(AFP) – Polis Spaño a aresta un fugitivo yama e “Maestro di Escape” despues cu el a scapa di prison 4 biaha, mas recientemente for di un facilidad di seguridad maximo na Italia, autoridadnan a bisa diaranson.
E homber, busca pa Italia bao un orden di aresto Europeo, a scapa for di e prison na december pa medio di corta e baranan di bentana y baha su mes cu klechi di cama mara, Spaña su Polis Nacional a bisa den un declaracion.
Polis a bisa cu anteriormente el a scapa for di prisonnan na Terni y Parma na Italia y for di un prison Belga, unda el a usa un piramide humano pa subi muraya. “Ta zona manera algo di un pelicula, pasobra tinbiaha realidad ta mas straño cu ficcion,” polis a bisa den un declaracion.
E homber a keda aresta na e ciudad Spaño di Tarragona despues cu polis a monitor e y yega na su paradero den un bario unda ta pensa cu e tabata biba.
Autoridadnan a bisa cu el a resisti aresto y cu varios persona compañando e a purba interveni, cu uno supuestamente heridando dos oficial.
Polis Spaño a duna solamente e inicial di e homber, T.T., cual ta coresponde na esnan di Toma Taulant, un nacional Albanes conoci pa media Italiano como “mago della fuga” of “maestro di escape.”
Taulant a scapa for di un prison di seguridad maximo na Milan den december.
E tabata cumpliendo un sentencia den prison cu lo a caduca na 2048 pa un serie di crimen incluyendo hortamento violento, hortamento y bendemento di droga, segun media Italiano a reporta.
E fugitivo tabatin documentonan di identificacion falso y dos biyete di 500 euro sospecha di ta falso, polis Spaño a bisa.
Un hues a duna orden pa e keda bao detencion provisional sin posibilidad di libertad bao fiansa cu proceso di extradicion pa Italia pendiente.
