Crisis na Venezuela, crimen organisa y medio ambiente ta keda e enfoke di Wardacosta di Reino pa Region di Caribe, esta Kustwacht. Esaki a keda determina den e plan pa 2022.

Kustwacht ta ehecuta su trabaonan denter di e cuadro huridico di e rijkswet Kustwacht di 2008, y banda di su tareanan di brinda servicio manera Search and Rescue, e organisacion ta ehecuta tareanan investigativo y di control. Esakinan ta encera combatimento di traficacion di droga, tarea general di polis, combatimento di terorismo y cuido di frontera. Pero banda di e tareanan aki, Kustwacht ta encarga tambe pa yuda combati contrabanda y traficacion di hende, ademas di inmigracion ilegal. Pa por ehecuta e tareanan aki, Kustwacht tin unidadnan riba lama, espacio aereo y tambe riba tera cu por keda activa riba y pa tur e seis islanan den Reino Hulandes Caribense.

Pero e factornan di area mas importante pa e tareanan di Kustwacht den 2022 ta keda e crisis continuo na Venezuela cu ta crea efectonan destabilisante pa henter region. Igual ta e criminalidad organisa/internacional cu ta relata na traficacion di droga y e efectonan secundario di e pandemia COVID-19. Pero tambe ta tene cuenta cu e circunstancianan climatologico periodico, cu ta rekeri intervencion di Kustwacht (rescate y asistencia).

Venezuela

Venezuela ya tin hopi aña den un crisis politico, social y financiero-economico. E pandemia di COVID-19 na 2020 a empeora e situacion humanitario cu ya caba tabata hopi fragil. E scenarionan pa 2022 y despues ta poco alentador. A pesar di e intencionnan expresa di oposicion y Gobierno Venezolano pa cuminza dialoga di nobo, por lo pronto no tin bista riba reformanan politico of economico y un alivio pa e situacion humanitario pesimo. E crisis na Venezuela como tal ta un factor destabilisante pa henter region. Pa Corsou y Aruba en particular e ta nifica migracion ilegal y actividadnan criminal internacional y ta pone e paisnan aki confronta retonan grandi.

Organisacionnan criminal transnacional

Area Caribense tin liñanan di costa largo cu ta dificil pa controla, a base di su fronteranan maritimo corespondiente. E ubicacion geografico di e paisnan di Reino Hulandes den Caribe, entre paisnan productor y transportador grandi di droga den Sur y Centro America, y e mercadonan di compra, cu ta Merca y Europa ta haci e paisnan vulnerable pa organisacionnan criminal di droga transnacional.

Esaki tin efecto riba siguridad di ciudadanonan, ta kibra e estado di derecho y tin consecuencia mas amplio pa stabilidad internacional. E comercio di droga pisa ta move particularmente for di direccion zuid pa Noord, mientras cu e ‘softdrugs’ y arma, particularmente di Merca, ta sosode net lo contrario. Esaki ta resulta den un cantidad di asesinato cu arma di candela ilegalmente obteni den e region Caribense.

Esaki tin consecuencia pa e trabao di Kustwacht, cu ta describi den e Plan di Maneho Hudicial, cu a identifica e prioridadnan. Banda di esey, ta existi diferente iniciativanan internacional den e cuadro di siguridad, manera BOTOC, cu ta e ‘Breed Offensief Tegen georganiseerde Ondermijnende Criminaliteit’ cu tin terenonan di trabao comun cu Kustwacht.

Traficacion di droga

Mundialmente a tuma nota di un demanda creciente pa droga, tambe durante e pandemia di COVID-19. E mercadonan di compra a bira mas grandi, particularmente na Europa y Africa y e rednan criminal a aumenta, entre otro pa motibo di e pandemia di e coronavirus y su efectonan, cu segun analisis lo keda sinti pa e añanan venidero. E desaroyonan aki ta exigi un cadena di mantencion di ordo hopi solido. E partner principal, Merca, di otro banda ta dirigi su mes mas riba operacionnan pa combati traficacion di droga den Ocean Pacifico. E ta nifica en general cu tur pais den area di Caribe, ta mas dependiente di nan mesun acumulacion y procesamento di informacion ora ta trata combatimento di traficacion di droga efectivo den y cerca di lama Caribe, pues lo no por conta mucho mas riba e esfuerso di Merca.

E resultado ta cu a crea mas programa bilateral dirigi na comparti informacion. Polis Nacional di Hulanda den cuadro di e asina yama ‘upstream disruption’ a aumenta su presencia na Colombia pa haya mas gara riba e fluho di droga ilicito pa Europa. Kustwacht tambe ta bay amplia y fortifica su relacion cu Colombia, posiblemente cu sosten di un liaison Colombiano cu ta bay ta temporalmente presente na e Maritiem Informatie Knooppunt, MIK, na Corsou.

