(AFP) – Lider di oposicion Venezolano, Maria Corina Machado a yega Cas Blanco ayera pa combersacionnan cu presidente Mericano, Donald Trump, kende a lag’e un banda desde a captura Maduro, y kende abiertamente ta tras di su premio Nobel di Paz.
Bistiendo un bachi, Machado a yega compleho di Cas Blanco na Washington den un SUV y tabata escolta pa loke oficialnan a bisa tabata un lunch tras porta cera cu Trump.
Machado ta bay purba di agrada Trump un dia despues cu el a usa terminonan di elogio pa describi su prome yamada conoci cu presidente interino di Venezuela, Delcy Rodriguez, confirmando su satisfaccion cu e aliadonan di Maduro kedando na poder pa awo.
Desde e operacion militar Mericano dia 3 di januari cu a captura Maduro, Trump a bisa cu Machado “no tin e sosten” na Venezuela pa ta su lider, un golpi enorme contra e politico di 58 aña.
Pero Machado a ofrece di comparti su premio Nobel cu Trump, y e presidente a indica cu Machado por dun’e na dje ora nan reuni – a pesar cu Instituto Nobel Norugeo a bisa cu no por transferi su premionan. “Mi ta compronde cu e kier haci esey. Esey lo ta un gran honor,” Trump a bisa den un entrevista recien cu Fox News.
Trump tabata rabia pasobra e no a ricibi e premio despues cu comite Nobel a dun’e na Machado pa su activismo den buskeda di democracia na Venezuela, a pesar di menasa di prison di gobierno di Maduro.
Despues cu Machado a presenta na Oslo luna pasa pa colecta su premio Nobel – despues di un escape atrevido riba boto – e no a bolbe Venezuela, y ta keda den exilio efectivo.
Desde captura di Maduro, Trump a bisa cu Merca ta bay “maneha” Venezuela pero a parce contento di laga Rodriguez keda na poder.
Diaranson, Trump a bisa cu Rodriguez ta un “tremendo persona” y a elogia e “tremendo progreso” di Venezuela.
Rodriguez a bisa cu e yamada tabata “productivo y cordial” y caracterisa pa “respet mutuo.”
“Hopi topico a keda discuti,” Trump a bisa riba rednan social, “inclyendo azeta, mineral, comercio y mas cu claro seguridad nacional.”
Notablemente ausente tabata cualkier mencion di un transicion politico, un asunto cu Washington a pone un banda pa enfoca riba su demandanan economico, particularmente acceso na petroleo Venezolano.
Machado, kende a campaña pa añas pa caba cu dictadura di Maduro, ta bay busca durante su lunch cu Trump pa trece e asunto di transicion democratico back den frente di discusion.
Oposicion Venezolano a argumenta y presenta evidencia cu Maduro a horta eleccion na 2024 for di candidato di partido di Machado, Edmundo Gonzalez Urrutia – declaracionnan cu Washington ta sostene.
Autoridadnan electoral Venezolano, considera aliado di Maduro, nunca a publica datonan di e voto.
Centenares di persona a keda aresta den protesta despues di eleccion, y mientras Gonzalez Urrutia a huy pa Europa pa asilo, Machado a keda na e pais na un ubicacion secreto, apareciendo intermintentemente den rally.
Bao presion di Washington, Venezuela a libera decenas di prisonero politico siman pasa, maske centenares ainda ta keda cera.
