(AP) — Presidente Venezolano, Nicolas Maduro a reuni cu e cabesante di Corte Criminal Internacional mientras e ta enfrenta un investigacion andando na man di e tribunal riba crimen contra humanidad pa su accion riba protestanan anti-gobierno.
Fiscal principal di ICC, Karim Khan no a duna ningun declaracion despues di e reunion na e palacio presidencial na Caracas. E di cuatro bishita di Khan na Venezuela ta yega casi dos luna despues cu un panel di apelacion a duna veredicto cu investigacion di e corte, anuncia pa prome biaha na 2021, por procede riba obhecion di gobierno di Maduro.
Merca no ta partido den e ICC basa na Hulanda, pero a sostene e investigacion, proponi originalmente pa varios nacion Latino Americano, riba e responsabilidad di Maduro pa supuesto abuso, incluyendo detencion arbitrario, tortura y violencia sexual cometi pa forsanan di seguridad desplega pa stop e protestanan na 2017.
E huesnan di apelacion, anunciando nan veredicto na maart, a bisa cu e investigacionnan Venezolano ta parce di ta enfoca riba perpetradornan di nivel abao. ICC ta busca pa enhuicia comandantenan senior considera responsable pa crimennan.
E huesnan tambe a nota cu “Venezuela ta parce di a tuma stapnan investigativo limita y cu, den hopi caso, ta parce di tin periodonan di inactividad investigativo no splica,” corte a bisa den su declaracion.
Nan tambe a bisa cu e investigacion domestico na Venezuela no a parce di cubri suficientemente partinan di e investigacion internacional – incluyendo acusacion di persecucion y crimen sexual.
