Marriott hotel a hala aden su caso contra mediador di gobierno

ORANJESTAD – Ta asina cu despues cu Marriott hotel a entabla un caso contra mediador di gobierno tocante un referendum solicita pa sindicato FTA pa e trahadonan di Ruth’s Chris Steak House, finalmente e hotel menciona a dicidi di hala e caso aki paden.

Departamento di mediador di gobierno a haya informacion cu diamars ultimo di parti di e abogado di e compania Marriott -unda e referendum mester tuma luga na Ruth’s Chris Steak House- cu nan a bay corte pa informa hues cu nan ta hala nan caso aden. Nan a considera cu e caso aki no ta necesario.
Segun mediador di gobierno, finalmente e hotel aki por a constata cu e maneho pa loke ta e no participacion den e referendum di trahadonan cu ta den nan periodo di prueba di 60 dia laboral, ta uno constante. Pues nan sa cu hues no lo bay opina di otro forma.

Sr. Pontilius a declara na Bon Dia Aruba cu e departamento aki a tuma un decision dia 21 di december caba cu debi cu e caso aki mester tuma luga mañan 11 di januari, cu e referendum pa e trahadonan di Marriott hotel na servicio di Ruth’s Chris Steak House ta wordo celebra dialuna dia 14 di januari di 10’or pa 11:30 di mainta na oficina mes di mediador di gobierno na Dr. Henriquezstraat 19.

“E ta un maneho hopi cla y conoci pa tur dunado di trabou. Pues e no ta nada nobo y consecuentemente aworaki e trahadonan ta bay emiti nan derecho di voto,” el a declara na e matutino aki. Un grupo di alrededor di 30 trahado ta na servicio di e restaurant menciona di cual mas of menos 24 di nan lo tin derecho di voto.

Antecedente
Ta asina e referendum di e trahado di Marriott hotel na servicio di Ruth’s Chris Steak House cu mester a tuma luga diahuebs 21 di december ultimo, pero el a keda posponi debi cu e compania Marriott Ruth’s Chris Steak House Restaurant caminda e referendum mester a tuma luga a pidi hues pa trata e caso aki. Nan tabata di opinion cu Mediador di Gobierno a exclui dos trahado cu ta traha den e restaurant menciona. Nan ta haya cu e trahadonan aki cu ta ariba nan 60 dia di prueba a wordo exclui for di nan lista di votadonan.

Na e ocasion ey, sr. Pontilius a yega di expresa na Bon Dia Aruba cu den e reunion cu nan a yega di sostene den e preparacion di e referendum, e compania a informa cu nan a tuma cuater trahado den servicio dia 4 y 5 di december. Na e momento ey, ya caba e referendum tabata den un proceso pa tuma luga. El a yega di splica cu e maneho ta cu e trahadonan den 60 dia di prueba no ta participa den niun referendum.

E maneho aki ta data for di decada di añanan 80; y e ta uno pa proteccion di e mesun trahadonan cu den e momento ey ta den periodo di prueba. Un periodo cu e trahado mes ta vulnerabel pa eventualmente perde su trabou pa nan afiliacion sindical.

You May Also Like

Pa ATIA ‘economia shinishi’ ta keda un punto di atencion pa 2019

Dos punto cu e gremio di dunado di trabou, ATIA a yega di vocifera ...

“E solucion ta pa sinta manera hendenan madura na mesa”

Ayera minister di Financia, Angel Bermudez a declara na Bon Dia Aruba cu basicamente ...

aruba little league.jpg

World Series Little League: Aruba ta hunga contra Corsou den semi final

Na e momento aki Aruba ta hungando contra Corsou pa un luga den e ...

Restauracion di mangel na comienso di Spaans Lagoen

Ayera trabounan di restauracion a inicia riba area di mangel parti panort di Spaans ...

Dowers: “Bo ta drenta y sali di prizon a base di ley”

Minister di Husticia Arthur Dowers a tuma un rato ayera durante su conferencia di ...

Fund cancer prostaat (2).jpg

Hopi hende homber tin miedo di e “dede”

E luna aki Fundacion Contra Cancer di Prostaat ta bay dedica su mes pa ...