Mayor no ta mucho contento cu MLK den Special Onderwijs

Un mayor a acerca Bon Dia Aruba cu su preocupacion riba e sistema di Moeilijk Lerende Kinderen (MLK) Onderwijs. Segun e mayor cu a opta pa keda anonimo, e ta haya cu e tipo di sistema aki no ta yuda e mucha y ta mas bien limita muchanan mas pa bay dilanti den nan estudio y bida. Nos a busca reaccion for di Dienst Publieke Scholen, kende tin dos scol di MLK bao di nan (Emmaschool y Scol Paso pa Futuro) pa sa mas tocante con e sistema aki ta hinca den otro.

Moelijk Lerende Kinderen (MLK) ta un tipo di special onderwijs cu bo ta haya na entre otro Emmaschool, Scol Paso Pa Futuro y Caiquetioschool. Banda di esaki bo ta haya Zeer Moeilijk Lerende Kinderen (ZMLK) cu bo ta haya por ehempel na Scol Duna Man, Stichting voor Verstandelijk Gehandicapten (SVGA). E preocupacion di e mayor cu a acerca nos ta relaciona cu e sistema di MLK y con ta tuma y trata e muchanan aki.

“Ora cu un persona rico su yiu ta fastioso na scol, nan no ta saca nan. Of si nan saca nan mes nan ta bay un scol caro/priva. Pero hende di menos recurso, bo ta haya cabesantenan ta convence mayornan pa e mucha haci test psicologico pa nan yiu mientras cu no tin nada psicologico cu e mucha. Kisas e ta djis fastioso, desconcentra. Na luga di e maestro sa miho, e ta saca e mucha riba speelplaats ora e ta fastioso y pone manera un Moelijk Lerende Kind,” e mayor ta splica nos.

Dictadura di enseñansa
E mayor a subraya tambe cu aparentemente e muchanan di MLK Onderwijs ta haya mas les na papiamento cu na Hulandes. Pa ora nan yega 6de klas, nan no por bay ni EPB. “Nan ta bay pa un cos cu yama aspirant y ki bo ta siña eynan, chapi banda di caminda? Anto casi tur ta Rubiano, hendenan di menos recurso of hendenan cu a drop out. Of hendenan cu pa mala suerte a cay den circulo di pobresa y nan yiunan ta bira cay den mesun circulo ey. Unda nos Rubianonan ta bay yega?”

E mayor tambe a señala na e Multidisciplinaire Centrum y nan rol den dicidi si e mucha mester bay bao di MLK of no. Esey ta e celebro cu ta manda e muchanan eynan. Mester duna e mucha e chens pa haya Hulandes, Spaño of Ingles. Duna nan chens pa desaroya pa sikiera haya bijles pa nan por ta prepara, e mayor ta bisa. Nos lo busca un reaccion for di Multidisciplinaire Centrum riba e tema aki.

Reaccion Dienst Publieke Scholen (DPS)
Segun Dienst Publieke Scholen, e tipo di enseñansa aki yama special onderwijs pa motibo cu e manera di duna les ta diferente. Un di e diferencianan mas grandi akinan na Aruba ta segun DPS, e idioma den cual educacion ta wordo ofreci na e scolnan pa special onderwijs ta papiamento. E scolnan aki bao di DPS ta haya Hulandes como vak. Mescos cu na scolnan regular e instructie taal ta Hulandes, anto bo ta haya otro idiomanan como vak. Segun DPS: Ora cu un alumno caba e scol pa special onderwijs, e por stroom door pa bay EPB of Scol pa Ofishi. Eynan nan ta bay siña un vak specifico. DPS ta bisa cu nan alumnonan hopi biaha ta keda den e mesun scolnan di DPS pasobra por ehempel: Alumnonan di Scol Paso Pa Futuro, un scol pa special onderwijs, ta pasa despues manera a wordo menciona pa aspirant. Pero e posibilidad t’ey pa e bay mas leu segun DPS. Tin di nan cu ta keda stroom door y traha despues por ehempel pa un compania di airco etc. “P’esey e yama un vak, nan ta siña un ofishi. Nan nivel intelectual no ta duna pa bay studia vaknan teoretico manera wiskunde, geschiedenis of algo asina. Pues nan ta siña un vak practico”, office manager/assistent na DPS Anaika Flores ta bisa.

DPS ta splica cu kisas e mayor en cuestion su yiu ta bayendo un scol pa Special Onderwijs cu no ta bao di nan. Mirando cu manera menciona, scolnan pa special onderwijs (MLK) bao di DPS si ta duna Hulandes manera vak. Bon Dia lo haci un poco mas investigacion riba esaki.