Aruba Wastewater Sustainable Solutions (AWSS), manera anuncia den un conferencia di prensa dia 28 di augustus, ta implementando y haciendo test riba e sistema nobo cu a instala pa asina stabilisa e operacion di e planta.
Den futuro cercano lo sigui inverti responsablemente pa asina sigui mehora e calidad di e awa preto cu ta wordo procesa na Bubali pa asina e por sigui wordo reusa responsablemente.
“Nos ta anuncia cu desde di 20 November 2025, AWSS lo cuminsa un programa di mantencion preventivo cu lo dura 10 dia riba ekiponan principal cu ta trata e asina yama awa preto,” AWSS a bisa den un comunicado di prensa. “E mantencion aki ta wordo realisa prome cu e temporada halto di turismo di Aruba, pa sigura un funcionamento mas optimo durante e periodo mas druk di tur aña. Mas turista kiermen mas fluho di awa preto pa e planta na Bubali, cu por cierto mayoria hotel y comercio ta conecta via di e sistema di riool.”
E trabaonan preventivo ta esencial pa mantene confiabilidad, seguridad, y eficiencia di e proceso di trata awa preto na un nivel halto, segun e comunicado. AWSS ta sigura cu e operacion normal di e planta lo sigui sin interupcion durante e mantencion. Durante e periodo aki lo por tin molester di holor temporario den e zona rond di e planta na Bubali.
AWSS ta sigura tanto na comunidad como na sector comercial cu tur medida necesario ta wordo tuma pa minimalisa e molester. E molester aki ta normal durante e tipo di trabaonan aki y a pesar di e inconveniencia, no ta representa ningun riesgo pa salud.
“Nos ta gradici di antemano e pasenshi y comprension di nos comunidad y sector comercial mientras cu nos ta completa e trabaonan importante aki,” segun directiva di AWSS. “Haciendo e mantencion preventivo prome cu temporada halto di turismo ta permiti nos ta sigura un servicio di trata awa preto di calidad y sostenibel pa Aruba.”
E trabaonan ta premira di keda completa pa 30 di November 2025.
