Segun resumen diario di Departamento di Salubridad Publico DVG riba e desaroyonan di e di cinco ola di pandemia di Covid-19 na Aruba, e tasa di positividad entre nos residentenan ta di 62 porciento.
E tasa di positividad ta referi na e cantidad di test cu ta sali positivo entre e cantidad di test total cu a haci. Un tasa di positividad di 62 porciento pues ta indica cu di cada 100 test cu ta haci, 62 ta sali negativo. Organisacion Mundial di Salud (WHO) desde inicio di e pandemia a recomenda pa mantene un tasa di positividad di apenas 5 porciento. Na momento cu tin mas di esaki, WHO ta recomenda pa amplia e criteria pa haci test, pa asina detecta casonan cu por ta asintomatico pero asina mes ta contagiando otro persona. Sinembargo, den un comunicado di prensa DVG a conseha ciudadanonan pa no bay haci test a menos cu tin sintoma di Covid-19.
E tasa di positividad di 62 porciento ayera a keda calcula despues cu a registra 541 caso nobo di Covid-19, di cual 136 no ta residente.
Ademas, DVG den su resumen a indica cu 673 persona a recupera di e malesa causa pa e virus SARS-CoV-2.
E cantidad di casonan activo di Covid-19 na Aruba ayera tabata 2991, y e cantidad di fayecido relaciona cu Covid-19 a keda na 181.
Datonan di DVG ta ilustra casonan nobo di Covid cu un averahe semanal di 586 caso pa dia, y un averahe di tasa di positividad semanal di 59 porciento pa dia.
Actualmente, na Aruba tin 14 persona interna den hospital pa ricibi tratamento adicional pa Covid. Di esakinan, 3 ta den Unidad di Cuido Intensivo (ICU) mientras 11 ta riba piso general. Ademas, na Colombia tin actualmente tres pashent di Aruba den ICU, y ningun riba piso general.
