Na Aruba, manera ta conoci, hopi mucha ta sufri di diferente tipo di abuso tanto fisico como emocional. Tambe tin algun di nan cu ta sufri di abuso sexual. Ta importante pa para keto durante e luna aki y sigui enfoca riba prevencion.
Durante e luna di april, comunidad tin e oportunidad di compromete nan mes pa preveni cualkier forma di abuso di mucha. Estado, Gobierno, scol, misa y tambe gruponan religioso mester haci nan parti, cada persona por aporta den e tarea di prevencion.
E manera pa por haci esaki ta pa involucra mas den esfuersonan di prevencion basa den comunidad, busca informacion tocante con pa preveni abuso y mantene e muchanan mas sigur. Un ehemplo di esaki ta e diferente fundacionnan, como Fundacion Respeta Mi, Fundacion pa Nos Muchanan of Fundacion Mi Voz ta Bo Voz.
Mayornan mester proteha nan mesun yiu. Tambe por apoya esnan cu ta bira victima di abuso infantil, crea mas empatia, siña otronan tocante prevencion di abuso di mucha y reporta cualkier sospecha di abuso infantil.
Den ultimo aña, e topico aki a bin dilanti un poco mas door di kibra e taboo cu tabata existi. No ta nifica cu ta existi mas caso di abuso, sino cu e victimanan ta papiando riba nan situacion, manera Fundacion Mi Voz Ta Bo Voz a señala par di dia pasa den un conferencia di prensa.
P’esey ta importante pa sigui enfoca riba prevencion y papia cu muchanan pa por tuma e medidanan necesario na momento cu algo por sucede.
