Mayoria di Padu Lampe su obranan no ta documenta ainda

Den cuadro di e lansamento di e CD di  e grupo Abako, Vivian Lampe, a gradici e grupo musical aki e interes di adapta un composicion di su tata Padu Lampe na otro ritmo.  El a bisa cu nan ta un tremendo grupo, ya cu nan tur ta musicologo y ‘cada un ta un musico ariba nan mes’.

“Ora e muziek e waya, baila so bo kier baila”, el a bisa.

Homenahe na Padu
E grupo musical Abako Ensemble di Venezuela a batisa nan CD cu e tema clasico Abo So den presencia di Padu, famia y amigonan di dje. Sra. Irma Linares a bisa cu pa Abako e dia aki tabata uno inolvidabel pa nan. Tur e miembronan di e agrupacion aki a presenta na Padu su cas, specialmente pa expresa nan gradicimento den forma di homenahe na e icono di Aruba su cultura.

Sra. Linares a bisa cu den hopi oportunidad  Padu a sa di duna balor y promocion na e musica Venezolano. El a menciona cu Padu su prome CD a wordo dedica na Venezuela. Pa tal motibo e grupo Abako den nan prome CD senciyo of promo nan a dicidi di haci un homenahe na e baluarte di nos cultura. Nan a  duna un bachi musical nobo y contagioso den ritmo di salsa tropical na su composicion Abo So.

Documentacion
Di su banda, yiu muhe di Padu a laga sa cu e fundacion cu a wordo lanta na nomber di su tata y presidi pa Landa Henriquez ta existi ainda. Sinembargo ta keda un preocupacion ainda cu hopi piesa di Padu no a wordo documenta debidamente riba partitura pa nan no bay perdi.

Segun Vivian Lampe, e fundacion Padu Lampe ta hustamente trahando riba esey.  Nan a haci un inventarisacion di tur Padu su material no solamente su musical, sino su pinturanan y obranan literario, ya cu e ta un persona creativo y di mas talento. “Ta hopi material tin pa documenta”, el  a bisa.

Actualmente nan ta den e trabou di digitalisa tur su cassettenan. E ta un trabou intensivo tambe pasobra nan ta varios caha cu cassette  te hasta caha cu 500 cassette aden. Nan ta hopi composicion di Padu te hasta algun cu nunca a wordo conoci of skirbi . “Partituranan cu si bo no ta wak nan skirbi kisas nunca nan  ta bay toke”, sra. Lampe ta splica.

Aunke e proceso ta canando pa documenta tur e material musical aki di Padu, e ta bayendo poco poco.  E trabou aki a cuminsa haya un tiki di forsa pero ainda e ta tuma un par di aña prome cu e ta wordo concretisa den su mayoria. E ta kere cu esaki por dura cuater aña prome cu nan tin basta cos skirbi y debidamente documenta.

Te aworaki tin 25 piesa skirbi cu e musico Johnny Croes a publica cu su partituranan. Pero ainda e mayoria di e trabou ta falta. Un cos positivo ta cu tin algun musico local cu a expresa nan compromiso pa sigui cu e trabou aki pa asina Padu su composicion musical por keda pa e generacion futuro. “Pa e generacion cu ta bini por sigui gosa di e bunita musica di mi tata”, asina e yiu ta bisa.

Pero nan mester di ayudo di cualkier di nos musiconan profesional cu kier duna un man pa skirbi partitura of yuda den e proceso di digitalisacion. E musico interesa por tuma contacto cu e fundacion cu a wordo lanta na Padu su honor.

Sra. Lampe a bisa cu tur e material aki a bay pa fundacion Unoca. Eynan nan por haya espacio ya cu na Padu su cas tur cos ta habri y tur e  material aki tabata core riesgo di por wordo daña.  E material aki mester wordo warda den airco y bon protegi. Ta full un material valioso di Padu,  Unoca tin den nan poder te hasta Padu su cartanan of corespondencia ta den un safe luga.

 

 

 

 

You May Also Like

Ciudadanonan ta suplica gobierno pa haci algo cu e Killing Cage na Wayaca

Maltrato grandi di bestia aparentemente tumando luga   Ultimamente ciudadanonan ta acudi riba rednan ...

Fundacion CineAruba: ‘Acceso na fondonan ta bira menos despues di tempo’

Fundacion CineAruba den aña nobo ta spera cu gobierno lo duna contesta riba nan ...

Cerbes Chill a domina durante Carnaval 64

E aña aki Chill tabata den paradanan di Carnaval 64 pa asina regala tur ...

Nos ta sostene creatividad y artistanan suficientemente?

Go Cultura Foundation cu concierto pa recauda fondo diasabra Go Cultura Foundation ta recaudando ...

‘E Revolucion di e Pan Bati’

Pop-up Cafe, un iniciativa conhunto di Aruba Coffee Roasting Company y Itza Pizza, mas ...