Tin un indicacion cu e proyecto di Fast Ferry su bishitantenan lo consisti di mas o menos 70% local, cual lo conecta nos isla cu isla ruman Corsou.

Durante un conferencia di prensa minister di transporte Chris Romero (MEP) a indica cu den proximo 6 lunanan gobierno di Aruba ta spera di drenta den un acuerdo cu Corsou pa asina concretisa e proyecto di Fast Ferry.

“Esaki lo haci cu Aruba y Corsou lo ta mas conecta, bo tin di pensa di esaki manera un highway cu lo conecta e islanan, mirando cu mas o menos 300 auto y 800 hende ta fit riba e ferry aki.” E ferry tin un grandura di 120 meter, pues ta trata di un ferry grandi cual e mandatario ta premira cu lo bira realidad den 2019.

Gobierno lo establece e infrastructura entre otro legal manera migracion y duana, pero e inversion mes lo mester pasa di banda di companianan priva. “Pa gobierno por ehempel establece un waf ta costa hopi mas caro si gobierno haci esaki, en bes cu un compania priva haci esaki.”

Di un pregunta cu un colega di prensa a haci tocante e impuesto cu e proyecto aki lo trece cu esaki, mescos e impuesto di aeropuerto, minister Romero a splica cu ‘e no ta kere e impuesto cu lo introduci cu e Fast Ferry lo encera un suma similar na esun di aeropuerto’. Esaki mirando cu segun minister e impuesto di aeropuerto ta destina primordialmente pa proyectonan di renobacion y mantencion di e aeropuerto mes.

Tocando e mesun tema di sector di aviacion, un colega a puntra si ya a cuminsa combersa cu aerolineanan cu tin vuelo pa nos ruman islanan mirando cu e ferry lo crea competencia pa nan si por premira cu e prijs di un ticket di ferry ta abou di 100 florin. Minister a indica cu no ta asina leu cu palabracionnan pero cu si lo bay sinta cu aerolineanan ora yega asina leu, mirando cu e proyecto awo ta den su fasenan inicial.

E tereno unda lo establece e ferry aki na Aruba probablemente lo ta banda di e refineria cercano na Arubus. Pa loke ta trata contaminacion ainda tin cu establece si ta berdad cu e tereno ta contamina, pero tambe lo mester limpia e tereno.