a indica tambe cu e ley actual no ta suficiente pa logra un cuenta anual controlabel, y cu atraso y deficiencia administrativo tin impacto na posibilidad pa logra un cuenta anual totalmente verificabel pa 2026.

Adicionalmente ARA a alerta cu gastonan ta sobrepasa presupuesto sin autorisacion previo di Parlamento, un situacion cu viola Ley di Comptabilidad 1989. E ta menciona como ehempel e pago anual di miyones na Post Aruba N.V., Arubus N.V. y Serlimar — pago cu a tuma luga sin base legal material, a pesar cu tin un partida pa esaki den presupuesto.

ARA tambe ta indica cu e falta di un enfoke integral pa elimina deficit administrativo a pone Aruba atras den su ruta pa un cuenta anual controlabel. Pero e meta aki no ta parce realisabel mas mirando cu no a sanea cuentanan di balans importante. Ademas falta pa stipula e base pa e opinion final di un accountant (interno).

Algemene Rekenkamer ta adverti cu metodonan administrativo no ta uniforme, y e Cuenta Anual 2019 falta transparencia. Segun ARA e proceso di saneamento administrativo no ta presenta claramente den e documento. Esaki a resulta den Afl. 116.1 miyon di aumento den resultado financiero negativo acumulativo, excluyendo e deficit di 2019 mes.

E critica mas fuerte di e organo ta cu presion pa cumpli cu normanan presupuestario (specialmente den marco di Landspakket) a dirigi atencion mas riba apariencia di cifra cu riba solucion di e causa real di deficiencia administrativo.

Den su rapport di investigacion ARA a presenta un serie di recomendacion concreto: cera e ciclo presupuestario na tempo y entrega cuenta anual sin retraso; corigi resultado financiero 2018 y trata cuentanan anual manera un documento continuo; adopta regla pa controla cuenta anual, cu transparencia y responsabilisacion como enfoke central; defini e concepto “doeluitkering” na ley nobo di comptabilidad; tuma medidanan pa elimina deficiencia administrativo den sistema actual; y priorisa contratacion y retencion di personal cualifica, particularmente na Departamento di Finanzas.

Minister di Finanzas e tempo ey, Xiomara Maduro, a duna un reaccion riba e rapport di ARA den cual el a indica cu e ta sigui reconoce e importancia di transparencia, pero no ta di acuerdo cu algun conclusion cu ARA a tuma.

E minister a enfatisa cu impacto di pandemia COVID-19 no por ser subestima; cu maneho financiero ta mustra mehoracion; y cu e ta dispuesto tuma recomendacionnan na pecho, pero pa implementa nan riba termino corto ta limita. Ademas el a agrega cu mehoracion den sistema di reportahe lo tuma su tempo natural.

E documento di Cuenta Anual 2019 ta subraya cu atraso historico den contabilidad gubernamental tin origen den cuentanan di 2016 y 2017 cu nunca a cera na manera completo. Un “upgrade” di sistema GFIS/EnterpriseOne na 2023 a yuda soluciona un parti di e eror acumulativo, pero no total.

Algemene Rekenkamer Aruba a conclui den su rapport di investigacion cu esaki ta demostra necesidad di un reforma profundo y rapides riba nivel administrativo y operativo.

Den su rapport ARA a gradici e minister di e tempo ey pa su reaccion pero ta reafirma su punto central: sin un sistema administrativo fuerte, sin personal cualifica, sin regla claro y sin transparencia profundo, Aruba no por logra stabilidad financiero ni un cuenta anual totalmente controlabel.

E rapport ta pone enfasis cu gobernacion financiero ta e base di un pais solido. Y cu sin solucion structural, progreso financiero por bira pasahero y fragil