Luznan den shelo ta causa curiosidad riba red social

Diahuebs anochi algun ciudadano y turista a tuma nota di algun obheto cu a pasa bay riba shelonan di Aruba durante oranan di anochi. Hopi a subi red social preocupa y tabata puntra kico esaki lo por ta.

Segun por mira den un video publica riba Facebook, e obhetonan pasando riba Aruba tabata cla y tabata biaha den grupo—por a observa sikiera 10 pa 15 obheto cla ta bulando den shelo.

Hopi usuario a comenta cu e luznan aki por ta debi na escombronan di un raket di Starlink cu a kibra y cay. Segun medionan di comunicacion internacional, varios pais incluyendo Canada y hasta Irlanda ta mirando escombro di Starlink—algun medio te hasta enfatisando cu esaki ta sucediendo casi tur dia den luna di october. Diahuebs BBC a reporta cu na Irlanda a mira e escombro aki cay, unda a reporta cu expertonan ta splica cu esaki ta probablemente restonan di e raket Falcon 9 di Space X cu a ser lansa diaranson na Florida.

Aunke caida di escombro di Space X ta mustra hopi similar na e luznan cu a mira diahuebs riba Aruba, algun usuario riba Facebook ta nenga cu e raket ta e fuente di e luznan. Segun algun usuario ta comenta, escombro di Space X sa tin un rabo di luz cu ta keda visible pa varios minuut—al contrario cu e luznan observa riba Aruba. Na otro banda, hopi ta bisa cu e por ta escombro, aunke si for di satelitenan bieu cu ta cayendo for di orbito. Te ciere di edicion aki, Space X mes no a confirma caida di escombro den region di Caribe.

Otronan ta specula cu e luznan por ta un indicacion di ehercicio militar for di e ehercito Mericano. Aunke Bon Dia Aruba no por a verifica e informacion aki, The Wall Street Journal a reporta cu e administracion di Trump a identifica blanconan den Venezuela, incluyendo facilidadnan militar supuestamente usa pa trafica droga. Mientras a enfatisa cu e presidente no a tuma un decision conclusivo ainda pa lansa atake, reportahe di e medio ta bisa cu oficialnan a indica cu cualkier campaña di atake aereo lo enfoca riba sitionan cu ta conecta e regimen di presidente Venezolano Nicolás Maduro y e rednan narcotraficante di e pais.