Mas sorpresa den eleccion

Swing vote a bolbe haci su trabao

Eleccion di diabierna pasa lo duna hopi motibo pa discusion y debate, pasobra ta varios sorpresa tabatin. Esun mas grandi naturalmente tabata e temblor di intensidad desconoci riba escala di Richter, ora cu inmediatamente despues di conoce e resultado final provisional, e lider di partido berde a anuncia cu su partido ta opta pa oposicion y cu e ta opta pa retira como lider di partido. Riba su mes su perdida personal no tabata dramatico: como 400 voto riba un total di casi dies mil… E perdedo grandi tabata su colega Sevinger, cu mas di 1100 voto. Mike de Meza a luci bon cu un perdida reduci di 67. Number cuatro, Arthur Dowers mester a entrega 574 voto, un perdedo grandi tambe. Otro ministro, Schwengle a perde 300 voto (di 767 pa 467). E perdida total di 9727 voto compara cu 2013 ta bay den buki di historia di e partido como un di caidanan ‘sin parachute’. Na 2001, despues di un serie di scandal manera Radisson y Race track, a bin un caida di 6730 voto. Esun di diabierna ultimo tabata anto mas dramatico, aunke e partido a logra keda esun mas grandi, aunke no den asiento tampoco (9).

Pero tabatin mas sorpresa. Partido RED a sorprende no solamente cu un asiento, pero lider Ricardo Croes a bira votegetter number tres, tras di Eman y Evelyn Wever Croes. Cu 3351 voto e tabatin casi dobel e cantidad di lider di POR, Otmar Oduber. Di tur manera POR no tabata luci como un ganado, cu dos asiento, pero cu perdida considerabel pa e trio cu ta encabesa e partido, compara cu nan prestacion anterior. Tabatin tambe e sorpresa di RAIZ, cu den poco tempo a yega mas leu cu e otro partidonan chikito. Hunto cu e renacemento di RED, por mira 6000 voto di protesta contra e falta di bon gobernacion y presencia structural di corupcion den gobierno. Hunto cu e protesta silencioso di esunnan cu no a vota mas pa partido AVP, nos ta papia aki di un movemento grandi, un tipo di landslide sin cu esaki a yuda un otro partido pa yega na mayoria absoluto.

Tambe pa partido MEP e resultado no tabata satisfactorio, kedando leu di por goberna nan so. E mehoracion cu mas di 4400 voto ta considerabel, y a trece e partido casi na igual nivel cu e rival grandi, pero ta obvio cu e diferencia grandi tabata esunnan cu no tabata dispuesto pa apoya partido AVP mas. Tambe ta notabel cu e top di partido, esunnan cu mas di 1000 voto, a trece un parti chikito di e aumento aden: como 900 voto mas pa e top-4 cu a participa na 2013. Dos nobato a haci hopi diferencia: Rocco Tjon y Arthur Vallejo a percura pa mas di 2000 voto nobo, casi 50% di e aumento total.

E pregunta ta awor ken tin algo di celebra? E partido actualmente den gobierno (demisionario) sigur cu no. Formalmente tin e opcion di trata di forma un gobierno, pero si e lider mantene su palabra cu nan ta bay oposicion, y e bay Gobernador tambe pa expresa esey, anto caminda ta habri pa POR y MEP cuminsa negocia. Den fin di siman caba tabata circula composicion di un gobierno nobo, pero nos ta kere cu mester tin e pasenshi, pa e partidonan papia cu Gobernador, y despues esaki lo indica e siguiente paso.

Tambe otro rumornan di posibel maniobra cu e partido berde lo tabatin pa organisa un gabinete cu POR, kitando e exponentenan mas importante for di caminda, pa por cera paz cu lider di POR, ta parce nos loke nan ta: speculacion. Tin un motibo importante pa POR di berdad no bay den un gobierno cu AVP: nan lo ta perdiendo e confiansa cu nan a genera, cu ta caba hopi menos cu nan a spera, si nan bay den e direccion ey. Ademas, manera bisa anteriormente, pakico bay cu AVP den un gobierno, cu ta core riesgo di cay, si autoridadnan hudicial sigui haci nan trabao y yega na enhuicia mas hende di e partido berde?

Finalmente, ta bon pa nos realisa loke a sucede diabierna pasa, cu ta un les pa nos tur. Un pregunta: nos ta keda papia di e Arubano tradicional berde of geel, cu ta vota manera famia ta dicta, o nos ta cuminsa reconoce e balor di un swing vote cu ta premia o castiga gobernante, segun cu nan ta haya motibo? Nos por constata, cu satisfaccion y placer, cu tanto specialista den mercadeo, tanto spindoctor y demas supuesto sabionan cu ta cobra mas cu e prome ministro mes, paga cu nos placa cu realmente mester a bay pa subsidia sector social, entre otro, o pa traha caminda drechi den e barionan, no a yuda pasobra pueblo a descifra tras di tur e palabranan bunita, e maldad cu tabata tuma luga. Bo por crea un pantaya di engaño tremendo, y laga nos page tambe, pero ta yega un dia cu wowo ta habri y cana ta yena. Si partido AVP tabata anticipa nan caida si of no, ya no ta relevante, pasobra pueblo a papia caba.