Ayera tardi, Luis Villegas a defende personalmente su caso cu e mes a entabla contra DIMAS. Pa añanan e hoben aki ta hibando un lucha contra burocracia den e departamento aki cu a stroba su persona pa tramita cabalmente su peticion di naturalisacion.
Villegas, den su defensa dilanti mesa berde, a relata cu ainda e ta wardando un solucion di DIMAS pa un permiso cu nan tin un tempo ta bin priminti cu nan lo bay duna su persona bek. Aunke den pasado (2016) a bay den apelacion y comision di apelacion LAR a dicidi di mantene e negacion, LAR a comenta cu, si Villegas entrega un declaracion cu ta prueba cu el a bay scol e aña ey, DIMAS lo por otorga e permiso ainda retroactivamente. For di 2017, DIMAS ta bisando cu nan ta bezig cune, pero te dia di awe DIMAS no a haci nada, el a laga sa na Bon Dia Aruba.
Ta asina cu Villegas, kende tin plan di sigui su estudio superior na Hulanda, a pidi un ‘voorlopige voorziening’ na Hues. Esta mirando cu Hulanda a nenga su peticion pa naturalisa pa via di e buraco presenta durante e tempo cu el a bin Aruba cu 3 aña, hunto cu su mayornan. Kier men Villegas a wordo lanta y educa na Aruba mes.
Despues cu DIMAS -segun Villegas- a priminti cu nan lo a bay drecha e buraco prome cu Hulanda dicidi riba nan peticion di naturalisacion, el a pidi e ‘voorlopige voorziening’ pa preveni cu despues cu el a apela, Hulanda ta bolbe nenga su peticion di naturalisacion.
Despues cu Hues a scucha ambos partido, diabierna awor e lo tuma su decision. DIMAS mientrastanto a menciona cu lo ta dispuesto pa haci algo pa asina e hoben porfin por naturalisa. Villegas a bay Corte compaña pa famia y amigonan cu a dune tur sorto di sosten den e proceso largo aki cu a stroba su proceso di desaroyo personal y educativo.
