Mas hende desemplea cu vacatura na Hulanda pa prome biaha den 4 aña

(NLTimes) – Pa prome biaha den cuater aña, tabatin mas persona desemplea cu vacaturanan habri na Hulanda den e di tres kwartaal. Door di un bahada di vacatura y un aumento di desempleo, e tension riba mercado laboral a baha. Pa cada 100 persona desemplea, tabatin 97 vacatura, Estadistica Hulanda (CBS) a informa.

E cantidad di vacatura a baha cu dos mil den e di tres kwartaal te na 387 mil, mientras cu e cantidad di hende desemplea a aumenta cu 13 mil pa 399 mil. Mayoria di nan, 84%, tin menos cu un aña sin trabou.

E cantidad di vacaturanan a bin ta bahando poco poco casi tur kwartaal pa tres aña, mas debi na dunadornan di trabou cu ta acudi na digitalisacion, automatisacion, of otro maneranan di maneha scarsedad di personal cu na un fluho di trahado.

Mas cu mita di e vacaturanan habri ta den e sectornan di benta, cuido di salud y servicio di negoshi. Tambe tin un scarsedad significante den e sector di construccion. E tasa di vacatura, e cantidad di vacatura pa cada mil trabou, ta esun di mas halto den e industria di construccion na 79. E tasa di vacatura nacional a baha di 44 pa 42 ultimo kwartaal.

“Desempleo a subi den e ultimo lunanan, pero principalmente pasobra mas hende a cuminsa busca un trabou,” e economista di CBS Peter Hein van Mulligen a bisa, segun NOS. Esaki ta inclui personanan cu discapacidad di trabou of malesa di largo plaso y pensionadonan cu ta regresa na trabou. “Asina cu tin aumento den desempleo no ta djis debi cu hende ta perde nan trabou.”

Un total di 9.8 miyon hende na Hulanda tabatin trabou paga den e di tres kwartaal. Mas cu 5.6 miyon di nan tabatin un contrato di trabou permanente, 37 mil mas cu e kwartaal anterior. E resto ta part-time, trahando menos cu 36 ora pa siman.

Segun CBS, e cantidad di part-timers cu kier traha mas ora a aumenta e aña aki. Alrededor di 541 mil trahado part-time tabata kier mas ora den e di tres kwartaal, 37 mil mas cu na fin di 2024.

Esey ta bon noticia pa e mercado laboral, segun Van Mulligen. “Si e part-timers mester a traha mas, e lo alivia e scarsedad den e mercado laboral,” el a bisa. Pero a agrega cu esaki lo no ta suficiente pa soluciona e scarsedad di personal den varios sector.