Marcha opositor no a impresiona… Y awor, siguiente paso…?

Loke tabata nos impresion di antemano, cu no tabatin tanto animo bao di e base di e partido grandi den oposicion, a resulta corecto. Un grupo di entre 300 pa 400 persona como expresion di mal contento contra un gobierno no ta impresiona di ningun manera, y a duna esnan di e partido cu a keda cas razon pa haci esey.

Di e conversacionnan cu nos tabatin di antemano cu algun sostenedor di e partido, di cual ningun a participa na e manifestacion, a resulta cu nan no tabata mira e accion como oportuno, na e momento aki den e periodo di gobernacion. Sin embargo, e lider di partido si tabata haya cu esaki ta e momento pa cuminsa cu hiba oposicion di e forma aki. Despues di e presentacion sumamente pober aki, e pregunta lo ta kico pa haci seguidamente.

Pa cuminsa, lo mester bin un reflexion tocante e situacion actual na Aruba. Nos no ta pretende di hacie pa nan, pero por expresa loke nos ta pensa. Por ehemplo e tema di ‘kiezersbedrog’. Esaki ta semper un cuchiu di dos banda. Bo ta acusa, pero net abo cu a goberna durante bon parti di e añanan desde 1986 ta hopi vulnerable den esaki, pasobra e mesun metodo ey bo mes conoce di cerca. Esey no ta kita validez di cierto tema cu a bin dilanti den e consideracionnan expresa relaciona cu e manifestacion. Por ehemplo e promesa di baha e edad di pension. Esey e actual minister presidente por wel di a priminti, pero pa bon di Aruba miho nunca esey no bira realidad. E situacion cu nos ta aden tin tambe factor cu no ta culpa di ningun partido, pero si ta responsabilidad di e partido cu ta den gobierno pa atende esaki. Manera e grupo creciente di hende di edad pa ken nos mester percura pa nan tin un entrada satisfactorio na edad halto. Ta facil pa den campaña en berdad bisa cu ta bay baha edad di pension, pero bo sa masha bon cu bo no por. Triki di campaña? Si, pero bo ta pone bo mes manera un ‘sore loser’ si bo ta bay keha y maha tocante esaki. Simplemente mayoria di hende no ta bay perde tanto rosea ni palabra cu e tema aki, pasobra nan sa hopi bon cu mester a haci algo y e partido actualmente den oposicion a haci esaki tambe; solamente no spera elogio como politico pa medida, pasobra esey e ta, di e votadornan cu mester paga e cuenta.

Algo similar ta pasando actualmente. Un mayoria di e electorado a vota na e otro banda, y esey a facilita un cambio di gobierno. Nos no gusta usa frasenan manera “e pueblo a vota pa…” Ora di vota no ta existi un factor cu yama ‘pueblo’ pero simplemente miles di ciudadano individual cu ta vota manera nan mente y curason ta bisa nan. Hopi hende, e gran mayoria tabata na altura di e situacion financiero cu e gobierno di e partido berde a causa den ocho aña y no a keda straña ora e gobierno nobo a anuncia medida pa coregi e rumbo cu nos tabata bayendo aden. Esey ta implica cu tin un malcontento generalisa? Nos ta duda esey, aunke bo no lo haya ningun hende ta baila di contento cu gobierno a tuma medida, cu e consecuencia cu bida a bira mas caro. Nan por a haci algo diferente? Si. Por ehemplo, nan por a corta mas fuerte den gastonan di personal, poniendo menos peso riba e entradanan chikito, di esnan cu ta gana salario minimo o un tiki mas. Pero esey e partido den oposicion no a propone, y esey pasobra nan tambe tin e cuerpo di empleado publico como unico ‘baca sagrado’ cu nos conoce. Hamas nan ta bay propone pa busca e austerisacion internamente, y ta prefera pa e consumidor, incluyendo e turista pero tambe e famoso ‘homber chikito’ paga e cuenta aki. Por lo tanto, si tabatin un continuacion di e gobierno di 2009 – 2017, anto nos lo a haya un maneho diferente? Nos ta duda.

Kico si mester sucede den e periodo di gobernacion, awor cu ta obvio cu e lider di partido no tin e forsa convocatorio cu e tabatin? Atrobe, nos no por mira e asunto for di e perspectiva partidario, pero si for di e perspectiva di comunidad en general. Democracia tin semper di gana cu un oposicion fuerte, pero fuerte di berdad. Esey ta implica traha duro, haci investigacion, bin cu propuesta cu por competi cu esunnan di gobierno. Esey ta exigi hopi mas trabao cu percura pa tur siman e corantnan y otro medionan ta haya opinion di tal o cual politico pa publica, cu por lo general ta carece bastante di substancia. Henter parlamento por haci un miho trabao den e sentido aki.

Mirando e situacion den cual nos ta hinca awe, sin cay atrobe den un ‘blame game’, loke ta mas importante cu e promesanan no cumpli, ta loke gobierno actual lo mester haci pa saca nos for di e situacion aki. Nan a haci e promesa di saca nos for di e abismo; miho nan cumpli cu e promesa ey si.

 

You May Also Like

Mas espacio pa bicicleta?

Diadomingo pasa Aruba completo a haya un ‘wake up call’ fuerte, cu un accidente ...

Aña 2017 uno di les duro

Ban spera cu nos a siña algo Aña 2017 ta yegando na un conclusion ...

Tin screening di ministro ora nan drenta

Y ora nan sali awor….? Bao presion Hulandes nos a haya nos ta introduci ...

Nos ta cla pa implementa e-government?

Nos a haya e noticia recientemente cu gobierno ta trahando duro pa analisa y ...

Reportahe financiero a bira arma den bataya electoral?

Gobierno a tarda pa duna parlamento rapport 1-2017 Silenciosamente, gobierno pa di tantisimo biaha ...

Bon transporte publico ta exigi pensamento innovativo…

Nos transporte publico no ta duna servicio satisfactorio. Un conclusion fuerte cu sin embargo ...