Mantencion di parke Jaburibari ta cuminsa otro siman

Pa basta tempo tin hopi keho riba e estado di Parke Curason, miho conoci como parke Jaburibari. Tur dia, specialmente anochi un gran cantidad di hende ta uza e parke aki pa recreacion y deporte.

Un fuente ta conta nos cu e parke ta falta asina hopi mantencion cu tin parti cu no ta sigur mas. Tambe tin un fuente cu ta bisa cu e ‘regalo’ di Johan Cruyff, esta e cancha di futbol cu e mes a habri na 2006 hunto cu e tempo ey reina Beatrix, tambe ta mal manteni. Un di e causanan ta cu e placa reserva pa e mantencion a wordo horta pa un persona den e fundacion encarga.

Bon Dia Aruba a tuma contacto cu director di Fundacion Facilidadnan Deportivo (FFD) Junior Tromp pa clarifica cual ta e plannan actual pa mantene parke Jaburibari. Segun sr. Tromp, conhuntamente cu Cruyff Foundation lo tuma iniciativa di haci mantencion riba algun parti di e parke cuminsando otro siman.

Sr. Tromp ta splica cu ‘Cruyff Foundation lo bin cu yerba nobo pa e cancha di futbol for di Hulanda.’

Cruyff Foundation ta un fundacion cu tin como meta pa duna muchanan e oportunidad pa practica deporte y ta activo. Nan a pidi un oferta for di e contratista cu a instala e cancha den pasado. Nan lo evalua e estado di e cancha y wak kico mester sosode.

Sr. Tromp ta splica cu di banda di FFD, den cuadro di mantencion di parke Jaburibari nan lo percura pa e edifionan haya pintura nobo. Tambe lo ‘pressure wash’ e parke.

Nos lo traha tambe riba e parti di iluminacion y haci mantencion di e mashinnan pa exercise. Tin parti di e parke cu no ta wordo ilumina bon y pa esaki nos lo bin cu mas iluminacion. Pa e mashinnan nos lo haci un mantencion y nos kier agrega mas mashin. Nos kier pone mas sombra banda di e mashinnan pa asina hacie mas uzabel ora tin calor.”

No ta cera parke

E plannan cu FFD ta encera cu lo traha den fase. “Nos lo hacie di un manera cu e personanan por sigui uza e parke mientras cu e mantencion ta tuma luga. No ta asina cu nos lo mester cera e parke pa 1 luna pa esaki.”

E fundacion ta actualmente ocupa cu varios proyecto di mantencion y renobacion di otro facilidadnan deportivo. Entre otro, Frans Figaroa, Joe Laveist, y piscina olimpico Roly Bislik.

You May Also Like

CENSO : Cambio di proceso den casonan di perde paspoort

Den pasado den casonan di perdida di paspoort of casonan di paspoort horta, ciudadanonan ...

Tres partido a abstene di participa den debate pa comunidad Latino

Ayera nochi a tuma luga Debate Democracia Aruba 2017 na Cas di Cultura sin ...

OM: No por haci nada paso bandera cu a uza na manifestacion no ta di Aruba

ORANJESTAD – Pa straño cu e por zona, pa Ministerio Publico (OM) e bandera ...

Partidonan den coalicion a yega na acuerdo riba reparticion di carteranan

Segun informacion di formador y lider di partido MEP, Evelyn Wever- Croes, e coalicion ...