Mas cumplimento… Menos ‘aanwijzing’

Resultado di e proximo reunion di Conseho di Ministro di Reino, unda ta trata un eventual ‘aanwijzing’ pa gobierno di Aruba cambia su presupuesto 2022, no ta sigur ainda. E motibo ta cu, manera ta e intencion di e proceso di aanwijzing, e pais bao supervision tin un oportunidad pa mustra kico nan ta haci pa cumpli cu e exigencianan haci, den cual caso no tin motibo pa duna e pais un tal instruccion. Simultaneamente gobierno di e isla concerni tin oportunidad di entrega su manera di mira e asunto, e asina yama ‘zienswijze’ cu ta contene e puntonan cu cual nan no ta di acuerdo, y e puntonan cu cual si a, of lo cumpli.

A base di esey gobierno di Reino tin un decision pa tuma, pero pakico e resultado no ta sigur ainda? Pasobra gobierno di Aruba a cumpli parcialmente cu e requisitonan cu a formula, y ta spera cu esaki por ta suficiente pa gobierno di Reino, cu un mayoria Hulandes semper, lo dicidi cu e esfuerzonan tabata suficiente y no ta bay obliga gobierno di Aruba pa cumpli al pie de la letra cu tur exigencia. Esey por ta e caso, pero nos no ta dispone di suficiente base concreto pa bisa esey. Loke ta conoci ta e cifranan general di cambio cu enberdad gobierno di Aruba a haci pa trata di ‘meet halfway’ cu Hulanda den e asunto. Kico ta e cambionan?

En corto, a reduci e deficit inicial di presupuesto 2022, di Afl. 227 miyon te na Afl. 148 miyon. Despues a logra otro reduccion mas, cu a pone e deficit na Afl. 112 miyon. Esey ta loke gobierno di Aruba mes a anuncia. Pero kico tabata e recomendacion di CAft? Esaki tabata, segun e recomendacion di september ultimo, un deficit maximo di Afl. 84 miyon pa Pais Aruba, y cu algun recorte extra, Afl. 75 miyon pa e sector colectivo. Un diferencia final di alrededor di Afl. 28 miyon entre loke gobierno di Aruba ta hiba na mesa den dicho reunion, y loke CAft a formula como recomendacion final. Pregunta: pa esaki mester bay ‘cu cuchiu na mesa’? Ta parce nos cu no, pero esey no ta e punto clave. E punto clave ta: pakico e cosnan aki mester yega asina leu, si di antemano gobierno di Aruba tambe sa cu di tur manera, ‘por la buena o por la mala’, nan lo mester cumpli. Y e motibo pakico nan mester cumpli ta cu nos pais ta bao di supervision financiero y no ta gobierno di e isla ta dicidi kico ta prioridad.

Pero tin un motibo mas pakico tur e baina aki no tabata necesario. Esey ta cu practicamente gobierno di Aruba no a baha gasto…, loke a haci ta aumenta entrada, pa colmo riba indicacion di CAft… Esaki merece un aclaracion: entre e propuesta di gobierno pa e presupuesto complementario 2022, y loke CAft ta duna, si inclui nan recomendacion, nos por mira cu CAft ta propone solamente un reduccion di Afl. 16 miyon den bienes & servicio, y por lo demas ta laga tur e otro categorianan di gasto manera nan ta: gasto di personal mescos cu gobierno, igualmente interes riba prestamo, subsidio y otro transferencia… Unda e diferencia ta anto? Den e entrada unda CAft ta haya cu gobierno di Aruba ta calcula su entradanan demasiado abao y ta proyecta un suma di Afl. 47 miyon extra pa fin di e aña aki… That’s it, mas e pleito no ta…, na e momento aki anto. Pasobra na caminda gobierno di Aruba enberdad a baha di e 227 miyon di deficit inicial, te na menos di 50% di e suma ey.

Loke por surgi awor naturalmente ta e pregunta: “Y ta pesey nos mester a pasa den tur e lunanan aki di tension, di comentario negativo, di genuino politiqueria?” Nos ta kere cu nos no mester a pasa den henter e proceso aki, pero nos ta imagina cu gobierno, y e partidonan cu ta sosten’e, no ta pensa mescos. Esey principalmente pasobra sinta na mesa y yega na acuerdo di biaha manera hende grandi, den e ambiente politico ta ser mira como debilidad… Nan no ta desea pa mira nan como ‘losers’ cu a bay di acuerdo demasiado liher cu loke nan a palabra. Naturalmente tin di nos cu ta mira esey como un virtud, cumpli cu bo palabra, pero den politica esey no ta asina.

Ora nos mira e pleitonan cu nos ta pasa aden, esaki ta loke nos ta mira na un isla manera Puerto Rico tambe, cu ‘per capita’ tin un debe mes grandi cu Aruba, y a haya supervision di Congreso Mericano, pa evita cu e isla ta bay bancarota. Sa pasa un siman, pero no ta pasa un luna sin cu tin un of otro ‘issue’ cu e hunta di supervision di Congreso. Y mescos cu cerca nos, finalmente e supervisor ta impone, no e supervisado…

Den retrospectiva, loke nos ta mira cerca nos ta cu, gobierno di Aruba a cuminza fuerte, defendiendo su presupuesto, y gradualmente ta cede tereno, a sabiendas cu finalmente e decision final no ta di nan. Ey nos a yega e siman aki, cu un deficit cu ta un poco mas halto cu loke CAft finalmente ta haya recomendable. Sea tin un ‘aanwijzing’ chikito of no, nos no ta libra di e show di forza, di indignacion, fingi o real; e ta keda ripiti tanten nos tin supervision…