Siman pasa Minister Michelle Hooyboer-Winklaar y Sindicato Simar a yega na un acuerdo pa cu e situacion di e managernan di EPI. Awo ambos partido ta contradeci otro y esaki a trece cu ne hopi pregunta.
Sra. Sheila Lazo-Tromp, president di e sindicato, a indica cu durante e momento cu nan tabata na corte, hues mes a keda sorprendi cu si en berdad a yega na un acuerdo, dicon ambos partido ta den corte. Minister a acepta e proposicionnan cu Simar a manda na augustus y no ta manera a wordo bisa.
Tabata tin carta cu a bay bin entre e sindicato y Minister. E ultimo carta cu a wordo manda dia 24 di augustus di Simar, Minister a bay di acuerdo cu esaki unda cu a firma un acuerdo entre Simar y Minister. Esaki a wordo haci dia 2 di september ultimo.
Desde prome instante e sindicato a bin dilanti pa bisa kico ta pasando en realidad cu e managernan di EPI. Segun e president di e sindicato, nan tin tur documento, di cual e ultimo documento tin e proposicion di e managernan. “E managernan tabata kier un di tres manager pa yuda nan alivia e trabou y despues a bay un combersacion cu Minister. A pone como condicion na Minister cu ta bin un di tres persona, tabata tin algun otro puntonan mas cu en realidad a sali for di Simar, como condicion pa por sigui dialoga y reanuda trabou. Eynan e cosnan a cuminsa,” el a indica na Bon Dia Aruba.
Na hues mes, e abogado a indica cu Minister a duna contesta na e proposicion di e sindicato, pero esaki nunca a yega na nan. Pero e abogado no por a demostra esaki, segun Sra. Lazo-Tromp. “El a menciona un carta cu ya caba tabata tin un carta di Simar cu a bay caba y nunca nos a haya un contesta di esaki. Eynan mes hues, cu tabata sorprendi, a bis’e cu esaki tabata un ‘miss’ comunicacion pasobra aparentemente e contesta ey nunca a yega na nos.”
Tin prueba
“Y mi tin cu bisa, cu casualmente e mainta nos a scucha un declaracion di Minister, unda cu Minister mes a contradeci loke su abogado a bisa dilanti hues. Pero nos tin prueba, kiermen esaki no ta bay na ken ta bisa berdad of no. Nos tin prueba con cosnan a cana. Nos a bin cu un proposicion, nan ta manda un contra proposicion y te ora cu no a cumpli cu e principio di e tres condicion, no tabata tin eigenlijk e oke cu e managernan lo reanunda trabou.” Ora cu a cuminsa cu e caso di e managernan di EPI, nan a cuminsa cu tres punto cu minister.
Puntonan di managernan
Un di e puntonan tabata cu e managernan tabata kier claridad riba kico ta pasando na EPI, kiermen con nan trabou ta hinca den otro. Aki ta referi na e parti di organogram. Nan ta trahando pero un rato nan por haci esaki, un rato nan por haci esey. Unda e responsabilidad ta, y e sindicato desde aña pasa nan a papia cu Minister riba e situacion aki. “Minister a priminti di bin cu un solucion pa esaki na december, cual na februari nos a recorda Minister cu e no a cumpli cu e acuerdo aki. E ora minister a bisa cu nan ta haciendo un investigacion cu esaki. Nos a dun’e su tempo y tabata tin un merdia cu e managernan a forma parti di esey pa papia. Despues di esey no a tende nada mas,” segun Sra. Lazo-Tromp. E managernan mes a bisa cu no, nan no ta bay drenta den un aña escolar atrobe riba e mesun problema aki.
Tambe tabata tin hopi problema cu e director general cu tabata tin na EPI, el a indica na Bon Dia Aruba. E no tabata traha cu e managernan. Tabata tin un ambiente hopi hostil. Nan a papia hopi biaha cu Minister di e situacion aki, e director di DPS cu ta director di e scol. Tur a scucha e puntonan, tabata tin diferente keho cu a wordo manda contra di e director aki. Minister mes a duna e director un ‘waarschuwing’ ora cu el a tuma un paso cu no tabata necesario. “Nos no tabata mira un solucion na esaki. E tabata sigui y te ora cu nos a haya sorpresa cu e director general no t’ey mas. Nos a compronde pa otro rason, pero e parti ey e no tabata t’ey mas.”
Tambe nan a pidi pa un di tres manager. E managernan tabata kier a inicia e aña escolar cu un di tres manager, pasobra e tres unit ta traha cu dos manager y tabata tin mucho peso. Eynan ta unda e combersacionnan a cuminsa bek cu Minister desde aña pasa. Eynan ta unda cu Minister a bisa no na e di tres manager, cu e no ta bay honra e di tres manager.
Taakuren pa un docente
Despues cu Minister a bisa no na e di tres manager, a bin cu e idea di ‘taakuren.’ “Pero e managernan a bisa cu e docente cu ta bay haci e taakuren mester tin e responsabilidad y e autoridad pa por tuma decision manera e managernan, sino e mesun peso ta cay riba nan.” Aki ta unda Minister no tabata bay di acuerdo cu esey. Simar no tabata di acuerdo cu e decision di Minister, y nan a bisa cu si e persona no ta haya e responsabilidad pa tuma decision y pa por bisa algo den nan funcion nan no lo bay tuma esaki. E managernan mes a bisa cu nan kier ta esunnan cu lo bay bisa ken ta esunnan cu ta cualifica pa e posicion. A bisa Minister cu si e bay di acuerdo cu e docente cu lo bay di acuerdo cu e taakuren y ta carga cu e responsabilidad y tin autoridad pa tuma decisionnan, e ora den dos siman di tempo e managernan lo manda Minister kende ta esunnan cu lo por ta na encargo.
Eynan ta unda e abogado a bisa cu Minister ta wardando riba lista for di e managernan di basta tempo, el a indica. E sindicalista a pone enfasis cu niun biaha lo bay manda un lista sino a bisa cu si Minister bay di acuerdo, e ora Minister lo haya un lista den dos siman.
