Fundacion Mary Joan Breast Cancer Support Group ta anuncia su campaña grandi pa colecta y recauda fondo durante luna di october proximo. E meta ta pa yega na e suma di 200.000 florin esaki ta pa por cubri e gastonan operacional di nos proyecto pa aña 2026 cu ta e “Chekeo den bario”.

Cancer di pecho ta sigui aumenta mundialmente y Aruba den e caso aki, no ta un excepcion. Anualmente na nos isla ta constata mas o menos 110 caso nobo di cancer di pecho.

Fuera di e impacto fisico, e malesa ta trece retonan grandi riba tereno emocional y social, manera miedo y problema den relacion.

Durante e tratamento of despues di esaki, hopi hende muhe ta haya falta di un red social fuerte. Aki ta unda cu Mary Joan Foundation tin un tarea pa yuda tur esnan concerni.

Pa por yega na e suma di 200 mil florin, ya caba nos tin algun proyectonan den ehecucion y nos ta cera den luna di October cu e colecta.

Algun proyecto den ehecucion

  1. Deteccion tempran: Nos ta curasha pa un control mensual y screening cada seis luna. Deteccion tempran ta pone menos presion riba e tratamento y ta aumenta e chance pa un recuperacion total.
  2. Proyecto The Pinkest Office of the Year: Negoshi y organisacion nan lo pone un buzon special pa colecta den nan oficina pa stimula donacion. E organisacion cu logra e contribucion di mas grandi ta keda eligi como The Pinkest Office of the Year.
  3. Proyecto Sugar Scrub: ‘Polish Your Skin, Empower the Cause’. Nos mes di Mary Joan Foundation ta traha e sugar scrub nan aki.

Esaki nan lo ta na benta pa un suma di 25 florin. E sugar scrub nan ta bin bunita empaketa y ta ideal pa duna como un regalo.

E ganashi genera di e proyecto aki ta bay totalmente pa e programanan pa cancer di pecho.

  1. 18 years anniversary: Pa nos celebracion di 18 aña di existencia Mary Joan Foundation lo organisa un Seso Sport. E actividad aki lo tuma lugar dia 26 di September proximo na Centro di Bario Playa Pabou. E Seso Sport lo cuminsa pa 7or di anochi. Inscripcion a habri caba.
  2. Fin di siman pa colecta na luna di october: Tur Diasabra y Diadomingo diferente organisacion, boluntario y grupo nan lo bay colecta na diferente parti nan di Aruba. Pa esaki tambe nos di Mary Joan Foundation kier a haci un suplica na e pueblo di Aruba completo pa aporta y sostene e bon causa aki. Union ta haci forsa.

Bo sosten ta indispensabel

E subsidio di 60.000 florin cu e fundacion ta ricibi anualmente pa basta tempo caba no ta cubri tur e gastonan necesario manera entre otro gastonan di psicologo, peluca oncologico, bishita na cas of hospital, charla nan na diferente compania y campañanan di conscientisacion.

P’esey nos ta pidi famianan, negoshinan, organisacionnan, asociacionnan pa durante luna di october habri nan curason y contribui cu nos luna di colecta. Solamente hunto nos por promove deteccion tempran, ofrece ayudo emocional y social y realisa nos proyecto ‘Chekeo den Bario’ pa 2026.

Pa mas informacion y inscripcion por manda un email na maryjoanfoundation@setarnet.aw of yama na 588-9999