Durante un conferencia di prensa Mervin Wyatt-Ras a trece padilanti cu e ta condena maltrato, referiendo na e caso cu a pasa recientemente di e politico femenino. Nos redaccion a papia tambe cu FHMD cu ta splica un poco di e situacion cu tin actual na Aruba pa loke ta trata maltrato fisico.
Sra. Wyatt-Ras ta trece padilanti cu maltrato por sosode cerca tur hende. Nos tin cu preveni maltrato desde chikito door di ekipa nos hobennan pa defende nan mes. Esaki door di informacion y fortifica nan autoestima. Sra. Wyatt-Ras ta trece padilanti cu nos tin cu preveni bullying tambe. El a menciona e diferente leynan cu e mes a traha ariba nan pa proteha nos hende muhenan, manera e cambio di nos Codigo Penal pa loke ta trata delitonan moral den cual abuso sexual di hende muhe den matrimonio a bira castigabel y e ley di stalking. Sra. Wyatt-Ras ta bisa “nos no por tolera esaki y tin cu traha alabes na prevencion.”
Bon Dia Aruba a tuma contacto tambe cu coordinador di Fundacion Pa Hende Muhe Den Dificultad (FHMD) Magaly Maduro. Aki Sra. Maduro ta bisa cu hende tin cu stop di haci noticianan asina aki un circo y mucho menos algo politico. Ora cu algo di e manera aki pasa cu un persona conoci den nos sociedad, hopi hende ta gara na esaki y hacie un dinamismo lubidando cu e punto final ta cu un ser humano ta wordo maltrata y esey no ta bon. Abuso domestico por pasa cu nos tur y ta algo cu pa hopi aña caba ta pasando aki na Aruba y e ta un realidad di bida. E ta bisa cu no mester lubida cu abuso domestico no solamente ta afecta e victima pero e famia tambe sea ta e yiunan of mayornan por ehempel. Sra. Maduro ta bisa cu aunke esaki no ta bon, tampoco e mester keda un secreto y mester educa e pueblo di Aruba mas acerca. E ta bisa cu hende ta di opinion cu esaki ta pasa solamente cu hende “bobo” y ta wordo stigmatisa. Na 2017 ya ta tempo pa realisa cu e ta pasa cu tur hende y e no ta discrimina. E ta pasa contra hende muhe, homber y mucha.
FHMD ta un fundacion cu pa hopi aña caba ta yudando hende muhenan den dificultad na momento cu nan ta pasando den e mesun tipo di situacion nan aki y nan ta condena violencia domestico den tur caso. Tambe nan ta provee refugio y na esaki Sra.Maduro no a bisa na unda e refugionan aki ta situa y tampoco e la bisa ki tipo di refugio nan ta pa por protege tur victima cu ta actualmente den e casnan of edificionan aki. FHMD ta bisa cu e aña aki ya tin 55 persona cu a acerca e fundacion e aña aki cu casonan di violencia como casonan ambulante. 11 di nan hunto cu 17 mucha a bira caso di opvang esta cu a keda of ta kedando den un di e luganan di refugio. Pa cu e cifranan sra. Maduro ta bisa cu e ta bayendo den e mesun rumbo manera na aña 2016 y tur esunnan di e aña aki ta casonan completamente nobo.
