Masahista Boekhoudt sospechoso di abuso sexual ta keda deteni mientras ta warda resultado di DNA

E caso contra e masahista sospechoso L. Boekhoudt, acusa di abuso sexual durante un sesion di masashi, tabata den corte ayera den pro-forma. Segun e denuncia haci pa e victima di fam Solognier, e sospechoso lo a abusa sexualmente di dje riba 10 di juni 2023 durante e sesion di masashi.

Ministerio Publico (OM) a pidi pa pospone e tratamento di e caso te dia 19 di december. Motibo pa e peticion ta cu e fiscal ta warda riba resultado di e analisis di sperma y DNA cu a ser colecta di Boekhoudt, pa verifica si e rastro di sperma haya riba e victima ta coincidi cu su material genetico.

Abogado di e sospechoso, sr. Vito Carlo, a mustra descontento cu e decision pa e fecha nobo di e tratamento. Segun e abogado, su cliente ta sigui deteni sin cu e investigacion ta completo y e retraso di e resultado forensico ta pone su cliente den un situacion dificil. Carlo a entrega dos peticion formal: un pa otorga ontheffing di detencion y un pa schorsing di detencion, cu ta pidi pa e sospechoso por warda e huicio den libertad bou di cierto condicion te cu ta yega e fecha di tratamento di e caso.

E abogado a defende cu e detencion prolonga no ta rasonabel, ya cu e dossier no ta cla y cu e sospechoso no tin responsabilidad pa e atraso. Den su argumentacion, Carlo a enfatisa cu e circunstancianan personal di su cliente ta mas pisa compara cu e hechonan cu ta ser menciona, y cu, si eventualmente e resultado di DNA no ta un “match”, e detencion lo tabata inhusto.

Den e investigacion, un testigo di fam Ras a bin dilanti pa duna declaracion, pero segun e defensa, e testimonio a surgi solamente un luna despues di e aangifte di Solognier. Carlo a pone na duda e consistencia di e declaracion y a afirma cu tin discrepancia den e relato di testigo. Ta relevante tambe cu testigo Ras ta pareha di e victima Solognier, loke pa e defensa ta plantia pregunta tocante e obhetividad di su testimonio.

Casi dos aña despues di e suceso original, riba 10 di februari 2025, un otro persona —un homber di fam Tromp— a presenta un denuncia similar contra Boekhoudt. E denuncia di Tromp ta contene detaye cu segun abogado Carlo, ta casi identico na e caso di Solognier. Ademas, e dos victima y e testigo ta conoci entre nan, loke e defensa ta mira como un punto importante pa evalua e credibilidad di nan relato.

Di su banda, Ministerio Publico a mantene su posicion cu ta existi suficiente base pa mantene e sospechoso deteni. E fiscal a splica cu e cuestion principal no ta si e pruebanan ya ta completo, sino si tin suficiente indicacion cu un delito serio a tuma luga. Den esaki, OM ta considera cu tin “ernstig bezwaar”, y pa motibo di esey ta rechasa e peticionnan di libertad presentá pa e defensa.

Segun e fiscal, e circunstancianan personal di e sospechoso no ta pisa mas cu e seriedad di e acusacionnan, y el a evalua cu e riesgo di un detencion alternativo ta demasiado halto.

Despues di analisa di e peticionnan y e pruebanan presenta te aworaki, hues a tuma algun minuut pa delibera y a dicidi pa rechasa ambos peticion di e defensa. Den su decision, hues a indica cu e hecho cu e sospechoso ta acusa di un acto “hopi erg y castigabel” ta pisa fuerte. Ademas, segun e declaracion mes di e sospechoso, el a admiti cu e tabata presente na e lugar y cu e tabata dunando masashi na e victima manera e victima mes a describi.

E caso awor ta sigui warda e resultado di e analisis forensico, cu lo sirbi como un elemento crucial pa e siguiente fase di e procedemento penal. Te ora cu e resultado ta disponibel y e tratamento di e caso tuma luga dia 19 di december, e sospechoso L. Boekhoudt lo keda den detencion.

Esaki no ta prome caso cu ta bin dilanti caminda un masahista ta ser acusa di abusa sexualmente di un cliente. Na 2021, R. Carti, a keda acusa di mishimento y violacion di 8 dama cu a bay cerca dje pa haya masashi.

Despues cu keho a keda entrega na Departamento di Salubridad, e caso a cuminsa. Fiscal a mustra riba e denuncianan di e damanan, kendenan ta bisa con durante masashi Carti lo a mishi cu algun di nan, a penetra nan cu dede, of a mishi cu nan pecho.

Recientemente Crote di Prome Instancia a dicta sentencia den otro caso parecido y a declara e sospechoso A. Croes culpable di a mishi di manera intimo cu un pashent.

Segun medionan di comunicacion local a reporta, durante e tratamento di e caso masahista Croes a admiti su responsabilidad y culpabilidad. Segun e condenado, el a confundi e señalnan cu e supuestamente pashent tabata duna cu e lo por tabata interesa den algo mas cu djis un masashi.

Hues a declara e Croes culpabel di inmoralidad y di a penetra e señora cu su dede a base di pruebanan cu tabatin den su contra cu tabata convincente. Hues a duna un castigo di tres aña di prizon, di cual uno ta condicional y dos aña di prueba. Adicionalemnte a bay di acuerdo cu un compensacion di cinco mil florin.