Presidente di Venezuela, Nicolas Maduro, a celebra cu presidente saliente di gobierno di Merca, Barack Obama, a duna pordon na e ciudadano di Puerto Rico Oscar Lopez Rivera, ken tabata deteni pa 35 aña caba di “manera inhusto”. “Danki presidente Obama pa tende durante ultimo dianan cu bo tin como presidente y haci husticia cu Lopez Rivera, ken ta un homber extraordinario cu tabatin mas di 35 aña deteni inhustamente, pa motibo cu e tabata lucha pa logra independencia di Puerto Rico”, Maduro a bisa den un reunion di ministro di Venezuela.
Oposicion di Venezuela a solicita na Maduro pa cumpli cu su promesa y laga Leopoldo Lopez liber Oranan despues di conoce e reaccion di Maduro riba e noticia di liberacion di Lopez Rivera, e secretario ehecutivo di Mesa di Unidad (MUD), Jesus Torrealba a invita presidente Nicolas Maduro pa “cumpli cu su promesa”, di duna libertad na Leopoldo Lopez. E solicitud a bin dilanti ora a recorda Maduro riba su palabra na aña 2015, tempo cu el a bisa cu e por libera lider di oposicion Leopoldo Lopez, si Merca laga e lider di grupo marxista-leninista na Puerto Rico, Oscar Lopez Rivera, den libertad. “Desde luna di mei e ciudadano Oscar Lopez lo keda liber mediante un indulto di Barack Obama. Maduro, ate ey (…) El a bisa cu e ta libera Leopoldo Lopez ora cu Merca laga Rivera liber”, Torrealba a bisa den su programa di radio.
Dialuna 4 di januari di 2015, Maduro a sigura cu unico forma di libera Leopoldo Lopez, cu ta den prizon militar di Ramo Verde, ta si gobierno di Merca laga Lopez Rivera liber.
