Fin di luna pasa, e hallazgo di un curpa corta na pida haya den freezer di un cas a sacudi comunidad local. Eventualmente, Cuerpo Policial a identifica e victima como Luz Divina Paulino, naci na Republica Dominicana, kende a bira victima di asesinato. Awo su mama, Maria Altagracia Perez Paulino, a papia cu medionan Dominicano pa exigi husticia pa su yiu.

Den un articulo den Perico Dominicano, Maria Altagracia Perez Paulino a papia for di su residencia na El Factor, Republica Dominicana, tocante e impacto di e morto di Luz Divina Paulino, kende su curpa a ser haya corta na pida den un freezer na Solito, Aruba. El a bisa cu ainda e ta purbando di compronde kico por a pasa cu a resulta den morto di su yiu.

Perez Paulino a bisa cu su nieto, kende a keda señala como e sospechoso principal den e caso, lo mester a ricibi ayudo pa motibo di e manera con autoridadnan a haya e curpa na e escena.

“E caso ey tabata hopi fuerte, hopi yen di odio… mi ta pensa cu e no por a hacie su so, of kisas e tabatin e planea di hopi tempo caba. Mi nunca a pensa cu mi nieto lo por haci algo asina,” Perez Paulino a bisa durante e entrevista.

Tambe el a bisa cu su yiu nunca a comenta cu tabatin problema of conflicto cu e sospechoso, kende Luz Divina a cria desde tempo cu e tabatin tres aña di edad, prome cu el a bin Aruba como menor di edad. E sospechoso su nomber ta Adrian, segun e medio. Adrian tabata sobrino di Luz Divina, kende el a adopta y a cria.

Den su entrevista, Perez Paulino a conta cu su yiu Luz Divina a sali di e pais cu 17 aña di edad, y e tabatin ya mas di cuatro decada establece den exterior, pero semper e tabata pendiente di su famia na Republica Dominicana.

“Mi yiu tabata pafo di e pais pa 42 aña caba, for di tempo cu e tabatin 17. E semper a traha, semper tabata pendiente di su famia. E nunca a bira lomba pa nos,” el a menciona.

Luz Divina a compaña y sostene e sobrino durante añas, tratando e como un yiu, loke ta haci mas dificil pa Perez Paulino compronde e situacion cu a tuma lugar.

Cu lagrima na wowo, Perez Paulino a manda un mensahe na e sospechoso. “Ami nunca a pensa cu abo lo por haci algo manera esaki… Mi yiu e aña aki tabata di bay Hulanda pa caba dos curso cu e tabata falta. El a cri’e, a lant’e como persona, pero mi no sa, esey ta un cos cruel cu ta haci dolor.”

Ademas, Perez Paulino a pidi pa institucionnan di Aruba haci un avance den e proceso, y pa e revision oficial permiti pa trece claridad den cada aspecto relaciona cu e caso.

Hallazgo impactante

Tabata diasabra 26 di november cu autoridadnan a haci un descubrimento impactante di un curpa corta na pida hinca den un freezer na un cas na Solito. A identifica e victima como Luz Divina Paulino, nativo di El Factor, Republica Dominicana, naci dia 7 di april di 1965.

A bira conoci cu e victima tabatin casi un luna cu a no a presenta na trabao na e restaurant Chalet Suisse, cu eventualmente su coleganan di trabao a tuma contacto cu autoridadnan for di dia 2 di november pa purba di haya sa kico a pasa of su paradero. Manera menciona, Luz Divina a yega Aruba cu su 17 aña di edad, y a establece na e isla na 1991. E tabata doño di su propio cas, cu dos apartamento di huur. Aunke Cuerpo Policial di Aruba no a comparti publicamente mucho detaye di e caso, rumornan riba rednan social a indica cu re sospechoso a bandona e isla diripiente (algun ta bisa cu el a bay Santo Domingo, otro ta bisa cu el a biaha pa Panama), y cu e lo a cobra e huur di e dos apartamento cu e victima tabata huur riba su propiedad. Sinembargo, te awor polis no a identifica oficialmente un sospechoso.

Perico Dominicano a reporta cu un familiar di Luz Divina ta bay biaha pa revisa asuntonan legal, bancario y administrativo relaciona cu e victima durante proximo dianan.

Segun polis a informa, investigacion riguroso ta andando.

Mientras tanto, e famia ta spera cu por haya e paradero di e sospechoso, y cu e proceso por avansa di un manera cu ta duna claridad.

Cuerpo Policial ta haci un apelacion pa e persona cu sa algo of a wak algo yama e tiplijn di polis cu ta 11141. Nos ta garantisa cu bo ta keda ANONIMO. KPA y Bon Dia Aruba ta manda palabra di profundo condolencia na e famia di e fayecido.