Centenares di manifestante a reuni pafo di mansion di e gobernador y edificio di Capitol dialuna pa exigi renuncia di e lider di e teritorio Mericano, y pa protesta e descubrimento recien di suministro pa desaster aparentemente lubida entre teremotonan continuo.
Alrededor di 600 persona a bati riba wea y algun a zwaai bandera di Puerto Rico, mientras un di nan tabata grita ‘Wanda, entrega e suministronan pa desaster!’
E escena tabata un recordatorio di cuminsamento di protesta cu a escala durante berano y a conduci na renuncia di ex- gobernador Ricardo Rossello, cu manifestantenan un biaha mas primintiendo di keda riba caya te ora Wanda Vazquez tambe renuncia.
E protesta e siman aki a yega un dia despues cu Vazquez a despedi dos oficialnan di rango halto den su administracion – secretario di vivienda, Fernando Gil, y secretario di departamento di famia, Glorimar Andujar – riba e falta di informacion relaciona cu colecta di ayudo y centronan di distribucion. Diasabra el a despedi director di maneho di emergencia, Carlos Acevedo.
Vazquez a bisa cu el a perde confiansa den e oficialnan aki despues di e descubrimento di un bodega den ciudad sur di Ponce, yen di suministro pa desaster di tempo cu horcan Maria a dal e isla na september 2017.
El a manda un investigacion riba e incidente y a bisa cu no lo tin enhuiciamento di un multitud cu a kibra den e bodega diasabra pa distribui e suministronan na personanan afecta pa e teremoto recien, di magnitud 6.4 cu a costa bida di un persona y causa daño calcula na $200 miyon.
Oficialnan a bisa cu un reporte preliminar riba e investigacion a completa laat dialuna, y Vazquez a bisa cu e tabata entregando esaki na Departamento di Husticia di e isla pa un investigacion mas profundo riba recomendacion di Bureau di Investigacion Special di Puerto Rico.
