Despues cu gobierno diabierna pasa a anuncia mainta tempran caba cu a yega na un acuerdo cu Hulanda y cu a aproba e siguiente prestamo, a bin resulta den curso di dia cu esey ta informacion eroneo. Berdad ta cu tur tres ministro plenipotencario a pidi mas tempo pa consulta cu nan gobierno, resultando den e acuerdo pa yega na decision definitivo den Conseho di Ministro di Reino.

Gobierno di Aruba riba su turno a laga sa cu nan a bay di acuerdo caba cu e condicionnan stipula pa gobierno Hulandes y cu por lo tanto ta sigur cu diaraNson venidero lo tin aprobacion.

For di e documento cu tabatin riba mesa durante reunion di Conseho di ministro di Reino por destila cu e condicionnan ta bay un poco mas leu cu loke gobierno di Aruba a duna di conoce diabierna pasa. Por ehemplo, e medidanan di austeridad riba salario ta inicia 1 di juli 2020, pero “pa tempo indefini”. Esaki pa salario di tur empleado den sector publico y semi-publico y tambe den tur entidad di cual mas di 50% ta procedente di gobierno.

Medida di 25% riba salario no ta temporal.
E ley cu parlamento a caba di aproba encuanto e salarionan di parlamentario, ta contempla un austerisacion durante 2020 so, ya cu e ley ta bisa di ta na vigor te cu 31 di december 2020. E ta contempla pago di 81/3% di e salario bruto mensual vakantieuitkering, conta desde juli 2019 te cu juni 2020, cu ta 100% di e vakantieuitkering a base anual. Ademas 162/3% riba e salario como “medida temporal” cu ta core ta cu fin di 2020 pa e stipulacion menciona te cu fin di e aña aki. E acuerdo cu Hulanda por haci cu lo mester bolbe cambia e ley aproba desde algun dia, pa cumpli cu loke ta condicion fiho pa haya prestamo di Hulanda.

Esaki pasobra e acuerdo cu Hulanda ta stipula austerisa 25% riba e “totale pakket arbeidsvoorwaarden” di parlamentario y ministro. “Esaki riba base anual y entrante 1 di juli 2020 y vigente te proximo aviso”, e texto di e documento di RMR ta bisa.

Tambe e acuerdo cu Hulanda ta stipula cu un austerisacion di 12,5% ta concerni e total di beneficio di un persona cu ta empleado publico, empleado di entidad semi-publico incluyendo empresa estatal y fundacion y demas institucion cu ta financia pa por lo menos 50% for di presupuesto di gobierno. Esaki tambe “riba base anual”, cu un minimo igual na salario minimo legal y tambe vigente desde 1 di juli 2020, tambe “tot nader order”. Aki tampoco por aplica indexering, tambe “tot nader order”.

Pa loke ta e categoria di funcionario halto den sector (semi-)publico, incluyendo empresa estatl y fundacion y demas institucion financia pa por lo menos 50% for di presupuesto di gobierno, salario ta keda limita te maximo di 130% di e salario “nobo norma” di e ministro presidente di e pais, incluyendo un maximalisacion igual di e condicionnan secundario di trabao) y cu un efecto similar pa loke ta tarifanan di consultant. “Medida ta conta tambe pa contratonan laboral existente.”

Nota di redaccion:

Por mira cu, mientras e exigencianan di Hulanda diabierna pasa mainta tabata indica un austerisacion pa tempo indefini, ainda cu unanimidad parlamento di Aruba ta pasa ley temporal te fin di aña. E pregunta ta si tin coordinacion entre gobierno y parlamento, o cu cada un ta haci loke ta parce nan lo corecto pa haci.

LEAVE A REPLY

Please enter your comment!
Please enter your name here