Manifestacion na caminda… Accion hustifica, o mero buya?

E partido grandi den oposicion no ta perde tempo sintando keto den paralemento y ta reta actual gobierno di coalicion cu un berdadero manifestacion pa mustra forsa e luna venidero. Logicamente, como oposicion, ta nan derecho, tarea, placer, orguyo, pa critica gobierno, cuatro aña largo. Cu esey ningun hende mester tin problema.

Ademas, tin bastante cos pa critica e gobierno aki y den esey nan, e partido opositor, no ta para nan so. Por ehemplo, e situacion financiero di gobierno y e medidanan cu a tuma pa trata di resolve e problema ey. Pero critica e actual gabinete pa e situacion financiero no ta facil pa e partido den oposicion. Es mas, nan ta esunnan cu menos autoridad moral pa critica, pasobra e actual gabinete tin e tarea no bunita di ruim e rotzooi cu nan a laga atras. Sin embargo, esey no ta kita cu tin critica, y funda. Na mas di un ocasion nos a trece dilanti cu e decision pa pone tur e peso financiero riba e cartera di e ciudadano, via medida cu a corta den e capacidad financiero, e poder di compra di e ciudadano individual, na lugar di corta gasto di personal, lo por resulta un di e erornan garafal di e gobierno aki. Pa splica un tiki mas con nos ta mira esaki: ta diferente si bo ta aumento peso di impuesto riba comunidad den tempo bon o den tempo malo.

Den tempo bon, cu salario y otro entradanan individual creciendo, e ciudadano ta entrega algo y ta keda cu algo. Gobierno ta gara algo di un abundancia creciente pa su mes, pa despues duna comunidad atrobe den otro beneficio pa cual nos tin gobierno: por ehemplo, percura pa servicio gubernamental adecua, infrastructura na orden, por ehemplo caminda drechi envez di e paisahe lunar cu nos tin tur caminda, salvo e partinan nobo cu nos mester paga ainda den e proximo decadanan.

Pero den tempo malo, y ta esey nos tin, kibra e cartera di e ciudadano mas ainda no tabata e caminda corecto, ni cuanto e coalicion tuma e actitud di “nan ta yama nos esnan di medida, anto kico.” E actitud ey no ta yuda. Claro cu ta asina cu un gobierno mester ta para fuerte den su sapato y no mester tin miedo pa tuma medida. Pero pakico anto e gobierno aki tin asina hopi miedo di corta su mes gastonan? Pakico no a logra absolutamente nada ainda cu corta gasto di personal substancialmente, pasobra despues di kita e personanan liga na gobierno anterior, esey tin su logica, pero tabata realmente necesario pa yena henter e aparato atrobe cu hende cu mester haya recompensa pa nan esfuerso den campaña? Y pa esnan cu lo kier contradeci loke nos ta bisa, djis lesa e ultimo comentario di CAft riba e rapport financiero di ultimo kwartaal 2018, unda ta constata cu na fin di aña 2018 gobierno tabata pagando practicamente e mesun cantidad di persona cu na cuminsamento di aña. Nos no a tende comentario di banda di gobierno riba esaki: wie zwijgt, stemt toe…

Esey no ta tur pasobra tin mas cambio den legislacion fiscal na caminda, cu te awe ta maneha manera un gran secreto, contradiciendo e propio filosofia di e gobierno aki di transparencia. Ta ki dia porfin tin pensa di considera nos digno di conta nos kico ta e proximo paso? Un luna prome cu e ley mester bin na vigor? Anto keda straña cu comercio y ciudadano ta bon rabia y no kier scucha nada… tremendo ambiente negativo crea pa nan mes pa e manera di atende e cosnan aki. Un gran parti di esnan cu a vota pa un cambio na september 2017, despues cu e gabinete anterior, awor converti den artista di baricada, a hiba e pais na rand di abismo financiero. Y a haci esey consciente di e desaster cu e lider activista a laga atras y cu lo mester tuma medida. Pero no a duna e gabinete aki un ‘carte blanche’ pa pone esnan cu ta traha den sector priva paga pa e clientelismo, patronahe y nepotismo continua manera nunca nan no a siña algo di e destruccion cu e cultura politico maligno aki a causa den nos gobernacion den e ultimo decadanan.

Pa duna un otro ehemplo kico ta e consecuencia di escogencia robes den tuma medida, lo siguiente. Awor cu Aruba ta laat cu preparacion di e ley cu mester coregi dos ley di impuesto pa nos ta cumpli cu reglanan imponi pa Union Europeo, ta bin keha cu nos ta laat cu pasa e ley aki, pasobra no tin suficiente hurista pa haci e trabao legislativo. Pero shonnan, ta ken ta usa tur e espacio financiero pa duna campañador trabao, anto no tin placa pa paga profesional cu mester na diferente lugar den e aparato, entre otro na Legislacion? Ta di e manera aki nos mester bay dilanti?

Asina nos por mira cu por critica e actual gobierno riba varios tereno. Y cu e actual oposicion tambe lo hacie, no ta mas cu natural. Otro pregunta ta si nan por acopla nan critica cu solucion berdadero pa e problemanan cu nan mes a laga atras. Nos no ta convenci.

LJMADURO – 14-MAR-2019

 

You May Also Like

‘Pleito’ di Nicolas Maduro pa desvia atencion?

Y kico Hulanda ta haci? E noticia di siman tabata naturalmente e anuncio sorpresivo ...

Wake up call duro pa henter Aruba

Mescos cu henter Aruba, nos tambe ta den shock. Esaki ta e tipo di ...

Corupcion ta existi den tur pais

Corupcion ta tur caminda. Esunnan cu ta sigui noticia internacional, o pa keda mas ...

Bunita fiesta di inaugura brug…

Siman pasa a termina cu un tremendo fiesta y show, pa inaugura e brug ...

Venezuela ta bay logra sin lucha arma…?

E crisis na Venezuela ta keda tene nos den suspenso. Nada straño si nos ...

editorial 2_15_1.jpg

Reapertura ta bay cambia San Nicolas? Bida nobo ta exigi mucho mas

E acuerdonan encuanto reapertura di e refineria por trece cambio riba diferente tereno. Un ...