(Infobae) – E oficial cu ta dirigi diplomacia di Merca a splica pa legisladornan cu e politica exterior pa e pais Caribeño lo enfoca riba fortalece institucionnan, recuperacion economico y un sistema democratico inclusivo.

E Secretario di Estado di Merca, Marco Rubio, a declara e dialuna aki dilanti di Senado cu Administracion di Donald Trump no tin plania pa realisa operacion militar nobo na Venezuela, pero el a bisa cla cu Washington ta warda e posibilidad habri si surgi menasa directo contra nan interesnan di siguridad.

Durante un audiencia dedica na splicacion di e strategia di Merca despues di e operacion di 3 di januari na e pais Caribeño, Rubio a insisti cu e prioridad actual no ta un escalacion militar, aunke el a subraya cu e presidente, como comandante, “nunca ta exclui su opcionnan” dilanti di posibel riesgo.

“Mi por sigura cu certidumbre completo cu nos no ta preparando, ni nos no tin e intencion, nos no ta spera cu nos mester tuma ningun accion militar na Venezuela na ningun momento”, Rubio a declara dilanti di e legisladornan. Sinembargo, el a aclara cu e posicion aki no ta nifica un renuncio absoluto di uso di forsa.

“Si un fabrica di drone Irani aparece y ta menasa nos forsanan na region, e presidente ta retene e opcion pa elimin’e”, el a duna como ehempel durante su presentacion. Segun el a splica, e enfasis actual ta riba un proceso politico diferente di esun cu a predomina durante mas cu un decada di impasse diplomatico. “Tur cos ta desaroya riba un trayectorio hopi diferente awor”, el a sostene.

Rubio tambe a trata e debate tocante e rol di Congreso den posibel operacion militar. Ora a puntr’e si e administracion lo informa e legisladornan den caso di un accion arma atrobe, el a contesta cu no ta anticipando ningun operacion sosteni cu un presencia prolonga di forsanan di Merca na Venezuela. P’esey, el a indica cu e no ta considera aviso previo na e Capitol necesario den e scenario cu Cas Blanco ta maneha actualmente.

E diplomaat tambe a defende e legalidad y e naturalesa di e operacion di 3 di januari, cu a termina cu derocamento y captura di e narco-dictador Nicolas Maduro y su esposa, Cilia Flores, ambos busca pa Husticia di Merca pa cargonan relaciona cu trafico di droga. Segun Rubio, e no tabata un guera ni un ocupacion, sino un accion hudicial. “E no tabata e ocupacion di un pais stranhero, sino un operacion pa aresta dos persona busca pa Husticia di Merca”, el a

argumenta.

Den e contexto aki, el a sigura cu e presencia militar di Merca na Venezuela ta minimo y ta limita na marina encarga di siguridad di embahada. El a agrega cu un accion arma nobo, leu di facilita obhetivonan politico, por ta contra-productivo. “Accion militar lo retrasa e otro obhetivonan. Esaki no ta yuda e transicion ni e recuperacion”, el a afirma, mientras el a reitera cu un intervencion lo solamente ser considera dilanti di un menasa cu, segun e, “nos no ta anticipa na e momento aki”.

Durante e audiencia, Rubio a coloca e politica pa Venezuela den un punto historico mas amplio y a menciona proceso di transicion democratico den otro paisnan. E Secretario di Estado a calcula cu den un periodo di “tres, cuatro of cinco luna” mester observa progreso substancial cu respet na e situacion actual. “Probablemente lo mi por duna un miho contesta ora porfin nos tin hende riba tereno”, el a bisa, den referencia na despliegue diplomatico, incluyendo e embahador.

El a enfatisa tambe e diferencia entre mantene contacto telefonico cu Delcy Rodríguez y desaroya trabao mas profundo cu autoridad local y sociedad civil. “Prome cu esaki, e situacion tabata stanca. Nos a pasa 14 aña tratando di cambia e dinamica na Venezuela”, Rubio a bisa, cu a considera cu e momento actual ta habri un oportunidad sin precedente. “Esaki ta e prome biaha den mas cu un decada cu nos ta mira e posibilidad di cambia e condicionnan di sociedad”, el a declara, destacando como obhetivonan central e recuperacion di bida civico y economico di e pais.

Pa loke ta e scenario politico interno di Venezuela, Rubio a indica cu lider di oposicion María Corina Machado, premio Nobel di Paz, “por ta parti” di e proceso di transicion. Sinembargo, el a reconoce cu control efectivo di arma y institucionnan di Estado ainda ta den man di aparato hereda di Chavismo.

“Cu nos kier of no, control di arma y institucionnan gubernamental ta den man di e regimen”, el a expresa dilanti di e senadornan. E diplomaat di Merca a splica cu e obhetivo final di e administracion Trump ta logra “un Venezuela amigabel, stabiel, prospero y democratico”. Como señal di cooperacion inicial, el a menciona e discusion tocante un reforma di Ley di Hidrocarbon cu, segun e, lo ta “eradicando algun di e restriccionnan di Chávez” den sector energetico.

Rubio tambe a destaca cu, pa prome biaha den mas cu dos decada, tin combersacion formal tocante lucha contra trafico di droga y influencia di actornan externo manera Iran, China y Rusia. “Tin algun atraso y trampa, pero nos a establece un relacion respetuoso y productivo den e fase di stabilisacion aki”, el a afirma. Na e punto aki, el a specifica cu e entrada deriva di benta di petroleo actualmente ta ser deposita den un cuenta na Qatar, aunke el a anuncia cu den futuro esaki lo ser maneha for di Merca door di e Departamento di Tesorera.

Ora a ser cuestiona tocante posibel acusacion contra Delcy Rodríguez, Rubio a aclara cu e cabes di regimen Chavista no ta acusa di trafico di droga dilanti di Husticia Mericano, al contrario di Maduro. El a bisa cu e ta consciente di versionnan cu ta circulando den reportahenan, pero el a subraya cu, te awor, no tin ningun acusacion formal contra dje.

E audiencia a ser marca pa un incidente ora un manifestante a interumpi e sesion for di galeria, mustrando un borchi y gritando “kita man for di Venezuela y Cuba”. Agentenan di seguridad a retira e homber, mientras e presidente di Comite di Relacion Exterior, e senador Republicano Jim Risch, a adverti cu e lo ser prohibi di drenta e sala pa un aña.