8dowers maneho prizon (1).JPG

Minister di husticia di cada pais den Reino, ta responsabel pa e situacion di detenidonan na nan pais. Ministernan di Husticia a yega na un acuerdo mutuo riba capacidad di detencion den Reino. Minister Arthur Dowers ta splica  riba esaki.

“E cooperacion ta hopi mas miho tambe entre e paisnan awor akinan,” Minister a bisa. Pero ta asina cu e ministernan di Reino ta traha hunto pa duna balor na e calidad di servicio cu ta bin di prizon. El a sigui bisa cu esaki tin di haber cu prizonnan tin nan edad y nan condicion fisico ta laga hopi di desea. No ta asina aki cu nan lo cay den otro dia di mañan, pero tin parti di prizon cu no ta bon. Tin parti di prizon cu ta mas nobo cu otro.

Prizon moderno

E forma con e prizon ta traha, ta pone cu e posibilidad di rehabilita hende ta bira mucho mas limita cu den un prizon moderno. Den un prizon moderno ta tene cuenta cu tur aspecto di con ta maneho e fluho di esunnan cu ta den prizon. Ta pone e tecnologia moderno pa loke ta ICT, pa loke ta camara, etc.. “Bo por maneha un prizon asina mucho mas eficiente cu un prizon manera esun di nos y sigur di Corsou y di Sint Maarten,” e mandatario a bisa. Kiermen tin un reto mas grandi. Na Boneiro, nan ta construyendo un prizon nobo y esey e mandatario ta kere cu lo wordo e ora ey reenforsa cu tecnologia cu ta bay haci esey mas facil pa maneha e prizon.

Retonan

Segun Minister Dowers, tin retonan mas grandi pa loke ta maneho di prizon. Tambe tin un aspecto cultural historico, caminda cu e forma di trata cu e persona cu ta den detencion ta diferente cu loke ta kere den tempo moderno ta duna e miho efecto. Pero door di e construccion di e prizon mes, ta haci dificil pa rehabilita hende. Ta trahando duro riba e aspecto aki. Den cierto sentido por mira e resultadonan positivo. Sinembargo e ta kere cu aki na Aruba tin un caminda largo pa cana ainda. Nan no a logra pa haci tur loke cu kier. E discusion cu tin cada biaha di nobo ta den un sociedad manera di nos, ta con ta aloca e fondonan. Ta bay pone un 50 miyon otro aña disponibel pa traha un prizon nobo, of ta pone esaki pa enseñansa, turismo, etc. Esey ta e escogencianan cu tin cu haci. “Mi tin cu bisa lamentablemente, pa ministerio di husticia, hopi biaha e no ta cay na fabor pa pone un miho prizon pa criminal. Sinembargo nos tin un responsabilidad si internacional pa cumpli cu cierto derechonan di e hendenan aki y nos ta haci esfuersonan maximo pa cumpli cun’e tambe,” Minister Dowers a bisa.

Prizonnan no den bon condicion

No ta asina ey cu Hulanda ta esun cu ta wordo teni responsabel pa e condicion di prizonnan. Pero si ta asina ey, cu Reino den su totalidad ta wordo bati riba su man si tin un di e prizonnan cu no ta den bon condicion. “P’esey nos tur ta sinti nos mes responsabel,” el a bisa. No ta asina tampoco cu husticia ta un asunto di Reino. Husticia ta un di e asuntonan completamente autonomo di Reino. “Nos mester coopera cu otro pa logra resultadonan, tanto e partinan di BES (Hulanda), Corsou, St. Maarten y Aruba.”

Cooperacion conhunto pa combati crimen

Minister Dowers ta kere cu nan ta dal e criminalnan aki hopi duro. Sigur loke ta crimen organisa na pais Aruba. Minister no ta kere cu husticia a perde e bataya. Si ta asina cu e forma con e mundo globalisa  y internet cu ta brinda asina hopi posibilidad, cu ta mira hopi otro tipo di crimen ta nace. Ta mira otro forma di move por ehempel cu placa cu ta pasando awor aki den mundo, cu e ta haci no solamente pa nos como pais chikito den Reino, pero hunto cu Merca, Colombia y otro paisnan den region, tin cu bay traha mucho mas hunto pa logra pa ta mas efectivo den combati crimen y pa por dal e criminalnan cada biaha un sla mas duro.

Reto pa combati crimen globalisa

E intencion ta cu na momento cu un hende ta un criminal, sea cu ta na Hulanda of na otro parti di Reino y cu tin su actividadnan diferente parti, tin cu haci entradanan hudicial simultaneamente. Tur e paisnan hunto tin un palabracion. Por a ripara cu tin un reto mucho mas grandi awendia pa combati crimen pasobra crimen ta mas global parti riba mundo. 

LEAVE A REPLY

Please enter your comment!
Please enter your name here