782e4aaa-84c1-45c7-83f3-5e81a7d39b92.jpg

Valerie a fayece dia 31 di maart, te awe ainda famia no sa kico a causa un situacion asina lamentabel. Tur cos a cuminsa dia 2 di maart ora cu Valerie a drenta hospital na estado, cu 1 centimeter habri, malo, cu presion halto sin por orina. Vivian Krosendijk persona autorisa pa Valerie pa ricibi informacion medico na momento di su admision den hospital a conta Bon Dia Aruba den un entrevista amplio kico tur e y famia a pasa, y ta pasando aden.

Diamars Sra. Krosendijk a pidi papel di keho na hospital y a wordo dirigi pa papia cu e funcionario encarga cu kehonan. Den contacto cu Hospital, Vocero Charlaine Huntington a bisa cu hospital lamentablemente no por duna informacion di e caso y kico a pasa como cu ta trata informacion priva di pashent, sinembargo ta sigura cu ta investigando e caso y kico bay robes desde cu esaki a tuma luga comienso di luna. Departamento di Salud Publico a bisa cu nan no tin suficiente informacion ainda pa duna declaracion y cu ta averigua esaki.

Informacion entrevista

Locual cu Sra. Krosendijk a conta Bon Dia Aruba ta cu el a publica informacion riba Facebook primordialmente pa e caso lamentabel aki haya atencion. Sra. Krosendijk ta sinti cu hopi cos a bay robes desde inicio y tin miedo cu ainda e situacion no a termina mirando cu ainda yiu muhe di Valerie a na bida, pero niun familiar no sa den ki condicion e baby ta. Otro siman e baby ta planifica pa sali hospital.

Valerie a wordo admiti den hospital dia 2 di maart cu presion halto, hopi dolor y 1 centimeter habri. E tabata den e dianan pa haya yiu. Valerie tabatin keintura tur dia y a keda malo ricibiendo remedi pa regula su presion entre otro pa 7 dia largo. Sra. Vivian kende a bishita Valerie na diferente ocasion tabata papia cun’e e anochi (8 di maart) prome cu su situacion a bira pio, el a bisa Sra. Krosendijk cu e ta den hopi mas dolor y cu dokter no ta bin. Durante e transcurso di e 7 dianan aki diferente biaha a puntra dicon no ta haci cesarea y saca e baby nan, como cu ya nan ta grandi, pero semper a wordo bisa cu mester warda. Mainta 9 di maart cu Sra. Krosendijk a bay busca drechi di Valerie pa wak con a sigui cu su situacion a yega y haya e sorpresa cu nan a move di e camber unda cu e tabata y a hib’e sala di operacion. “Keriendo cu porfin nan a hib’e pa haya yiu, mi a sinti alivia.” Ta e ora cu nos a puntra conta cu Valerie cu nos a wordo informa cu e ta den un estado hopi critico y e baby nan tambe. Informacion inicial cu e famia a ricibi for di un dokter di Belgie, ta cu el a pusha pa haya un yiu y durante di e parti el a bira malo, cual a haci cu mester a corta pa saca e otro. Den e proceso aki a purba re anim’e den diferente forma. A pesar di e intentonan aki Valerie y su yiu homber ta clinicamente morto. Locual cu ta remarcabel ta cu segun Sra. Krosendijk ta busca informacion exacto di locual cu a sosode y a bay na ginecologo Ho Kang You, assistent di dokter Ho Kang You a bisa Sra. Valerie un otro version di e caso, pues cu dokter a yega haya Valerie mainta morto tur saca, na momento cu e ta haci control di bishita na su pashentnan. Y cu hospital no ni sa cuanto tempo Valerie tabatin morto e ora y a calcula cu ta 10 minuut. Informacion cu Sra. Krosendijk a ricibi cu 5 minuut morto pues cu e celebro no ta haya oxigeno, mes ta suficiente pa causa hopi daño celebral. Tambe a haya informacion cu e no a pusha saca niun yiu mirando e situacion cu a hay’e aden a corta saca yiunan na e sitio, tur esaki a sosode 9 di maart. Diabierna Santo e baby mucha homber a wordo kita for di mashin pa e bay sosega y awo ta 2 siman na cas di funeraria Aurora.

Den tur esey a purba manda e muchanan Colombia tambe pero tabatin contratiempo cu persona autorisa segun AZV pa biaha cual a causa tardansa cu a pone na final cu e muchanan no por a bay Colombia mas y a keda Aruba mes pa wordo atendi cu locual cu tin.  

Valerie a keda for di tino clinicamente morto y hospital a informa famia cu nan lo avisa ora cu ta asina leu cu nan lo kita mashin for di Valeria, algo cu segun Sra. Krosendijk no a tuma luga. Di un manera of otro el a haya informacion cu a saca Valerie for di cuido intensivo caba y el a bay hospital den e camber di Valerie na piso 2. Eynan el a topa cu Valerie kende despues di un rato a habri su wowonan despues di tanto dia, y a comunica cun’e haciendo movecion cu wowo y asina a dispidi di dje y a cont’e tur locual a pasa y primintie cu lo cuida su yiu muhe pe. Pa su mañan mainta trempan 4:50, 31 di maart hospital a yama pa bisa cu Valerie a fayece, nan no a avisa famia di esaki anteriormente.

Henter e caso di Valerie ta uno hopi largo, esaki ta solamente un pida di locual el a pasa aden e ultimo dianan di su bida. E hecho cu tabatin hopi bruhacion, confusion, tardansa entre otro den e caso aki tin di haber tambe Valerie ta di Haiti, casa cu un persona na Haiti y no tabatin contacto cu su tata aki na Aruba. Sra. Krosendijk amiga di misa a bira e persona encarga cu Valerie cu tabata biba den un situacion menos agradabel. E famia ainda ta den lucha pa gastonan di entiero y ta bay pidi permiso pa pone su yiu homber den su brasa riba su pecho pa nan sosega na pas. Famia kier investigacion tuma luga pa determina causa di su fayecimento mirando e diferente storianan cu nan a ricibi den e proceso, nan kier sigura cu no ta negligencia medico a causa awe cu tin un mucha cu a perde su ruman y su mama.

 

LEAVE A REPLY

Please enter your comment!
Please enter your name here