Home Local Mangel cu THC haya riba un pasahero biniendo for di New York

Mangel cu THC haya riba un pasahero biniendo for di New York

403

Personal di duana durante un control riba un pasahero biniendo for di New York a gara e persona aki cu un sorto di mangel cu ta contene THC den caracteristica di gummy y cu formanan di bichinan colorido .

Esaki duana ta informa ayera. Na New York THC ta legal, na Aruba no. Ora nan a wak e paki nan a constata cu ta contene THC y cada paki tabata contene un cantidad di 250 gram. Den total di dos paki a wordo confisca y e pasahero a keda den man di  autoridad hudicial.

PR di duana, Marilyn Wont como director di departamento aki, Roderick Croes a referi na e informacion di e confiscacion di cierto cantidad di THC den forma di mangel cu a wordo divulga den media y tambe den social media y cu a causa consternacion y panico den nos comunidad. THC kiermen  tetrahidrocannabinol,  cu ta e parti psico-activo di e cannabis of marihuana cu ta pone e hende high.

E vocero di duana a enfatisa cu regularmente personal di duana durante nan trabou nan ta descubri droga, y tambe e tipo di productonan cu ta contene THC, pero no tur ora e confiscacion aki ta sali den social media of den medionan di comunicacion.  Duana lo ta bay ta mas alerta riba e vuelonan aki caminda e producto a base di THC ta ilegal y pa evita cu nan por drenta Aruba. Pero tambe nan ta bay tene combersacion cu otro partnernan manera ATA, aeropuerto y APA pa informa e biaheronan prome cu nan ta bin Aruba pa nan sa cu no mag drenta nos isla cu THC of otro tipo di producto ilegal riba nos isla.
Di su banda, director di duana a indica cu mientras cu e productonan a base di THC no ta legal na Aruba,  e por wordo considera como traficacion di droga.  Sr. Croes a bisa cu personal di duana ta haciendo su trabou manera debe ser, y esaki ta wordo refleha den e confiscacion aki. Nan ta pone extra atencion riba e vuelonan no solamente di e paisnan bisiña, pero di Merca tambe cu por trece cierto risico di traficacion di substancia ilegal of droga.  El a indica cu no den tur estado di Merca e  productonan  a base di THC ta legal, ya cu tin estado cu e ta totalmente prohibi.

Sr. Croes a bisa cu den e caso specifico aki caminda dos paki cu tabata contene 250 gram y segun e pasahero  esaki tabata pa su propio uzo. E no tabata un cantidad grandi y el a bini como turista locual ta kita e sospecho si   ta bin negosha cu esaki.  Sinembargo el a laga sa cu duana lo tene cuenta si cu e posibilidad cu e por bira un trafico. El a enfatisa cu producto a base di THC ta prohibi pa drenta Aruba. “Nos tin nos ley, y duana ta enforsa ley.” A pesar cu den cierto estado di Merca e uzo di THC ta legal, na Aruba ta ilegal. Y mientras cu THC  ta ilegal nos por consider’e como un traficacion di droga , el a bisa.