Ayera den corte a tuma luga tratamento di e caso penal contra masahista L. Boekhoudt, sospecha di abuso sexual durante sesionnan di masashi. Despues di investigacion y analisis di DNA colecta, hues a declara Boekhoudt culpabel.

E caso ta data for di 10 di juni 2023, fecha riba cual, segun un keho presenta pa un dama di fam Solognier, Boekhoudt a comete abuso sexual durante un sesion di masashi. Siguiendo e denuncia a detene e sospechoso, y Ministerio Publico a inicia un investigacion penal cu a inclui coleccion di material biologico y tumamento di declaracion.

Durante e audiencia pro forma den luna di october, Ministerio Publico a pidi posponemento di e procedura substancial, argumentando cu resultadonan di analisis forensico crucial ainda tabata pendiente. Specificamente, e resultadonan di e analisis di semen y DNA obteni for di e sospechoso tabata pendiente, pa asina verifica si e material genetico ta cuadra cu e rastronan haya riba e curpa di e victima. Segun Ministerio Publico, e resultadonan aki tabata crucial pa continuacion di e procedura.

Defensa di e sospechoso, representa pa abogado Vito Carlo, a expresa su desacuerdo cu e posponemento y prolongacion di e detencion preventivo. For di su perspectiva, e investigacion tabata incompleto, y e retraso den e resultadonan forensico a pone su cliente den un posicion legalmente desfaborabel. Den e cuadro aki, e defensa di Boekhoudt a presenta dos peticion formal: un pa kita e detencion y un otro pa suspend’e bao di cierto condicionnan, permitiendo e sospechoso warda riba su huicio bao libertad supervisa.

Den su argumento, abogado Carlo a sostene cu e detencion prolonga tabata irasonabel, mirando cu e dossier di e caso no tabata cera ainda y cu e sospechoso no tabata carga responsabilidad pa e retrasonan den e proceso investigativo. Tambe a haci referencia na e circunstancianan personal di e sospechoso cu, segun e abogado di defensa, mester ser teni na cuenta contra e seriedad di e supuesto delitonan. Mas aleu a argumenta cu, si e resultadonan di DNA no a confirma un match, detencion previo lo tabata inhustifica.

Durante e investigacion a sali na cla e testimonio di un persona identifica cu fam Ras. Abogado Carlo a señala cu e declaracion aki a ser duna mas o menos un luna despues di e keho inicial y a cuestiona e coherencia y consistencia di e relato. Tambe a enfatisa cu e testigo tabatin un relacion romantico cu e victima, un circunstancia cu, den bista di e defensa, a lanta preguntanan tocante obhetividad di e testimonio.

Na comienso di 2025, casi dos aña despues di e supuesto incidente original, un di dos victima, un homber di fam Tromp, a entrega un keho similar contra Boekhoudt. E acusacion nobo aki a describi sucesonan cu, segun abogado Carlo, tabatin un similaridad impresionante cu e prome caso. Abogado Carlo a enfatisa mas aleu cu tanto e victimanan como e testigo tabata conoce otro, loke el a considera ta algo relevante ora di evalua e credibilidad di e declaracionnan presenta.

Ministerio Publico di su banda consistentemente a mantene su posicion cu tabatin suficiente base pa hustifica detencion preventivo. Ministerio Publico a indica cu e asunto central no tabata si tur e pruebanan tabata completo, sino mas bien e existencia di indicacionnan fuerte cu a comete un crimen serio. Den e contexto aki, a considera cu a cumpli cu e criterio legal di “obhecion serio” y a rechasa e peticionnan di libertad di e defensa di e sospechoso, declarando cu e riesgonan asocia cu medidanan alternativo tabata demasiado halto.

Despues di a analisa e argumentonan di ambos banda, hues a dicidi di rechasa e peticionnan cu defensa di e sospechoso a presenta y mantene detencion preventivo. Den su rasonamento, corte a evalua e seriedad di e supuesto actonan y a tene cuenta cu e sospechoso mes a admiti su presencia na e localidad y e sesion di masashi, den terminonan similar na esnan describi pa e victima.

E proceso a sigui mientras tabata warda e resultadonan forensico, cu a bira un elemento central pa e siguiente fase di e procedura penal. E analisis di DNA a ser manda pa Instituto Forensico di Hulanda, unda specialistanan a evalua e material colecta. E resultadonan aki posteriormente a confirma cu e DNA haya den e likido biologico descubri riba curpa di e victima tabata pertenece na e acusado, Boekhoudt.

Durante tratamento di e caso, cu a tuma luga ayera, no solamente e aspectonan di evidencia a ser atendi, pero tambe e consecuencianan personal y emocional di e sucesonan reporta. E victima principal, Solognier no tabata presente. Na su luga, pareha di e victima, Ras, a presenta dilanti Corte y a informa cu Solognier no por ta presente pa motibo cu e tin un herida na su cara.

Alabes Ras a informa hues cu Solognier no kier busca ningun tipo di compensacion for di e sospechoso, pero kier pa husticia prevalece.

Durante tratamento di e caso, e sospechoso a rechasa e acusacionnan formalmente y hasta a sugeri cu Solognier y e otro victima Tromp tabata actua den coordinacion pa causa daño na su persona. Un hecho compleho cu tambe a bin dilanti ta cu e sospechoso ta casa cu wela di e victima Solognier y tabata hasta biba un tempo cerca di cas di famia.

No obstante, corte a tene cuenta cu e rapportnan di experto y e testimonio presenta. Hues a argumenta cu e victima a sufri trauma psicologico significante como resultado di e sucesonan, incluyendo episodionan di angustia profundo. Ministerio Publico a sostene cu e declaracionnan di e victima tabata coherente y consistente, y cu nan a ser confirma pa tanto e testimonio di e otro victima y un testigo, como tambe pa e resultadonan di e rapport forensico prepara pa Instituto Forensico di Hulanda.

Di acuerdo cu e evaluacion presenta durante e tratamento di e caso, e evidencia a indica cu durante e sesion di masashi, e sospechoso a comete actonan di indole sexual sin permiso, incluso accionnan cu a culmina den e acusado tirando semen riba e curpa di e victima. E elementonan aki a ser considera particularmente grave pa Ministerio Publico, cu a pidi un castigo di tres aña y seis luna di prison, como tambe un prohibicion di seis aña pa practica como masahista.

Despues di a scucha e argumentonan di defensa y Ministerio Publico, hues a schors e procedura y a anuncia cu e lo delibera pa dicta un sentencia di biaha. Hues a bolbe cu e veredicto, concluyendo cu e acusacionnan contra Boekhoudt a keda proba. Sinembargo, hues no a bay di acuerdo completamente cu e peticion di Ministerio Publico pa loke ta trata e sentencia.

Den su sentencia hues a impone un castigo di tres aña di prison, di cual un aña a keda suspendi condicionalmente, cu un periodo di prueba di tres aña. Hues a dicidi tambe pa no impone e descualificacion profesional pidi pa Ministerio Publico. Den practica, e castigo a suma na un castigo di dos aña di prison efectivo, suheto na posibel reduccion di acuerdo cu e regulacionnan vigente.

Tumando na cuenta e posibilidad di libertad trempan y e tempo cu ya caba e sospechoso a sinta den detencion preventivo, corte a indica cu e castigo real di prison por ser reduci. Den e scenario ey, e sospechoso por keda liber rond di luna di october di e aña aki, dependiendo di e decisionnan administrativo corespondiente.