Mañan diabierna ta tuma luga uitspraak di caso Tulipan cu ta trata iregularidadnan den Arubahuis y den cual ex-minister Plenipotenciario di Hulanda, Guilfred Besaril y ex-director interino Glenn Ling, ta ser acusa di malversacion di placa durante e periodo den nan funcion.
E investigacion ‘Tulipan’, cu a cuminsa na 2023, ta dirigi riba malversacion di fondonan publico di Pais Aruba na Arubahuis, cu a ser usa pa metanan personal di Besaril tempo e tabata minister plenipotenciario.
Ex minister plenipotenciario Besaril ta ser acusa di a comete malversacion di fondonan publico y abuso di su funcion durante e periodo di 2017-2022 na Arubahuis. Adicionalmente, Ministerio Publico a presenta un demanda di decomiso (ontnemingsvordering) contra e sospechoso pa un suma di casi 200 mil florin.
Di e investigacion Ministerio Publico a indica cu Besaril o a usa e fondonan publico aki pa (entre otro) renobacion y amueblamento di un cas di huur na Hulanda, pa pagonan di recibonan di Setar, pa servicionan di Setar na adres di su tata y pa cantidad di comemento na restaurantnan na Hulanda y Aruba.
Durante e tratamento di e caso hues a cuestiona con facil Besaril tabata usa e carchi di banco di Arubahuis den varios instancia den situacionnan cu e no tabata eherciendo su funcion oficial y pa beneficionan personal.
Como castigo pa Besaril Ministerio Publico a exigi un castigo di 2 aña di prizon incondicional.
Pa loke ta ex director Ling, e ta ser acusa di a participa den malversacion di fondonan publico y abuso di su funcion durante e mesun periodo cu Besaril. Ministerio Publico a remarca cu e tabata responsabel pa finanzas di Arubahuis, pero a keda sin interveni, a pesar cu e tabata wak cu iregularidadnan tabata tuma lugar. For di e investigacion a sali na cla resulta cu Ling mes no a gosa di bentaha financiero y pa e motibo ey no a presenta ningun demanda di decomiso contra dje.
Como castigo pa Ling Ministerio Publico a exigi un castigo di prison di 12 luna di cual 6 luna ta condicional cu un tempo di prueba di tres aña.
Durante e tratamento di e caso hues y fiscal a cuestiona Ling capacidad pa eherce e trabou di director y asina evita e gastamento di placa excesivo cu Besaril tabata haci.
Hues a cuestiona tambe con Ling por a permiti esaki y no a actua como un director mester actua na cual Ling simplemente a indica cu su autoridad tabata ser mina y cu e ex-minister plenipotenciario tabata pasa riba dje. Den otro palabra a indica cu su mannan tabata mara y no por a haci mucho.
Uitpsraak lo tuma luga pa 1:15 mañan atardi.
