(AP) – Mas di mil barista di Starbucks na 75 tienda di Merca a welga diadomingo pa manifesta contra un codigo di bistimenta nobo di e compania, un sindicato cu ta representa e gigante su empleadonan a bisa diaranson.
Starbucks a implementa limitenan nobo cuminsando dialuna tocante kico e baristanan pro bisti na trabao. E codigo di bistimenta ta rekeri pa e empleadonan den tiendanan opera pa e compania y licencia na Merca y Canada bisti blusa of t-shirt preto y khaki cu jeans preto of blauw.
Bao e codigo di bistimenta anterior, nan por a bisti un rango mas amplio di colornan scur y t-shirt of blusa cu diferente patron riba nan, Starbucks a bisa cu e reglanan nobo aki lo haci e color berde di e uniform resalta mas y crea un sentido di familiaridad pa e clientenan mientras e ta purba establece un ambiente mas caluroso y familiar den su tiendanan.
Sinembargo Starbucks Workers United, e sindicato cu ta representa e empleadonan di 570 di Starbucks su 10,000 sucursal a bisa cu e codigo di bistimenta mester ta suheto na negociacion colectivo. “Starbucks a perde su caminda. Na luga di tende e baristanan cu ta haci e experiencia di Starbucks loke e ta, nan ta enfoca riba e cosnan incorecto, manera e implementacion di un codigo di bistimenta cu ta trece restriccion,” Paige Summers, supervisor di Starbucks na Maryland a comenta. “Clientenan no ta worry cu ki color bo paña ta ora cu nan tin cu warda 30 minuut pa un koffie.”
Summers y otronan tambe a critica e compania pa bende paña cu e marca di Starbucks riba un website interno cu e empleadonan no por usa mas pa trabao. Starbucks a bisa cu e lo duna e 2 blusa of t-shirt preto na cada un di e empleadonan na momento cu el a anuncia e codigo di bistimenta nobo.
Starbucks a bisa diaranson cu e welga a tin impacto minimo riba su operacionnan. Segun e mesun sindicato su propio cifranan, menos di 1% di e empleadonan di Starbucks ta participando den e welganan, y den algun caso e welga a causa cu tiendanan mester a cera pa mey ora segun e compania.
“E lo a ta mas productivo si e sindicato lo a pone e mesun esfuerso cu nan a pone den manifesta contra bisti t-shirt preto na trabao den sinta back na pesa,” Starbucks a bisa den un declaracion. “Mas di 99% di nos tiendanan ta habri awe dunando servicio na e clientenan – di mesun manera cu henter e siman.”