Banda di esey, Kustwacht e aña aki ta parti di e iniciativanan di Polis Nacional di Hulanda cu ta sali di e strategia di Reino pa atende cu contrabanda di cocaina y fluhonan ilegal di placa. E strategia aki ta cuadra cu e vision di Kustwacht y ta sosteni pa un cooperacion entre e partnernan hudicial/investigativo den parti di Reino den Caribe y Polis Nacional di Hulanda.

Traficacion y contrabanda di hende

Denter di e fluho di personanan indocumenta, cu ta purba drenta e paisnan Hulandes den Caribe di forma ilegal tambe ta inclui contrabanda y traficacion di hende. Pa loke ta traficacion di hende, Kustwacht tin un posicion importante den e colaboracion regional y internacional pa bringa e crimen aki

Transporte y comercio arma ilicito

E comercio ilegal di arma di candela y e posesion di arma di candela entre habitantenan di nos paisnan, incluso Aruba, ta keda un preocupacion grandi. Un parti di e armanan ilegal aki y e municion ta drenta ilegalmente via lama for di Merca, Colombia y Venezuela. Migrantenan cu ta trata di yega di forma ilegal na e paisnan aki regularmente ta trece arma di candela cu nan. E uso di arma di candela ta hopi estrecho cu e problematica di droga y gang, por ehempel na Corsou.

Combatimento terorismo

Kustwacht lo sigui pone atencion riba e potencial menasa di terorismo den region. Esaki den luz di desaroyonan global. Ya caba Kustwacht ta duna un contribucion na e lucha contra terorismo basa riba su trabao di bringa e crimen organisa transnacional manera contrabanda di arma, hende y droga, cu por ta e fuentenan di financiamento pa actonan teroristico, ademas di e posicion di informacion mehora basa riba acumulacion di inteligencia.

Cambio di clima

Efectonan extremo di clima y cambio di clima ta un fenomeno cu ta ripiti den Caribe. E temporada di horcan ta caracterisa pa tormentanan mas intenso. Kustwacht hunto cu Defensa y organisacionnan regional ta brinda sosten di emergencia den caso di calamidad. Pero tambe riba cada pais, incluso na Aruba, Kustwacht ta hunga un papel structural como parti di e cadena di sosten na momento di calamidad.

Realisacion di material y personal

Na 2022, Kustwacht ta dirigi su mes riba basa pilarnan pa un Sistema di Maneho di Calidad . E pilarnan aki ta Integridad, Siguridad y Medio ambiente, control y garantia di calidad, preparacion y training Banda di esey, Kustwacht mester traha riba proyectonan concreto cu ta describi den su plan di termino largo. Ehempelnan ta e capacidad di deteccion for di riba tera riba tur e seis islanan y cambio di e capacidad di e cutter ademas di e ekiponan pa ehecuta control aereo. Na 2022 lo concretisa e trayecto di reorganisacion cu a inicia na 2021. E obhetivo ta un organisacion cu ta activo 24 ora pa dia, 7 dia pa siman cu ta basa riba accion policial riba lama cu ta dirigi pa inteligencia.

Informacion y organisacion

Kustwacht ademas lo tuma mas paso pa yega na un organisacion di mantencion di ordo, cu ta posiciona su mes pa opera di forma anticipativo, en bes di reactivo. Pa logra esaki, mester logra un bon organisacion di informacion. E ta un condicion absoluto. Como tal a identifica diferente plan riba e ekiponan y tambe personal. Por ehempel, tin e proyecto ‘Maritiem Informatie Knooppunt,’ modernisacion na e Centro di Coordinacion pa Rescate Conhunto, y e introduccion di e sistemanan cu no ta rekeri personal (drone). Banda di esey, Kustwacht ta traha pa fortifica su posicion di informacion y data hunto cu partnernan tanto den y pafo di Reino Hulandes.

Un Kustwacht operacional y financieramente saludabel

Kustwacht ta fortifica su actividadnan na 2022 cu ekiponan necesario. Asina lo duna e cutternan nan mantencion y e proposicionnan di mehoracion di 2021 pa e Metal Sharks, lo keda implementa. Na Boneiro, Kustwacht lo continua cu e logistica pa crea un hub maritimo cu lo keda opera hunto cu partnernan den e cadena di siguridad. Pa ta personal, ta trahando riba e maneho di empleabilidad den e organisacion.