Asunto contradictorio den bida publico no ta algo excepcional; cerca nos sigur cu no. Mientras gran parti di comunidad ta sclama pa claridad encuanto e cantidad di hotel y otro acomodacion den planificacion ainda, y ta urgi pa para esakinan, e sector turistico mes ta sclama pa e escasez di trahador cu tin actualmente. Pa ambos aspecto mester wak den direccion di gobierno, pasobra ta nan so por duna claridad den e promer tema, y ta nan so por resolve e problema di escasez. Y ya cu diligencia no ta un don conoci di gobierno, lo bay tarda pa tende algo den ambos caso.

Pa loke ta e promer asunto; recientemente un parlamentario di banda gubernamental a declara di kier sa cuanto proyecto di hotel ta den preparacion ainda y pa cual gobierno a duna e permisonan corespondiente. Esey a su debido tiempo nos lo haya sa con e situacion ey ta. Lo ta bon pa nota si cu no ta trata di e peticion y permisonan otorga pa e gobierno aki so, sino tambe di e compromisonan haci anteriormente y cu ta pendiente, cu tur nan consecuencia. Mientras nos ta spera un contesta riba esey, laga nos pone atencion na e otro asunto urgente, e falta di trahador den sector turistico.

Un comentario cu ta bin dilanti cada vez cu tin un situacion manera actualmente, ta cu lo tin suficiente forza laboral local disponible, basta cu e dunadornan di trabao paga sueldo mihor y duna otro beneficio razonable pa e era cu nos ta biba aden. Esey ta asina? Por lo menos parcialmente. Aunke no por bisa cu tur e forza laboral extra necesario ta presente actualmente, ta un hecho cu e sector turistico mes no ta avanzando lo suficiente cu drecha nan condicion di trabao pa haci empleo den e sector mas atractivo, aunke un parti si di e empresanan den e sector, principalmente e hotelnan, cu a pasa caba pa un siman laboral di cinco dia, percurando asina cu nan empleadonan tin dos dia di descanso cada siman. Pregunta: pakico e otronan no ta sigui e ehemplo ey? Asina tanto miedo pa cambio (positivo) nan tin? Nos no a tende nunca cu esunnan cu a switch pa 5 dia ta perdiendo placa… Sin embargo, e cambio positivo menciona no a trece mas claridad den e caso di e personal contrata a base temporal via ‘uitzendbureau’ o otro contratista. Nos por corda cu nos a reporta na 2020 cu na momento cu e crisis di Covid-19 a yega na nos porta, miles di trahador clandestino a perde nan empleo, sin ningun forma di compensacion. Awor cu situacion economico a mehora, un parti sustancial di e forza laboral a keda emplea di e mesun forma ilicito aki atrobe?

Fuera di esaki tin mas problema cu den ultimo decadanan no a mustra avance den direccion positivo. Aki tambe un contradiccion: mientras gobierno a palabra cu Hulanda pa traha riba ‘flexibilizacion’ di ley laboral, den e Landspakket, pa haci retiro di trahador mas facil y asina stimula – supuestamente – nos economia, por caracteriza Aruba como un berdadero paraiso di posibilidad di empleo temporal. Esaki pa un parti legal y otro fuera di ley. E parti ‘legal’ ta tur tipo di contrato cu uitzendbureau, ‘nulurencontract’ y empleo ‘on call’. E parti ilegal ta e existencia di contratacion temporal di persona indocumenta, sin un debido control di autoridadnan, cu ta laga e trahadornan aki den un situacion sumamente vulnerable, manera e sucesonan menciona, na 2020, a ilustra. Riba tur esaki ta bin e peculiaridad cu cualkier stranhero cu logra haya un permiso, tin trabao garantiza pa por lo menos un aña, mientras cu e empleado local ta e ‘seasonal worker’ cu ta keda contrata por ehemplo pa temporada di fin di aña, pa keda retira ora cos slow down despues atrobe. Nos ta haya straño anto cu e animo bao di trahador local pa traha 6 dia pa siman y sin seguridad laboral a mas largo plazo, ta minimo? Mester bisa cu aki no ta papiando di tur funcion sino specialmente di e empleo menos bon paga den henter e sector.

Pa completa e vista aki riba nos realidad; nos ta kere cu sigur pa un parti no por satisface e demanda laboral for di loke tin presente actualmente como reserva laboral local. Ta necesario pa trece un parti sustancial di e demanda for di exterior. Aki ta surgi e siguiente problema pasobra di ningun manera nos por a ripara den ultimo añanan cu tabatin un mehoracion na e departamentonan responsable pa conseho di mercado laboral y permiso di estadia, relaciona cu trabao. Loke a atrae mas atencion ta e esfuerzonan di e ministro concerni pa deshaci di e directora di Dimas, sin cu tabatin algun clarificacion di su supuesto malfuncionamento. Di eventual mehoracion di e procesonan administrativo, y mas cu tur cos e medidanan anti-corupcion cu mester a tuma pa deshaci di e mal reputacion y pa percura pa proceso di peticion mas agil: nada… Contal cu nos ta dilanti di un temporada di hopi presion cu den pasado a culmina den fiesta di corupcion, pasobra desesperacion ta stimula corupcion. E remedi: proceso agil y transparente, pero esey ta demasiado pa pidi, mucho menos exigi. Como agravante e situacion actual ta nada menos cu un vistazo riba futuro cercano, unda mas dependencia riba forza laboral di exterior lo keda goberna nos realidad economico. Varios aña pasa caba mester a haci e pregunta clave: mas camber ta mas empleo: pa ken? Como cu ciencia basico nunca a logra penetra den gobernacion, esey ta pone nos den e realidad di awe…