Ministerio Publico (OM) ta traha riba liñanan di maneho di agresion relacional nobo, cu ta bay conta tambe pa polis.
Esaki nan ta informa. “E intencion di e maneho nobo aki ta pa Ministerio Publico y Cuerpo Policial di Aruba por reacciona cu mas eficiencia y efectividad riba violencia relacional.”
Banda di dje ta trahando na realisacion di Veiligheidshuis, manera anuncia na inauguracion di e edificio nobo di Ministerio Publico, y di cual Bon Dia Aruba tambe a cubri. “Trabaonan ta andando y e expectativa ta cu Veiligheidshuis lo ta operacional dentro di corto. E Veiligheidshuis tambe ta un forma di cooperacion entre partnernan hudicial y social.”
OM ta anuncia esaki a base di locual procurador General di Aruba, Alexander van Dam a bisa durante e conferencia di Fundacion Hende Muher den Dificultad (FHMD) na ocasion di e Dia Internacional contra Violencia contra Muhernan.
Den su discurso el a enfatisa ‘e importancia di cooperacion riba termino largo entre e partnernan riba tereno hudicial y social den prevencion di violencia relacional’. “Ministerio Publico tin un rol importante den esey, pero no por solucion su so. E ta un pregunta cu henter Aruba tin cu traha na dje.”
